ជ្រូកកណ្តុរចិញ្ចឹមតាមធម្មជាតិ មួយក្បាល​តម្លៃ​លក់​ចាប់ពី ២៥០ ០០០ រៀល ងាយស្រួលចិញ្ចឹម​មិនប្រឈមជំងឺ

ពលរដ្ឋជនជាតិដើមភាគតិចព្នង នៅខេត្តមណ្ឌលគិរី ប្រកបរបរកសិកម្ម ឯខ្លះផ្សេងទៀតក៏​ឆ្លៀត​ចិញ្ចឹមជ្រូកគោមាន់ទាតាមបែបលក្ខណៈគ្រួសារតាមលំនៅឋានរៀងៗខ្លួន។

អ្វីជាការកត់សម្គាល់ គេ​សង្កេតឃើញពលរដ្ឋមួយ​ចំនួន​បាន​ចិញ្ចឹមជ្រូកតាមបែបលក្ខណៈធម្មជាតិ ហើយ​អះអាងថា ធន់ជំងឺឈឺ​ថ្កាត់ ហើយថែមទាំងពេលលក់បាន​កម្រៃថ្លៃជាងជ្រូកលើទីផ្សារផងដែរ។

កសិករ​ឈ្មោះ សុខុន ត្រើន អាយុ ២៨ ឆ្នាំ និងប្រពន្ធឈ្មោះ អា ស្រីទៀង អាយុ ២៣ ឆ្នាំជាជនជាតិដើមភាគព្នង ដែលមានទីលំនៅបច្ចុប្បន្នស្ថិតក្នុងភូមិពូតាំង សង្កាត់រមនាក្រុងសែនមនោរម្យខេត្តមណ្ឌលគិរីបានរៀបរាប់ប្រាប់ «កម្ពុជាថ្មី» នៅថ្ងៃទី ២០ ខែមិថុនា ឆ្នាំ ២០២៥នេះ ថា ក្រោយ​រៀបការអស់រយៈពេល ៨ ឆ្នាំ គ្រួសារ​របស់លោក​គ្មានមុខរបរអ្វី ក្រៅពីធ្វើស្រែចម្ការ និងឆ្លៀតចិញ្ចឹមជ្រូកតពីឪពុកម្តាយ។

សព្វថ្ងៃ​លោកបានចិញ្ចឹមជ្រូកកណ្តុរចំនួន ៩ ក្បាលហើយអាចរកប្រាក់ចំណូលបានគួរសម សម្រាប់ដោះស្រាយជីវភាពគ្រួសារ។ ការចិញ្ចឹមជ្រូក កណ្ដុរ តាមបែបលក្ខណៈប្រពៃណី កសិករ​ឈ្មោះ សុខុន ត្រើន ប្រាប់​ថា​គឺ​លែងតាមវាលខ្នងភ្នំតាមបែបធម្មជាតិគឺមិនលំបាកក្នុងការថែទាំ និងដាក់ចំណីច្រើន ហើយពេលដែលធំធាត់ល្មមអាច ចាប់លក់បានតម្លៃថ្លៃគួរសមដែរគឺមួយក្បាលចាប់ពី ២៥០ ០០០ រៀលឡើទៅ ខណៈជ្រូកធម្មតាលក់បានត្រឹមតែ ២០០ ០០០ រៀលប៉ុណ្ណោះ។

«ការចិញ្ចឹមជ្រូកកណ្ដុរតាមបែបលក្ខណៈប្រពៃណី មិនលំបាកក្នុងការចិញ្ចឹមនោះទេ ព្រឹកឡើងត្រូវលែងវាឲ្យស៊ីចំណីតាមបែបធម្មជាតិ ឲ្យវាស៊ីចំណីពេលថ្ងៃត្រង់ម្តង ហើយពេលល្ងាចឲ្យដាក់ចំណីឲ្យវាសុីម្តងទៀតទើបគៀងចូលក្នុងទ្រុង»។

លក្ខណៈពិសេសដែលលក់បានតម្លៃជាងនេះ លោក សុខុន ត្រើន ប្រាប់​ថា ដោយសារជ្រូកកណ្តុរមានសាច់ច្រើនមិនសូវមានខ្លាញ់ដូចជ្រូកធម្មតា និយាយជារួមគឺមានរសជាតិឆ្ងាញ់ដែលគេនិយមទិញទៅបរិភោគ ពិសេសរដូវបុណ្យទាន គឺឈ្មួញតែងតែប្រមូលទិញស្ទើរគ្មានសល់ទាំងតូចទាំងធំ៕

អត្ថបទ៖រៀម សុខហេង