ព័ត៌មានជាតិ

អាជ្ញាធរខណ្ឌពោធិ៍សែនជ័យ ស្ថាបនាផ្លូវបេតុងថ្មីមួយខ្សែ សម្រួលការធ្វើដំណើរប្រជាពលរដ្ឋ

បានផុស

១១ ខែ មុន

នៅ

ថ្ងៃចន្ទ ៧ កក្កដា ២០២៥

ដោយ

ផ្លូវបេតុងមួយខ្សែដែលរងការខូចខាត ពេលនេះ អាជ្ញាធរខណ្ឌពោធិ៍សែនជ័យ បានប្រើប្រាស់ថវិកាអភិវឌ្ឍន៍ឆ្នាំ ២០២៥ ស្ថាបនាឡើងវិញ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងការដ្ឋានកំពុងស្ថាបនាផ្លូវបេតុងនេះភ្ជាប់ជាមួយផ្លូវ ១០៥ កា ក្នុងភូមិចំការឪឡឹក ២ សង្កាត់កាកាប ២ ខណ្ឌពោធិ៍សែនជ័យ រាជធានីភ្នំពេញ។

លោក ផាន់ ស៊ីណា ជាប្រជាពលរដ្ឋ បានឲ្យដឹងថា ផ្លូវកន្លែងនេះពីមុនមានផ្លូវបេតុងជាប់ជាមួយផ្លូវរថភ្លើងមានការខូចខាតតែបន្តិចបន្តួចតែប៉ុណ្ណោះ ក្រោយមកក៏ចាប់ផ្ដើមខូចខ្លាំងទៅៗ និងផ្នែកមួយចំនួនមានទឹកដក់ក្នុងជង្ហុក តែងតែបង្កគ្រោះថ្នាក់ដល់អ្នកដំណើរផងដែរ។ ជាមួយនេះ លោកបានសម្ដែងក្ដីសប្បាយរីករាយជាខ្លាំងចំពោះការយកចិត្តទុកដាក់ពីអាជ្ញាធរមូលដ្ឋានក្នុងការស្ថាបនាផ្លូវបេតុងមួយខ្សែនេះឡើងវិញ ដើម្បីជួយសម្រួលដល់ការធ្វើដំណើរប្រជាពលរដ្ឋ។

ចំណែក លោក កុសល ជាអ្នករត់កង់បីឥណ្ឌា បានលើកឡើងដែរថា នៅពេលឃើញមានការស្ថាបនាផ្លូវថ្មីដូច្នេះ គាត់សប្បាយរីករាយជាខ្លាំង ព្រោះងាយស្រួលដល់ការធ្វើដំណើរ និងកាត់បន្ថយការកកស្ទះត្រង់ចំណុចនេះផងដែរ។ នៅពេលធ្វើដំណើរ មិនចាំបាច់ជិះដល់ផ្លូវ ១០៥ កា នោះទេ គឺអាចជិះលើផ្លូវបេតុងថ្មីនេះវាងបានផងដែរ។

ដោយឡែកអ្នកម៉ៅការធ្វើផ្លូវ បានបញ្ជាក់ថា ផ្លូវមួយខ្សែនេះ ជាប្រភេទផ្លូវបេតុង ក្រាលសរសៃដែក មានកម្រាស់ ១.៥ តឹក ទទឹង ៨ ម៉ែត្រ និងប្រវែងស្ថាបនាចាក់បេតុងប្រវែង ១១០ ម៉ែត្រ។