បង្ក្រាបករណីចាប់បង្ខាំងមនុស្សនៅខណ្ឌពោធិ៍សែនជ័យ ឃាត់ខ្លួនជនជាតិចិន ២ នាក់ និង រំដោះជនរងគ្រោះ ៤ នាក់

កាលពីថ្ងៃទី ២៣ ខែឧសភា ឆ្នាំ ២០២៦ ថ្មីៗ នេះ កម្លាំងសមត្ថកិច្ចប៉ុស្ដិ៍នគរបាលរដ្ឋបាលចោមចៅទី ៣ សហការជាមួយកម្លាំងអធិការដ្ឋាននគរបាលខណ្ឌពោធិ៍សែនជ័យ បានបើកប្រតិបត្តិការចុះបង្ក្រាបករណីចាប់បង្ខាំងមនុស្សដោយខុសច្បាប់ ១ ករណី ស្ថិតនៅផ្ទះលេខ H18 ក្នុងបុរី ញ៉ូថោន ភូមិព្រៃទា ១ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ ដោយឃាត់ខ្លួនជនសង្ស័យជាជនជាតិចិនចំនួន ២ នាក់ និង ជួយរំដោះជនរងគ្រោះ ៤ នាក់ ដោយសុវត្ថិភាព។

ប្រតិបត្តិការនេះធ្វើឡើងក្រោមការបញ្ជាផ្ទាល់ពីលោកឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ បន្ទាប់ពីសមត្ថកិច្ចទទួលបានព័ត៌មានពាក់ព័ន្ធនឹងសកម្មភាពសង្ស័យ នៃការបង្ខាំងមនុស្សខុសច្បាប់នៅទីតាំងខាងលើ។

តាមប្រភពព័ត៌មានពីសមត្ថកិច្ច បានឲ្យដឹងថា ជនសង្ស័យទាំង ២ នាក់ ដែលត្រូវបានឃាត់ខ្លួនរួមមាន ៖ ឈ្មោះ Qin Liang Liang ភេទប្រុស អាយុ ៣៨ ឆ្នាំ ជនជាតិចិន និង ឈ្មោះ Zhang Janjun ភេទប្រុស អាយុ ៣៧ ឆ្នាំ ជនជាតិចិន។ អ្នកទាំងពីរមានមុខរបរមិនពិតប្រាកដ។ ចំណែកជនរងគ្រោះទាំង ៤ នាក់ ត្រូវបានជួយសង្គ្រោះរួមមាន ៖ ឈ្មោះ Zhang Jipeng ភេទប្រុស អាយុ ៣៨ ឆ្នាំ , ឈ្មោះ Hong Dayan ភេទប្រុស អាយុ ៣៨ ឆ្នាំ , ឈ្មោះ Chen Genkai ភេទប្រុស អាយុ ៣៨ ឆ្នាំ និង ឈ្មោះ Xu Wen Kai ភេទប្រុស អាយុ ៣៧ ឆ្នាំ ដែលសុទ្ធសឹងជាជនជាតិចិន និង​មានមុខរបរមិនពិតប្រាកដដូចគ្នា។

ក្នុងប្រតិបត្តិការបង្ក្រាបនេះ សមត្ថកិច្ចបានដកហូតវត្ថុតាងមួយចំនួន រួមមាន ៖ ខ្នោះដៃចំនួន ២ គូ , ឧបករណ៍សម្រាប់ឆក់ (ពិលឆក់) ពណ៌ខ្មៅចំនួន ១ , ដំបងដែករលាស់ចំនួន ១ , ច្រវាក់ដែកប្រវែង ៥២ សង់ទីម៉ែត្រចំនួន ១ ខ្សែ , ញញួរចំនួន ១, កូនកាំបិតបត់ចំនួន ១ និង ទូរស័ព្ទដៃចំនួន ៣ គ្រឿង។

បច្ចុប្បន្ន ជនសង្ស័យ និង វត្ថុតាង ត្រូវបានបញ្ជូនទៅកាន់ការិយាល័យជំនាញ ដើម្បីបន្តកសាងសំណុំរឿង និង អនុវត្តតាមនីតិវិធីច្បាប់ជាធរមាន ខណៈសមត្ថកិច្ចកំពុងបន្តស្រាវជ្រាវស្វែងរកអ្នកពាក់ព័ន្ធផ្សេងទៀត ប្រសិនបើមាន៕
អត្ថបទ ៖ សំណាង