ព័ត៌មានជាតិ

រកឃើញមនុស្ស១០០នាក់ មានជាប់ពាក់ព័ន្ធនឹងអ្នកជំងឺម្នាក់នៅខេត្តកណ្តាល

បានផុស

៥ years មុន

នៅ

ថ្ងៃសុក្រ ២ មេសា ២០២១

ដោយ

ក្រុមការងារចម្រុះនៃខេត្តកណ្តាលបានកំណត់មុខសញ្ញា ស្វែងរកអ្នកពាក់ព័ន្ធដោយផ្ទាល់ និងដោយប្រយោល ជាមួយបុគ្គលឈ្មោះ ប៊ុន សក្កដា មានវិជ្ជមានជំងឺកូវីដ-១៩រស់នៅភូមិតាពេទ្យ ឃុំជ្រៃលាស់ ស្រុកពញាឮដែលបានប្រាស្រ័យទាក់ទងជាមួយពលរដ្ឋនៅភូមិពាម ឃុំសំបួរមាស ស្រុកមុខកំពូលបានចំនួន១០០នាក់ ក្នុងនោះ៩នាក់ប៉ះពាល់ផ្ទាល់ និង៩១នាក់ទៀតប៉ះពាល់ដោយប្រយោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ សោភ័ណ្ឌ អភិបាលខេត្តកណ្តាលបានដឹកនាំកិច្ចប្រជុំបន្ទាន់នៅរសៀលថ្ងៃទី០២ ខែមេសាដើម្បីត្រួតពិនិត្យលទ្ធផលក្នុងការស្រាវជ្រាវបឋមកាលពីយប់ថ្ងៃទី០១ ខែមេសា ឆ្នាំ២០២១។

លោកអភិបាលខេត្តបានមានប្រសាសន៍ថា ចំពោះប្រជាពលរដ្ឋទាំងអស់ ដែលមានការពាក់ព័ន្ធជាមួយបុគ្គលឈ្មោះ ប៊ុន សក្កដា ក្រុមគ្រូពេទ្យជំនាញបានយកសំណាកធ្វើតេស្តរកមេរោគ រីឯអ្នកពាក់ព័ន្ធដោយប្រយោល បានដាក់ឲ្យធ្វើចត្តាឡីស័កនៅមណ្ឌលចត្តាឡីស័ក ដែលរដ្ឋបាលស្រុកបានរៀបចំ។

ជាមួយគ្នានេះដែរលោកអភិបាលខេត្ត សូមអំពាវនាវដល់បងប្អូនប្រជាពលរដ្ឋ ដែលដឹងថា ខ្លួនមានការពាក់ព័ន្ធដោយផ្ទាល់ ឬដោយប្រយោលជាមួយបុគ្គល ឈ្មោះ ប៊ុន សក្កដា ខាងលើ សូមចូលរួមសហការជាមួយក្រុមគ្រូពេទ្យជំនាញដើម្បីយកសំណាកធ្វើតេស្តរកមេរោគ និងធ្វើចត្តាឡីស័ក ដើម្បីចូលរួមកាត់ផ្តាច់សង្វាក់ នៃការឆ្លងរាលដាលជំងឺកូវីដ-១៩ ដ៏កាចសាហាវនេះ ហើយត្រូវបន្តគោរព អនុវត្តតាមគោលការណ៍ណែនាំរបស់ក្រសួងសុខាភិបាល ជាពិសេសវិធានការការពាររបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺ ៣.ការពារ និង៣.កុំ៕

សំអឿន