ជម្លោះព្រំដែន៖ អ្នកនាំពាក្យ ថា សារព័ត៌មានថៃ ផ្សាយលឿន តែមិនប្រាកដការពិតទេ

តើការផ្សាយព័ត៌មានដោយភាគីថៃពិតដែរឬអត់ជុំវិញសភាពការណ៍ដ៏ក្ដៅគគុកតាមព្រំដែនរវាងកម្ពុជា និងថៃ? ត្រូវបានអ្នកនាំពាក្យក្រសួងការពារជាតិកម្ពុជា លោកស្រីឧត្តមសេនីយ៍ឯក ម៉ាលី សុជាតា ឆ្លើយថា «សារព័ត៌មានថៃ គឺរហ័ស លឿន ក៏ប៉ុន្តែមិនប្រាកដថាការពិតទេ»។

ត្រង់ចំណុចនេះ លោកស្រីឧត្តមសេនីយ៍ឯក ម៉ាលី សុជាតា ថា ទាមទារឱ្យសាធារណមតិ ពិសេសប្រជាពលរដ្ឋត្រូវតែតាមដានដោយការយកចិត្តទុកដាក់ និងពិនិត្យពិច័យឱ្យបានច្បាស់លាស់ ហើយស្វែងរកប្រភពឱ្យបានត្រឹមត្រូវ ដើម្បីផ្ទៀងផ្ទាត់នូវការពិត។ ការលើកឡើងរបស់អ្នកនាំពាក្យក្រសួងការពារជាតិរូបនេះ បានធ្វើឡើងក្នុងសន្និសីទសារព័ត៌មានស្ដីពីព្រឹត្តិការណ៍បាញ់ប្រហារគ្នានៅតំបន់ព្រំដែនរវាងកម្ពុជា និងថៃ ដែលសន្និសីទនេះរៀបចំឡើងដោយអង្គភាពអ្នកនាំពាក្យរាជរដ្ឋាភិបាលកម្ពុជា នៅរសៀលថ្ងៃទី២៤ ខែកក្កដានេះ។

ការផ្ទុះអាវុធក្នុងថ្ងៃនេះ លោកស្រីឧត្តមសេនីយ៍ឯក ម៉ាលី សុជាតា អះអាងថា ផ្ដើមដោយកងទ័ពថៃមុន ដែលបានបើកការបាញ់ប្រហារមកលើកងទ័ពកម្ពុជា។ ទើបកងទ័ពកម្ពុជាបានប្រើប្រាស់សិទ្ធិការពារខ្លួនក្នុងអធិបតេយ្យ និងបូរណភាពទឹកដីរបស់ខ្លួនប្រឆាំងនឹងការឈ្លានពានរបស់កងទ័ពថៃដែលបានបំពានលើបូរណភាពទឹកដីកម្ពុជា។

បើតាមលោកស្រីអ្នកនាំពាក្យ កងទ័ពថៃបានបើកការវាយប្រហាររហូតដល់៨ទីតាំង ដោយមានការប្រើប្រាស់អាវុធធុនធ្ងន់ និងយន្តហោះចម្បាំង F-16 ផងដែរ។ ទីតាំងទាំង៨នោះរួមមាន៖ ប្រាសាទតាមាន់ធំ ប្រាសាទតាក្របី តំបន់ភ្នំទ្រព្យ វាលឥន្ទ្រី តាថាវ ភ្នំខ្មោច អានសេះអូផ្កាស្នេហ៍ និងតំបន់មុំបី។

កងទ័ពថៃមិនត្រឹមតែមានចេតនាវាយប្រហារលើទីតាំងយោធាកម្ពុជានោះទេ ប៉ុន្តែថែមទាំងបើកការវាយប្រហារដល់តំបន់ ដែលមានប្រជាជនស្លូតត្រង់ថែមទៀតផង ដែលធ្វើឱ្យប្រជាជនបានជម្លៀសចេញពីផ្ទះសំបែងរកទីទួលសុវត្ថិភាព រស់នៅជាមួយភាពភ័យខ្លាច និងតក់ស្លុត។ លោកស្រីអ្នកនាំពាក្យ អះអាងបន្ថែមដូច្នេះ។

ចំពោះជំហរកម្ពុជា អ្នកនាំពាក្យក្រសួងការពារជាតិ បញ្ជាក់ថា នៅតែរក្សាជំហរដដែល គឺកម្ពុជាប្រើប្រាស់សិទ្ធិក្នុងការការពារខ្លួន ក្នុងដែនអធិបតេយ្យជាតិខ្លួន ហើយកម្ពុជាផ្ដោតទៅលើតែទីតាំងយោធាប៉ុណ្ណោះ មិនផ្ដោតទៅលើជនស៊ីវិលកន្លែងឡើយ៕  

ដោយ៖ ធឿន វ៉ាន់សុង