ផ្អាកអនុវត្តច្បាប់មួយរយៈ រដ្ឋមន្ត្រីមហាផ្ទៃ ថា គ្រោះថ្នាក់ចរាចរណ៍កើនឡើង

ថ្លែងក្នុងកិច្ចប្រជុំបូកសរុបការងារសុវត្ថិភាពចរាចរណ៍ផ្លូវគោក លោកឧបនាយករដ្ឋមន្ត្រី ស សុខា​ រដ្ឋមន្ត្រីក្រសួងមហាផ្ទៃ បានអះអាងពីការកើនឡើងគួរឱ្យកត់សម្គាល់នូវករណីគ្រោះថ្នាក់ចរាចរណ៍ ក្នុងរយៈពេលដែលកម្លាំងនគរបាលបានផ្អាកការអនុវត្តច្បាប់ចរាចរណ៍មួយរយៈកន្លងមក។

ឧបនាយករដ្ឋមន្ត្រី ស សុខា បាននិយាយថា ក្នុងកាលៈទេសៈកម្ពុជាកំពុងប្រឈមមុខនឹងការឈ្លានពានដោយយោធាថៃ អគ្គស្នងការដ្ឋាននគរបាលជាតិ ក៏បានផ្អាកការអនុវត្តច្បាប់ស្ដីពីចរាចរណ៍ផ្លូវគោកជាបណ្ដោះអាសន្ន តែការផ្អាកនេះបាននាំឱ្យករណីគ្រោះថ្នាក់ចរាចរណ៍បានហក់ឡើងខ្ពស់ជាងអំឡុងពេលធម្មតា។ ន័យនេះ លោក បានបញ្ជាក់ពីភាពចាំបាច់បំផុតនៃការរឹតបន្តឹងច្បាប់ដែលជាកិច្ចការចំពោះមុខក្នុងការកាត់បន្ថយគ្រោះថ្នាក់ចរាចរណ៍ បន្ទាប់ពីសភាពការណ៍ជម្លោះព្រំដែនធូរស្រាល។

យ៉ាងណាក៏ដោយ ថ្លែងក្នុងកិច្ចប្រជុំរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីរសៀលថ្ងៃទី១៣ ខែសីហា ឆ្នាំ២០២៥ លោករដ្ឋមន្ត្រីក្រសួងមហាផ្ទៃ បានសាទរចំពោះលទ្ធផលវិជ្ជមានជារួមនៃការថយចុះករណីគ្រោះថ្នាក់ចរាចរណ៍ ទាំងការស្លាប់ និងរបួស ក្នុងឆមាសទី១ ឆ្នាំ២០២៥នេះ ដែលជាការបញ្ជាក់ច្បាស់អំពីលទ្ធផលនៃការខិតខំប្រឹងប្រែងអនុវត្តច្បាប់។

យោងតាមរបាយការណ៍ មានគ្រោះថ្នាក់ចរាចរណ៍កើតឡើងសរុប១ ០៦៦លើក បណ្ដាលឱ្យស្លាប់មនុស្ស៦៩៤នាក់ និងរបួស១៤៧៦នាក់។ ចំនួននេះ បើធៀបនឹងឆមាសទី១ ឆ្នាំ២០២៤ គ្រោះថ្នាក់ចរាចរណ៍ថយចុះ៤៦៨លើក ស្មើនឹង៣១% អ្នកស្លាប់ថយចុះ៩៩នាក់ ស្មើ១២% និងអ្នករបួសថយចុះ៦៤០នាក់ ស្មើ៣០%។

បើទោះបីជាករណីគ្រោះថ្នាក់ចរាចរណ៍ថយចុះក៏ពិតមែន ក៏លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក នៅតែបន្តបង្ហាញក្តីព្រួយបារម្ភ។ ព្រួយបារម្ភ ក៏ព្រោះតែ លោក សង្កេតឃើញថា អត្រាគ្រោះថ្នាក់ចរាចរណ៍ជារៀងរាល់ថ្ងៃ ជាពិសេសករណីស្លាប់ និងរបួស នៅតែបន្តស្ថិតក្នុងតួលេខខ្ពស់ ទោះបីជាស្ថិតក្នុងស្ថានភាពថយចុះធៀបនឹងរយៈពេលដូចគ្នាកាលពីឆ្នាំកន្លងទៅក៏ដោយ។ ខណៈនិន្នាការនេះនឹងនៅតែបន្តជះផលអវិជ្ជមាន ដោយសារតែកំណើននៃការប្រើប្រាស់មធ្យោបាយធ្វើដំណើរ និងការធ្វើចរាចរណ៍ដ៏មមាញឹកពីមួយឆ្នាំទៅមួយឆ្នាំ។

ត្រង់ចំណុចនេះ លោក ស សុខា ណែនាំគណៈកម្មាធិការជាតិសុវត្ថិភាពចរាចរណ៍ផ្លូវគោក ពិនិត្យទិដ្ឋភាពបច្ចេកទេស និងច្បាប់ ដើម្បីគ្រប់គ្រងនិងកំណត់លក្ខខណ្ឌនៃការប្រើប្រាស់កង់អាគុយ ឬកូនរថយន្តអាគុយ(ជិះម្នាក់ពីរ) ដ្បិតការប្រើប្រាស់មានកំណើន សកម្មភាពចរាចរណ៍មានលក្ខណៈទូទៅ ទាំងលើផ្លូវជាតិ ពិសេសចាប់ផ្ដើមមានក្នុងកំណត់ត្រានៃគ្រោះថ្នាក់ចរាចរណ៍៕