អនុព័ន្ធយោធាអាស៊ានចុះសង្កេតការណ៍នៅច្រកអានសេះ ក្រោយយោធាថៃរំលោភបទឈប់បាញ់

ក្រុមអ្នកសង្កេតការណ៍អន្តរកាល នៅព្រឹកថ្ងៃទី១៥ ខែសីហា ឆ្នាំ២០២៥ បានបន្តចុះទៅកាន់តំបន់ច្រកអានសេះ ក្នុងខេត្តព្រះវិហារ ដើម្បីសង្កេតមើលស្ថានភាពសន្តិសុខតាមព្រំដែន និងផលប៉ះពាល់ផ្ទាល់ក្នុងអំឡុងជម្លោះព្រំដែនកម្ពុជា-ថៃ។

ក្រុមអ្នកសង្កេតការណ៍អន្តរកាលនេះ ដឹកនាំដោយលោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ីប្រចាំកម្ពុជា ដោយមានការចូលរួមពីអនុព័ន្ធយោធាអាស៊ានមួយចំនួនទៀត ដូចជាប្រ៊ុយណេ ឥណ្ឌូណេស៊ី ឡាវ មីយ៉ាន់ម៉ា ហ្វីលីពីន និងវៀតណាម។

តាមការថ្លែងឱ្យដឹងដោយអ្នកនាំពាក្យក្រសួងការពារជាតិកម្ពុជា លោកស្រីឧត្តមសេនីយ៍ឯក ម៉ាលី សុជាតា ព្រឹកថ្ងៃសុក្រនេះ ក្រុមអ្នកសង្កេតការណ៍អន្តរកាលនេះ បានធ្វើដំណើរទៅកាន់ខេត្តព្រះវិហារ គោលដៅទៅកាន់ទីតាំងចំនួន២ ដែលគោលដៅទី១ គឺច្រកអានសេះ និងគោលដៅទី២ ការចុះសង្កេតទីតាំងសម្រាប់ក្រុមអ្នកសង្កេតការណ៍អន្តរកាល បំពេញការងារនៅខេត្តព្រះវិហារ។

ដំណើរចុះពិនិត្យផ្ទាល់ដោយក្រុមអនុព័ន្ធយោធាអាស៊ានពេលនេះ គឺដើម្បីសង្កេតមើលស្ថានភាពសន្តិសុខតាមខ្សែព្រំដែន និងផលប៉ះពាល់ផ្ទាល់ក្នុងអំឡុងជម្លោះព្រំដែនកម្ពុជា-ថៃ ខណៈនៅច្រកអានសេះនេះ ត្រូវបានរំលោភលើបទឈប់បាញ់ដោយយោធា ក្រោមរូបភាពរាយលួសបន្លា ព្រមទាំងបន្ថែមកម្លាំងទ័ពចូលមកឈរជើងនៅទីនោះ ក្រោយបទឈប់បាញ់បានចូលជាធរមានកាលពីម៉ោង១២យប់ថ្ងៃទី២៨ ខែកក្កដា ឆ្នាំ២០២៥ និងកិច្ចព្រមព្រៀងដោយភាគីទាំងពីរក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥។

នេះជាលើកទី២ហើយ ដែលប្រតិភូអន្តរជាតិ ចុះពិនិត្យនៅតំបន់ច្រកអានសេះនេះ ខណៈដែលលើកទី១ កាលពីថ្ងៃទី៣០ ខែកក្កដា ឆ្នាំ២០២៥ ក្រោយបទឈប់បាញ់ចូលជាធរមានភ្លាមៗ ក្រសួងការពារជាតិកម្ពុជា ក៏បានដឹកនាំអនុព័ន្ធយោធាមកពីប្រទេសមហាអំណាច និងអាស៊ាន ព្រមទាំងមន្ត្រីអន្តរជាតិនានាសរុប១៣ប្រទេសចុះពិនិត្យជាក់ស្ដែងនៅតំបន់នេះ។

ចំពោះការចុះជាថ្មីម្ដងទៀតនេះ អ្នកនាំពាក្យក្រសួងការពារជាតិ បញ្ជាក់ថា គឺដើម្បីតាមដានការវិវត្តនូវស្ថានការណ៍នៅក្នុងទីតាំងជាក់ស្ដែងដែលបំផ្លិចបំផ្លាញដោយការប្រយុទ្ធរវាងកងទ័ពកម្ពុជា និងថៃ ដោយកងទ័ពថៃបើកការវាយប្រហារមុន ចាប់តាំងពីថ្ងៃទី២៤ ខែកក្កដា ឆ្នាំ២០២៥៕

ដោយ៖ ធឿន វ៉ាន់សុង