បេក្ខជនជិត ១ ម៉ឺននាក់ ដាក់ពាក្យប្រឡងសញ្ញាបត្រមធ្យមសិក្សាទុតិយភូមិឆ្នាំ ២០២៥ នៅខេត្តតាកែវ

មាន​បេក្ខជន​សរុប​ ៩ ៨១៦ ​នាក់​ បានដាក់​ពាក្យ​ប្រឡង​យក​សញ្ញាបត្រ​មធ្យមសិក្សា​ទុតិយភូមិ​សម័យ​ប្រឡង​ទី ​២៨ ​ខែសីហា ឆ្នាំ​ ២០២៥ កើន​ឡើង​ជាង​ឆ្នាំមុន ​៤៧៤ នាក់ ខណៈ​ឆ្នាំ ២០២៤ មាន​បេក្ខជន​ចុះ​ឈ្មោះ​ប្រឡង​តែ ៩ ៣៤២ នាក់។ នេះ​បើ​តាម​ការ​បញ្ជាក់​ពី លោក ឡោ វីរិទ្ធ ប្រធាន​មន្ទីរ​អប់រំ យុវជន និង​កីឡា​ខេត្ត​តាកែវ នៅ​ព្រឹក​ថ្ងៃ​ទី ២០ ខែ​សីហា ឆ្នាំ ២០២៥។

លោក​ប្រធាន​មន្ទីរ បាន​បន្ថែម​ថា មណ្ឌល​ប្រឡង​សរុប​មាន​ ១៧​ មណ្ឌល ថ្នាក់​វិទ្យាសាស្ត្រ​មាន ៤ មណ្ឌល ស្មើ​នឹង ៩៧ បន្ទប់ និង​ថ្នាក់​វិទ្យាសាស្ត្រ​សង្គម មាន ១៣ មណ្ឌល ស្មើ ៣០៤ បន្ទប់។ បេក្ខជន​ចុះឈ្មោះ​ប្រឡង​មាន ៩ ៨១៦ នាក់ (ស្រី ៥ ២៨៦ នាក់​) ក្នុង​នោះ ថ្នាក់​វិទ្យាសាស្ត្រ​មាន​បេក្ខជន ២ ៣៨៥ នាក់ ស្រី ១ ៤៧៦ នាក់ និង ថ្នាក់​វិទ្យាសាស្ត្រ​សង្គម​មាន​បេក្ខជន ៧ ៤៣១ នាក់ ស្រី ៣ ៨១០ នាក់។

លោក ឡោ វីរិទ្ធ បញ្ជាក់​ថា ក្នុងចំណោម​បេក្ខជន​ដែល​ដាក់ពាក្យ​ប្រឡង​ទាំង ៩ ៨១៦ នាក់​នោះ គឺ ៖ -បេក្ខជន​ចំណេះ​ទូទៅ​មាន ៨ ៩៥១ នាក់ ស្រី ៤ ៩២៧ ។ -បេក្ខជនស្វៃរិន​ចំណេះ​ទូទៅ​មាន ៧៩៦ នាក់ ស្រី ៣៣៨ នាក់។ -បេក្ខជន​បំពេញវិជ្ជា​មាន ៦៤ នាក់ ស្រី ២០ នាក់។ -បេក្ខជន​ស្វៃ​បំពេញ​វិជ្ជា​មាន ៥ នាក់ ស្រី ១ នាក់៕

អត្ថបទ ៖ វីរៈ