អាជ្ញាធរចាប់ឆ្នោតផ្ដល់ដីដល់ពលរដ្ឋជិត១០០គ្រួសារដែល​ព្រមចាកចេញពីច្រាំងស្ទឹងពោធិ៍សាត់

រដ្ឋបាល​ខេត្ត​ពោធិ៍សាត់បានរៀបចំ​ពិធី​ចាប់​ឆ្នោត​ទទួលដីឡូតិ៍នៅ​ទី​តាំងថ្មី​ជូនដល់ប្រជាពលរដ្ឋចំនួន៩៨គ្រួសារ ដែលមានសំណង់ និងរស់នៅគ្មានប្លង់កម្មសិទ្ធ តាមខ្នងប្រឡាយព្រៃញី និងតាមបណ្តោយប្របមាត់ស្ទឹងពោធិ៍សាត់ នៅព្រឹក​ថ្ងៃទី​៥ ខែកញ្ញា ឆ្នាំ២០២៥។

អភិបាល​ខេត្ត​ពោធិ៍សាត់​លោក ខូយ រីដា បាន​ថ្លែងក្នុង​ពិធី​នោះដោយ​បាន​អរគុណ​ចំពោះ​ពលរដ្ឋ​ទាំង​៩៨​គ្រួសារ​ដែល​ព្រម​ប្រគល់​ដី​ឱ្យ​រដ្ឋវិញ ដើម្បី​ធ្វើ​ការ​អភិវឌ្ឍ។ លោក​បន្ថែម​ថាលោក​នឹងធ្វើឱ្យខេត្តពោធិ៍សាត់ក្លាយជាទីក្រុងដ៍មនោរម្យ ដ៍មានតម្លៃសម្រាប់ប្រជាជនខេត្តពោធិ៍សាត់ ដោយត្រូវរៀបចំអោយមានសោភ័ណភាព អនាម័យ បរិស្ថាន ការរស់នៅប្រកបដោយផាសុខភាព និងមានសណ្តាប់ធ្នាប់ល្អ ។

លោកថា៖ «ចំពោះដីឡូតិ៍លំនៅឋានថ្មីនេះ គឺមានប្លង់កម្មសិទ្ធិស្របច្បាប់ មានប្រព័ន្ធលូ ប្រព័ន្ធទឹក ភ្លើងនិងគ្រោងបង្កើតឱ្យផ្សារលក់ដូរនៅទីនេះថែមទៀតផង»។

លោកអភិបាល​ខេត្ត​បាន​បន្ថែម​ទៀត​ថា​ការ​សម្រេច​ផ្លាស់​ទីលំនៅ​របស់​ពលរដ្ឋ​នឹង​ផ្ដល់​លទ្ធភាព​ដល់​រដ្ឋាបាល​ខេត្តរៀបចំ​សណ្ដាប់​ធ្នាប់ទាក់ទាញភ្ញៀវទេសចរជាតិ-អន្តរជាតិ និងអ្នកវិនិយោគមកកម្សាន្ត និងបណ្តាក់ទុនក្នុងខេត្តឱ្យកាន់តែច្រើនឡើង ជាពិសេសបង្កលក្ខណៈ និងត្រៀមទទួលទេសចរណ៍ ចូលរួមក្នុងពិធីបុណ្យទន្លេ ដែលខេត្តពោធិ៍សាត់ គ្រោងនឹងទទួលធ្វើជាម្ចាស់ផ្ទះរៀបចំ ក្នុងឆ្នាំ២០២៦ខាងមុខផងដែរ​។

ប្រជាពលរដ្ឋ ដែលបានចូលរួមចាប់ឆ្នោតទទួលយកដីឡូតិ៍ បានសម្តែងនូវទឹកចិត្តរីករាយ និងថ្លែងនូវអំគុណយ៉ាងជ្រាលជ្រៅចំពោះអាជ្ញាធរខេត្ត ស្រុក ក្រុងនិងស្ថាប័នពាក់ព័ន្ធតែងតែយកចិត្តទុកដាក់គិតគូរសុខទុក្ខប្រជាពលរដ្ឋ។ 

នេះជាជំហានទី៣ហើយដែលរដ្ឋបាលខេត្តពោធិ៍សាត់បានធ្វើការផ្តល់ដីនៅទីតាំងថ្មីជូនដល់ ដែលបានស្ម័គ្រចិត្តព្រមចាកចេញពីតាមមាត់ស្ទឹងពោធិ៍សាត់។ 

ចំពោះប្រជាពលរដ្ឋ ចូលរួមចាប់ឆ្នោត ទទួលយកដីឡូតិ៍លំនៅឋានថ្មី មានប្លង់កម្មសិទ្ធិស្របច្បាប់ត្រឹមត្រូវក្នុងពេលនេះ ក្នុងមួយគ្រួសារ ទទួលបានដីមួយឡូតិ៍ ទំហំ៥ គុណនិង ២០ម៉ែត្រ ស្ថិតក្នុងគម្រោងអភិវឌ្ឍន៍ ភូមិឋានក្សេមក្សាន្តបឹងយាលើផ្ទៃដី១០ហិកតា មានចម្ងាយប្រមាណតែ៣គីឡូម៉ែត្រពីទីប្រជុំជនក្រុងពោធិ៍សាត់។ ការផ្តល់ដីនៅទីតាំងថ្មីជូនដល់ប្រជាពលរដ្ឋដែលស្ម័គ្រចិត្តនេះគឺមិនមែនជាសំណងនោះទេ តែវាកើតចេញពីទឹកចិត្ត​របស់លោក​អភិបាល​ខេត្តរួមនិង ប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់លោករដ្ឋមន្ត្រី កែវ រតនៈ៕ 

ដោយ៖ លាន គ្រន