ព័ត៌មានជាតិ

អភិបាលស្រុកស្វាយលើ ៖ ជំនន់ទឹកភ្លៀងនៅតំបន់ភ្នំគូលែន ស្រកចុះបណ្ដើរៗ ហើយ

បានផុស

៩ ខែ មុន

នៅ

ថ្ងៃអង្គារ ១៦ កញ្ញា ២០២៥

ដោយ

ជំនន់ទឹកភ្លៀងនៅតំបន់ភ្នំគូលែន បានស្រកចុះវិញបណ្ដើរៗ ហើយ បន្ទាប់ពីអាជ្ញាធរពាក់ព័ន្ធនៅតំបន់នោះ ប្រឹងប្រែងបញ្ចៀសទឹកឲ្យហូរតាមស្ទឹង និងអូរ។ នេះបើតាមការបញ្ជាក់របស់លោក អៀង ពិសិដ្ឋ អភិបាលស្រុកស្វាយលើ បានឲ្យកម្ពុជាថ្មីដឹងនៅព្រឹកថ្ងៃទី ១៦ ខែកញ្ញា ឆ្នាំ ២០២៥ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ១៥ ខែកញ្ញា ឆ្នាំ ២០២៥ ម្សិលមិញ ជំនន់ទឹកភ្លៀង ហក់ឡើងខ្លាំង ហូរលិចតំបន់ទឹកធ្លាក់ភ្នំគូលែន ដើម្បីជៀសវាងការបង្កគ្រោះថ្នាក់ដល់ប្រជាពលរដ្ឋ អាជ្ញាធរស្រុកស្វាយលើ បានប្រកាសបិទផ្អាកភ្ញៀវទេសចរចូលទៅលេងនៅតំបន់ទឹកធ្លាក់ភ្នំគូលែនបណ្ដោះអាសន្ន។

អាជ្ញាធរបានឲ្យដឹងថា ភ្លៀងធ្លាក់ប៉ុន្មានថ្ងៃជាប់ៗ គ្នា ធ្វើឲ្យទឹកជន់ហក់ឡើងខ្លាំង ជន់លិចទីកន្លែងអង្គុយ កន្លែងកម្សាន្តនានា ដោយស្ថានភាពទឹកកាន់តែហក់ឡើងខ្លាំង ទើបសម្រេចបិទតំបន់ទឹកធ្លាក់ភ្នំគូលែនជាបណ្ដោះអាសន្ន មិនឲ្យភ្ញៀវទេសចរចូលលេងកម្សាន្ត ជៀសវាងហានិភ័យផ្សេងៗ កើតឡើង។

ជាមួយនេះ លោកអភិបាលស្រុកស្វាយលើ បានឲ្យដឹងថា គិតត្រឹមព្រឹកថ្ងៃទី ១៦ កញ្ញា នេះ ស្ថានភាពទឹកនៅតំបន់ទឹកធ្លាក់ភ្នំគូលែន បានស្រកចុះជាបណ្ដើរៗ ហើយ ប៉ុន្តែអាជ្ញាធរមិនទាន់អនុញ្ញាតឲ្យភ្ញៀវទេសចរចុះលេងបានទេ។ ដោយឡែក សម្រាប់ការអង្គុយលេង ញាំអាហារនៅតាមខ្ចុស ភ្ញៀវទេសចរអាចចូលអង្គុយលេងបានធម្មតា៕

អត្ថបទ ៖ ជុន កុសល

សូមទស្សនាវីដេអូខាងក្រោម ៖