ផ្លូវជាតិលេខ ៣ ពី​​កំពត​​ទៅ​វាលរេញ មន្រ្តីជាន់ខ្ពស់​កម្ពុជា​ ជំរុញបើ​កការដ្ឋាន​ស្ថាបនាពេលជួបពិភាក្សាជាមួយ​​រដ្ឋមន្រ្តី​ក្រសួង​ការបរទេស​ចិន

លោក ស៊ុន ចាន់ថុលស៊ុន ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុង​ឱកាស​ជួបពិភាក្សាការងារ​ជាមួយ​​លោក វ៉ាង យី សមាជិកការិយាល័យនយោបាយ ប្រធានការិយាល័យគណៈកម្មការកិច្ចការបរទេសនៃគណៈកម្មាធិការ​មជ្ឈឹមបក្សកុម្មុយនីស្តចិន និងជារដ្ឋមន្ត្រីការបរទេសចិន​ បានលើកពី​គម្រោងផែនការនានាលើវិស័យហេដ្ឋារចនាសម្ព័ន្ធ វិនិយោគ ពាណិជ្ជកម្ម កសិកម្ម ឧស្សាហកម្ម សុខាភិបាល វប្បធម៍ និងបច្ចេកវិទ្យាជាដើម ក្នុង​នោះលោក​​ក៏លើកពីផែនការ​ជំរុញ​ការ​ស្តារ​ជួសជុល​ឡើង​វិញ​កំណាត់ផ្លូវជាតិលេខ ៣ ពីកំពត​ទៅ​វាលរិញ​ដែល​រង​ការ​ខូច​ខាត​បង្ក​​​ការ​លំបាក​ដល់ពលរដ្ឋក្នុង​ការ​ធ្វើ​ដំណើរ។

ក្នុង​ជំនួបពិភាក្សាជាមួយលោក វ៉ាង យី សមាជិកការិយាល័យនយោបាយ ប្រធានការិយាល័យគណៈកម្មការកិច្ចការបរទេសនៃគណៈកម្មាធិការមជ្ឈឹមបក្សកុម្មុយនីស្តចិន និងជារដ្ឋមន្ត្រីការបរទេសចិន លោក ស៊ុន ចាន់ថុល បានលើកពិភាក្សាលើប្រធានបទសំខាន់ៗក្នុងការជំរុញពង្រឹងកិច្ចសហប្រតិបត្តិការ និងការអនុវត្តគម្រោងផែនការនានាលើវិស័យហេដ្ឋារចនាសម្ព័ន្ធ វិនិយោគ ពាណិជ្ជកម្ម កសិកម្ម ឧស្សាហកម្ម សុខាភិបាល វប្បធម៍ និងបច្ចេកវិទ្យាជាដើម។ ក្នុង​នោះ​លោក​ក៏​បាន​លើក​ពី​គម្រោង​ស្តារ​ផ្លូវ​ជាតិ​លេខ ៣ ពីកំពត​ទៅវាលរិញ ដែលមាន​ចម្ងាយ​​ជាង ២០ គីឡូម៉ែត្រដែល​ផ្លូវ​នេះ​​បាន​រង​ការ​ខូចខាត​យ៉ាង​ធ្ងន់ធ្ងរ។

ក្រៅពីលើកពី​គម្រោង​ស្តារ​កំណាត់​​ផ្លូវជាតិលេខ ៣ ពីកំពត​ទៅវាលរិញ លោក​ឧបនាយករដ្ឋមន្រ្តី​ក៏​បាន​លើកពិភាក្សាលើ​គម្រោងអភិវឌ្ឍនានា​ក្នុង​នោះ​មានដូចជា គម្រោងព្រែកជីកហ្វូណនតេជោ គម្រោងសាងសង់កំណាត់ផ្លូវជាតិលេខ៧ រមាត-ត្រពាំងគ្រៀល គម្រោងទំនើបកម្មប្រព័ន្ធចម្រោះទឹក​កខ្វក់ខេត្តព្រះសីហនុ គម្រោងពង្រីកការនាំចេញពីកម្ពុជាទៅកាន់ប្រទេសចិន ក្រោមកិច្ចព្រមព្រៀងពាណិជ្ជកម្មសេរី និង​គម្រោង​ច្រករបៀងត្រីនិងអង្ករជាដើម។

រដ្ឋាភិបាលកម្ពុជាបាន​ស្នើ​ភាគី​ចិនជួយ​ពន្លឿន​ក្នុងការ​ផ្តល់​​ហិរញ្ញប្បទាន​លើ​គម្រោង​ជួសជុល​ស្តារ​ឡើង​វិញ​ផ្លូវជាតិ​លេខ ៣ ពី​វាលរេញទៅ​ត្រពាំងរពៅ ដែល​កំពុង​រង​ការខូចខាត​ធ្ងន់ធ្ងរឲ្យ​បាន​ឆាប់ ដើម្បី​សម្រួល​ការ​ធ្វើដំណើរ​របស់​ប្រជាពលរដ្ឋ ក៏ដូចជា​ការ​ដឹក​ទំនិញ​បាន​ល្អ​ប្រសើរ។

បើតាម​ប្រភពពី​មន្រ្តីក្រសួង​សាធារណការ​និង​ដឹកជញ្ជូន កំណាត់​ផ្លូវជាតិ​លេខ ៣ កំពត​-​វាលរេញ​ ដែល​រង​ការ​ខូចខាត​មាន​ប្រវែង ២០ គីឡូម៉ែត្រ​ ក្នុង​នោះមាន​កំណាត់​ផ្លូវ​ប្រវែង ១៥ គីឡូម៉ែត្រ ខូច​ដោយសារតែ​ស្ថានភាព​កសាង​គ្រឹះ​មិនបាន​រឹងមាំ ខណៈ​​​ប្រវែង ៥ គីឡូម៉ែត្រ​ទៀត ភ្ជាប់​ទៅ​ផ្លូវ​បំបែក​វាលរេញស្ថានភាព​ដី​ខាងក្រោមស្អុយ​ជម្រៅ​ដល់​ទៅ ១៨ ម៉ែត្រ ដែល​ជា​ដើមចម​ចម្បង​មួយ​នាំ​ឲ្យ​ផ្លូវ​សាងសង់​ហើយ​តែងតែ​ខូច​ទៅវិញ៕