ព័ត៌មានជាតិ

ហាងកាហ្វេយីហោធំៗចំនួន ៤ កំពុងមានវត្តមាននៅព្រលានយន្តហោះតេជោតម្លៃជាង ២ ពាន់លានដុល្លារ

បានផុស

៨ ខែ មុន

នៅ

ថ្ងៃពុធ ២៤ កញ្ញា ២០២៥

ដោយ

តាមមន្រ្តីគ្រប់គ្រងមួយរូបនៅអាកាសយានដ្ឋានអន្តរជាតិតេជោបានបង្ហើបឲ្យដឹងថា នៅព្រលានយន្តហោះអន្តរជាតិតេជោ មានហាងកាហ្វេធំៗចំនួន ៤ កំពុងមានវត្តមានដើម្បីផ្តល់សេវាអាហារនិងភេសជ្ជៈ សម្រាប់ពលរដ្ឋនិងអ្នកដំណើរចេញចូលអាកាសយានដ្ឋានតម្លៃ ២ ពាន់លានដុល្លារ ដែលទើបបើកឲ្យដំណើរការសាកល្បងកាលពីពេលថ្មីៗនេះ។

មន្រ្តីរូបនោះបានអះអាងថា យីហោហាងកាហ្វេនៅព្រលានយន្តហោះអន្តរជាតិតេជោ មួយចំនួនទើបតែមានវត្តមានលើកដំបូងនៅកម្ពុជាដូចជា ហាង Paul និង Columbus ខណៈហាងកាហ្វេយីហោដ៏ល្បីចំនួនពីរគឺ Brown និង Starbucks ក៏បានជ្រើសរើសពង្រីកអាជីវកម្មបន្ថែមនៅអាកាសយានដ្ឋានដ៏ទំនើបរបស់កម្ពុជានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាហារដ្ឋាននៅក្នុងព្រលានយន្តហោះអន្តរជាតិតេជោចែកជាពីរតំបន់ មាននៅក្នុងតំបន់ Airside សម្រាប់អ្នកដំណើរត្រៀមហោះហើរ និងតំបន់ Landside សម្រាប់ពលរដ្ឋទូទៅដែលមកកម្សាន្ត ដែលអាចទៅប្រើប្រាស់សេវានិងទិញទំនិញផ្សេងៗ។

ឧកញ៉ា ឆារស៍ វាន់ អភិបាលក្រុមហ៊ុន CAIC ដែលគ្រប់គ្រងអភិវឌ្ឍព្រលានយន្តហោះអន្តរជាតិតេជោបានប្រាប់ក្រុមអ្នកសារព័ត៌មានក្នុងអំឡុងពេលចុះទស្សនកិច្ចព្រលានយន្តហោះអន្តរជាតិតេជោ ដែលកំពុងដំណើរការសាងសង់ថា ក្នុងបរិវេណអាកាសយានដ្ឋានអន្តរជាតិតេជោបានរៀបចំផ្ទៃដីទំហំប្រមាណ ២ ហិកតា ដែលប្រមូលផ្តុំដោយហាងលក់ទំនិញ និងហាងអាហារនានា ដើម្បីផ្តល់សេវាដល់អ្នកដំណើរឆ្លងកាត់នៅអាកាសយានដ្ឋានអន្តរជាតិតេជោ។

បើតាមឧកញ៉ា ឆារស៍ វ៉ាន់ មានហាងលក់ទំនិញ និងហាងអាហារដ្ឋានជាង ៨០ បានចុះកុងត្រាបើកអាជីវកម្មនៅក្នុងអាកាសយានដ្ឋានអន្តរជាតិតេជោ។ យ៉ាងណាមិញ ក៏មានអាជីវកម្មជាង ១០០ ទៀត បានស្នើទីតាំងបើកបន្ថែមក្នុងអាកាសយានដ្ឋាន។

«ហាងទាំងខាងក្នុង និងខាងក្រៅបានចុះកុងត្រាបើកក្នុងព្រលានមានជាង ៨០ ប៉ុន្តែប្រមាណ ១០០ ហាងទៀត ក៏ចាប់អារម្មណ៍ចង់ចូលមកស្វែងរកទីតាំងបើកបន្ថែម ប៉ុន្តែការផ្តល់ការអនុញ្ញាតិយ៉ាងណាត្រូវអនុវត្តតាមប្លង់ព្រលាន ដើម្បីឲ្យសមស្របតាមតម្រូវការរបស់អ្នកដំណើរ»។ លោកឧកញ៉ា ឆារស៍ វ៉ាន់ បញ្ជាក់បន្ថែម៕