បច្ចេកវិទ្យា​ទំនើប​ ៤ បំពាក់នៅអាកាសយានដ្ឋាន​តេជោ នាំបទពិសោធន៍​ថ្មី​នៃ​ការ​ធ្វើដំណើរ​តាម​ផ្លូវអាកាសមក​ប្រទេស​កម្ពុជា

អាកាសយានដ្ឋាន​អន្តរជាតិ​តេជោ បាន​ធ្វើ​ទំនើបកម្ម​​​រហូត​ត្រូវបាន​អាជ្ញាធរអាកាសចរ​​ផ្តល់ចំណាត់ថ្នាក់​នៅក្នុ​ងចំណោម​​​​អាកាសយានដ្ឋានដ៏កំពូល​​មួយ​​​របស់​ពិភពលោក​។

អាកាសយានដ្ឋានតម្លៃ​ជិត ២ ពាន់​លាន​ដុល្លារនេះ ​បាន​បំពាក់​​បច្ចេកវិទ្យាដែល​សម្រួល​ដល់ការ​ធ្វើ​ដំណើរ​ចេញចូល​របស់ភ្ញៀវទេសចរ​ រួមទាំង​ការ​នាំ​បទពិសោធន៍ថ្មី​សម្រាប់​ការ​ធ្វើ​ដំណើរ​តាមផ្លូវអាកាសមក​ប្រទេស​កម្ពុជា។

​

ច្រក​ទ្វារ​អេឡិចត្រូនិក​ឆ្លាតវៃ​ (Smart Gate)

​ការ​​ដាក់​ឲ្យដំណើរការ​ប្រព័ន្ធ​ច្រកទ្វារ​អេឡិចត្រូនិក (Smart Gate) ​​ក្រោម​ហេតុផលធំ​​ចំនួន​ ២ ទីមួយ គឺ​កាត់​បន្ថយ​ការរង់ចាំរបស់អ្នកដំណើរ និង​ទី​ពីរ បង្កើនប្រសិទ្ធភាពក្នុងការ​កត់ត្រា​នូវ​ទិន្នន័យអ្នកដំណើរចេញចូល​បានជាក់លាក់។

ខុសពីសព្វមួយដង ដែល​អ្នកដំណើរ​ឆ្លង​កាត់អាកាសយានដ្ឋាន​តម្រូវ​ឲ្យ​​​ឈរ​រង់ចាំ​ឲ្យ​​មន្ត្រី​ត្រួតពិនិត្យ​ ​ប្រព័ន្ធ​បច្ចេកវិទ្យា​ដ៏ទំនើប​នេះ​សម្រួលដល់​​អ្នកដំណើរ​​មិន​ឲ្យ​មាន​ការ​កកស្ទះ​​​​ លើក​លែង​តែ​មាន​ឧបសគ្គ​ខ្លះៗ​ដែល​ត្រូវ​ការជំនួយ​ពី​មន្រ្តី​​មាន​សមត្ថកិច្ច។

តាមរយៈការប្រើប្រាស់​ច្រក​ទ្វារ​អេឡិចត្រូនិក​ឆ្លាតវៃ​ (Smart Gate) ក៏​ជួយ​ដល់មន្រ្តី​​ច្រកទ្វារ​ងាយស្រួល​គ្រប់គ្រង​ទិន្នន័យ​លំហូរ​អ្នក​ដំណើរ​ ​និង​ការ​ផ្ទៀងផ្ទាត់​អត្តសញ្ញាណ​ផ្សេងៗ​របស់អ្នក​ដំណើរ​ចេញចូល​ប្រទេស​កម្ពុជា​។

បច្ចុប្បន្ន​អ្នក​ដំណើរ​មក​ពី​ប្រទេស​ចំនួន ១៨ អាច​ប្រើប្រាស់​ប្រព័ន្ធ​ច្រក​ទ្វារ​អេឡិចត្រូនិក​ឆ្លាតវៃនៅ​អាកាស​យានដ្ឋាន​​អន្តរជាតិ​តេជោ ដែល​រួម​មាន​ប្រទេស​អាស៊ាន​ទាំង ១០ ចិន ជប៉ុន កូរ៉េ​ខាងត្បូង តំបន់​សេដ្ឋកិច្ច​ពិសេស​ហុងកុង និង​ម៉ាកាវ អាមេរិក អូស្ត្រាលី បារាំង អាល្លឺម៉ង់ និង​ចក្រភព​អង់គ្លេស។

សេវាកម្ម​ Check in ដោយ​ខ្លួនឯង

ក្រុមហ៊ុនអាកាសចរណ៍ Emirates បានក្លាយជាក្រុមហ៊ុនអាកាសចរណ៍ដំបូងគេ ដែលបាន​ដាក់ឱ្យ​ដំណើរការ​សេវាកម្ម Check-in ដោយ​ខ្លួន​ឯង​នៅ​អាកាសយានដ្ឋានអន្តរជាតិតេជោ។

ម៉ាស៊ីនផ្ដល់សេវាកម្ម Check-in ដោយខ្លួនឯងចំនួនបួន ​ភ្ជាប់ជាមួយប្រព័ន្ធរបស់ក្រុមហ៊ុនអាកាសចរណ៍ Emirates ត្រូវបានដាក់ឱ្យ​អតិថិជនប្រើប្រាស់។ អតិថិជនអាច​ស្កេនលិខិតឆ្លងដែន ពិនិត្យ និងលក្ខខណ្ឌ ជ្រើសរើសឬផ្លាស់ប្តូរកៅអី ទិញសេវាកម្មបន្ថែម និងធ្វើបច្ចុប្បន្នភាពព័ត៌មានសម្រាប់ការទំនាក់ទំនង មុនពេលធ្វើដំណើរទៅកាន់កន្លែង check-in ដើម្បីដាក់អីវ៉ាន់​របស់ខ្លួន។

បំពាក់​​ម៉ាស៊ីន​ស្កេន (X-Ray) ដ៏​ទំនើប ​មិន​បាច់​អ្នកដំណើរ​ដោះ​សម្ភារ​ជាប់​ខ្លួន

អាកាសយានដ្ឋាន​​អន្តរជាតិ​តេជោ បាន​នាំ​យក​ឧបករណ៍​ស្កេន​ដ៏​ទំនើបដែល​អាច​ស្កេន​ឆែក​ខ្លួន​អ្នក​ដំណើរ​ ដោយ​មិន​តម្រូវ​ឲ្យ​ដោះ​សម្ភារៈ​​ជាប់​ខ្លួន។ យ៉ាងណាមិញ ​ម៉ាស៊ីន​ដែល​បំពាក់នៅច្រក​ត្រួតពិនិត្យ​សុវត្ថិភាពនេះ​​ ប្រើប្រាស់បាន​តែ​ក្នុង​លក្ខខណ្ឌ​ពិសេសៗ​ប៉ុណ្ណោះ មិន​សម្រាប់​ប្រើប្រាស់​​ទូទៅ​នោះ​ទេ។

បំពាក់ប្រព័ន្ធ​បច្ចេកវិទ្យាជំនួយការ​ចត​យន្តហោះ AVGS

អាកាសយានដ្ឋាន​អន្តរជាតិ​តេជោ​ បាន​បំពាក់​ប្រព័ន្ធ​បច្ចេកវិទ្យា​ជំនួយ​ការ​ចត AVGS (Aircraft Ground Vehicle System) ​ដែលប្រព័ន្ធនេះ​​​បាន​សម្រួល​ដល់​ប្រតិបត្តិការ​ចូល​ចត​របស់​យន្តហោះ ​ដោយ​មិន​ត្រូវ​ការ​ជំនួយ​ពី​មន្រ្តី​បច្ចេកទេស​​​។

ក្រៅពី​ការ​នាំ​បច្ចេកវិទ្យាទំនើបៗបំពាក់នៅអាកាសយានដ្ឋានអន្តរជាតិតេជោ ដែលបានជំរុញ​ផ្លាស់ប្តូរមុខមាត់ថ្មីនៃការធ្វើដំណើរ​តាមផ្លូវអាកាសមកប្រទេសកម្ពុជា សមត្ថកិច្ច​កម្ពុជា​ក៏​បានរៀបចំសម្រួល​នីតិវិធី​​ តាមរយៈ​ការ​​ដាក់​ឲ្យ​ដំណើរការ​ប្រព័ន្ធ​សលាកបត្រ​ចេញចូល​ប្រទេស​កម្ពុជា «Cambodia e-Arrival» ​​ដើម្បីរួមចំណែកទាក់ទាញភ្ញៀវទេសចរ ស្របតាមបរិបទនៃពិភពលោកដែលកំពុងមានភាពរីកចម្រើនផ្នែកបច្ចេកវិទ្យា។

ជំនួសឱ្យការ​បំពេញ​ទម្រង់បែបបទចេញចូល​លើ​ក្រដាស (ទម្រង់បែបបទអន្តោប្រវេសន៍ ទម្រង់សុខភាព និងសេចក្តីប្រកាសគយ) ប្រព័ន្ធ Cambodia e-Arrival កាត់បន្ថយពេលវេលាបំពេញបែបបទបស់អ្នកដំណើរ​ដោយ​គ្រាន់តែបំពេញព័ត៌មានតាមគេហទំព័រ www.arrival.gov.kh ឬកម្មវិធីទូរសព្ទ Cambodia e-Arrival បានយ៉ាងឆាប់រហ័ស និង​មានភាពងាយស្រួល។ មួយវិញទៀត ប្រព័ន្ធនេះក៏​សម្រួលដល់​ការ​ស្នើសុំទិដ្ឋាការពេលមកដល់កម្ពុជាបានឆាប់រហ័សជាងមុនផងដែរ៕