មេប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ហាមមន្ត្រីទទួលយកលុយធីបពីភ្ញៀវ

លោកឧត្តមសេនីយ៍ត្រី សុខ ធា បានដាក់បទបញ្ជាយ៉ាងម៉ឺងម៉ាត់ចំពោះមន្ត្រីនគរបាលប្រចាំប៉ុស្តិ៍ច្រកទ្វារអាកាសយានដ្ឋានអន្តរជាតិតេជោ ដោយហាមដាច់ខាតមិនឱ្យទទួលយកលុយធីបពីភ្ញៀវឡើយ។ ការហាមបែបនេះ ត្រូវបានលោកឧត្តមសេនីយ៍រូបនេះ ថា ជាកត្តាដែលនាំឱ្យអាប់ឱនកិត្តិយសប្រទេសជាតិ និងប៉ះពាល់ដល់វិន័យកងកម្លាំងនគរបាលជាតិ។

លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ក៏បានណែនាំបន្ថែមដល់កម្លាំងនគរបាលត្រូវមានឥរិយាបថសមរម្យ ពង្រឹងវិន័យកងកម្លាំង គ្រប់គ្រងកម្លាំង និងរក្សានូវសាមគ្គីផ្ទៃក្នុង ក៏ដូចជាវេនការងារឱ្យបានល្អសម្រាប់ធ្វើរបាយការណ៍ប្រចាំថ្ងៃ សប្តាហ៍ ខែ ឆ្នាំឱ្យទាន់ពេលវេលា។

ដោយសារបច្ចុប្បន្ន ប្រព័ន្ធបច្ចេកវិទ្យាកាន់តែទំនើប លោកឧត្តមសេនីយ៍ត្រី បានណែនាំឱ្យមន្ត្រីបន្តខិតខំសិក្សារៀនសូត្របន្ថែមទៀត ដើម្បីងាយស្រួលក្នុងបំពេញភារកិច្ចប្រចាំថ្ងៃ ក៏ដូចជាងាយស្រួលដល់ការផ្តល់សេវានានាជូនភ្ញៀវជាតិ និងអន្តរជាតិ។

ការណែនាំទាំងនេះ ធ្វើឡើងនៅក្នុងកិច្ចប្រជុំប្រចាំខែ កាលពីរសៀលថ្ងៃទី៥ ខែធ្នូ ឆ្នាំ២០២៥ ហើយនៅក្នុងកិច្ចប្រជុំដោយមានការចូលរួមពីលោក លោកស្រី ជានាយរងប៉ុស្តិ៍ នាយផ្នែក និងមន្ត្រីពាក់ព័ន្ធនោះ លោកឧត្តមសេនីយ៍ត្រី នាយប៉ុស្តិ៍ ក៏បានណែនាំដល់មន្ត្រីទាំងអស់ត្រូវចៀសឆ្ងាយពីការប្រើប្រាស់គ្រឿងញៀន និងលេងល្បែងស៊ីសងខុសច្បាប់គ្រប់ប្រភេទផងដែរ។

តែយ៉ាងណា លោកឧត្តមសេនីយ៍ត្រី សុខ ធា បានថ្លែងអំណរគុណដល់កម្លាំងប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ដែលបានយកចិត្តទុកដាក់ខ្ពស់ និងខិតខំបំពេញភារកិច្ចប្រកបដោយប្រសិទ្ធភាព និងចូលរួមសហការជាមួយកងកម្លាំងគ្រប់ស្ថាប័ន ការពារសន្តិសុខ សុខសុវត្ថិភាពជូនថ្នាក់ដឹកនាំ និងភ្ញៀវជាតិ អន្តរជាតិ ដែលបានធ្វើដំណើរចេញចូលតាមច្រកទ្វារអាកាសយានដ្ឋានអន្តរជាតិតេជោ។

លោកឧត្តមសេនីយ៍ត្រី ក៏បានគូសរំលេចពីការណែនាំរបស់រដ្ឋមន្ត្រីក្រសួងមហាផ្ទៃ និងអគ្គនាយកដ្ឋានអន្តោប្រវេសន៍ ឱ្យកម្លាំងប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ត្រូវលើកកម្ពស់ការងារជំនាញចូលរួមទប់ស្កាត់បទល្មើសនានា រួមមានលិខិតឆ្លងដែនមិនប្រក្រតី ការរត់ពន្ធមនុស្ស និងករណីជួញដូរគ្រឿងញៀនជាដើម៕