ព្យុះទីហ្វុងទី២០ ឈ្មោះ ប៊ូឡូយ (Bualoi) កំពុងមានឥទ្ធិពល​លើខេត្តបន្ទាយមានជ័យ

ប្រព័ន្ធសម្ពាធទាប និងជ្រលងនៃព្យុះទីហ្វុងទី២០ ឈ្មោះ ប៊ូឡូយ (Bualoi T2520) បាននិងកំពុងមានឥទ្ធិពលមកលើខេត្តបន្ទាយមានជ័យ ដែលនឹងធ្វើឱ្យធាតុអាកាសមានពពកច្រើនដេរដាស មានភ្លៀងផ្គររន្ទះពីតិចទៅច្រើនខ្លាំង ក្នុងបរិមាណ ៨០% ខ្យល់កន្ត្រាក់បក់ក្នុងល្បឿនពី ៦ ទៅ ១០ម៉ែត្រ ក្នុងមួយវិនាទី និងមានសីតុណ្ហភាពពី ២៤°C ទៅ ២៩°C។ នេះបើតាមការប្រកាសរបស់មន្ទីរធនធានទឹក​ និងឧតុនិយមខេត្តបន្ទាយមានជ័យ នៅព្រឹកថ្ងៃទី២៦កញ្ញានេះ។

ជាមួយនឹងស្ថានភាពបែបនេះ មន្ទីរធនធានទឹក និងឧតុនិយមខេត្តបន្ទាយមានជ័យ ក៏បានណែនាំឲ្យប្រជាពលរដ្ឋត្រូវយកចិត្តទុកដាក់ និងប្រុងប្រយ័ត្នខ្ពស់ អំពីស្ថានភាពទឹកភ្លៀងច្រើន លើសកម្រិតធម្មតា ខ្យល់កន្ត្រាក់ និងអាចកើតមានបាតុភូតផ្គររន្ទះ ដើម្បីជៀសវាងពីគ្រោះថ្នាក់ផ្សេងៗ ដូចជា ជំនន់ទឹកភ្លៀង ដែលអាចកើតមានជាយថាហេតុ។

ជារួម បើតាមការប្រកាសរបស់ក្រសួងធនធានទឹក និងឧតុនិយម នៅព្រឹកថ្ងៃទី២៦ ខែកញ្ញា ឆ្នាំ២០២៥ដូចគ្នានេះដែរ ព្យុះទីហ្វុង ទី២០ ឈ្មោះ ប៊ូឡូយ (Bualoi T2520) បាននិងកំពុងដើរស្របនឹងគន្លងព្យុះទី១៨ ឈ្មោះ រ៉ាហ្គាសា (Ragasa) ខណៈព្យុះទី១៩ ឈ្មោះ នេហ្គោរី (Neoguri) បានបង្កើនឥទ្ធិពលខ្លាំងលើរបបខ្យល់មូសុងនិរតី ដែលបក់លើសមុទ្រអាដាមម៉ែន ឈូងសមុទ្រថៃ អាងទន្លេមេគង្គ សមុទ្រចិនខាងត្បូង និងលើព្រះរាជាណាចក្រកម្ពុជា។

តាមការប្រកាសរបស់ក្រសួងធនធានទឹក ស្ថានភាពបែបនេះ ចាប់ពីថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២៥ នឹងធ្វើឱ្យ តំបន់វាលទំនាប មានសីតុណ្ហភាពមធ្យមអប្បបរមា២២°C និងសីតុណ្ហភាពមធ្យមអតិបរមា៣១°C។ ខ្យល់បក់មកពីទិសបូព៌ និងទិសអាគ្នេយ៍មានល្បឿនមធ្យម៥ម៉ែត្រក្នុងមួយវិនាទី។ ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងភ្នំពេញ អាចមានភ្លៀងធ្លាក់ជាមួយផ្គររន្ទះនិងខ្យល់កន្ត្រាក់គ្របដណ្តប់លើផ្ទៃដី៦០%។

តំបន់ខ្ពង់រាប មានសីតុណ្ហភាពមធ្យមអប្បបរមា២១°C និងសីតុណ្ហភាពមធ្យមអតិបរមា២៩°C។ ខ្យល់បក់មកពីទិសបូព៌ និងទិសអាគ្នេយ៍មានល្បឿនមធ្យម៦ម៉ែត្រក្នុងមួយវិនាទី។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី៧០%។

តំបន់មាត់សមុទ្រ មានសីតុណ្ហភាពមធ្យមអប្បបរមា២១°C និងសីតុណ្ហភាពមធ្យមអតិបរមា៣០°C។ ខ្យល់បក់មកពីទិសនិរតី និងទិសអាគ្នេយ៍មានល្បឿនមធ្យម៥ម៉ែត្រក្នុងមួយវិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី៥០%។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ២,៥០ម៉ែត្រ៕