គណបក្សខ្មែររួបរួមជាតិ រៀបចំសមាជវិសាមញ្ញ ដើម្បីជ្រើសតាំងថ្នាក់ដឹកនាំបន្ថែម និងលើកទិសដៅបន្ត

នៅព្រឹកថ្ងៃទី២៥ ខែមករា ឆ្នាំ២០២២ នេះ គណបក្សខ្មែររួបរួមជាតិ បានរៀបចំសមាជវិសាមញ្ញគណបក្ស ដើម្បីអនុម័តរបៀបវារៈមួយចំនួន ដូចជា ជ្រើសតាំងថ្នាក់ដឹកនាំបន្ថែម និងលើកទិសដៅការងារបន្តទៅមុខទៀត។ សមាជវិសាមញ្ញនេះ ធ្វើឡើងក្រោមវត្តមានរបស់លោក​ ញឹក​ ប៊ុនឆៃ​ ប្រធានគណបក្ស លោក​ អ៊ុំ​ សុមន្ថា​ អនុប្រធាន និងថ្នាក់ដឹកនាំសំខាន់ៗមួយចំនួនទៀត។

សមាជវិសាមញ្ញនេះ ប្រព្រឹត្តទៅនៅទីស្នាក់ការកណ្តាលគណបក្សខ្មែររួបរួមជាតិ ដែលស្ថិតនៅ​តាមបណ្ដោយផ្លូវជាតិលេខ​ ៦A  ភូមិចំបក់មាស​ សង្កាត់បាក់ខែង​ ខណ្ឌជ្រោយចង្វារ​ ររាជធានីភ្នំពេញ ដោយមានអ្នកចូលរួមប្រមាណ៤០០ នាក់។

សមាជវិសាមញ្ញគណបក្សខ្មែររួបរួមជាតិ មានរបៀបវារៈចំនួន៥ រួមមាន ទី១. ការបោះឆ្នោតជ្រើសតាំងសមាជិកក្រុមប្រឹក្សាជាតិអាណត្តិទី២ ទី២.ពិនិត្យ និងអនុម័តការធ្វើវិសោធនកម្ម គោលនយោបាយ និងលក្ខន្តិកៈគណបក្ស។ ទី៣.ការបោះឆ្នោតជ្រើសតាំងប្រធានកិត្តិយស ទី៤. ការបោះឆ្នោតជ្រើសតាំងបន្ថែមអនុប្រធានគណបក្ស និងទី៥. លើកទិសដៅអនុវត្តភារកិច្ចសំខាន់ៗ ឆ្តោះទៅរកការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០២២៕

កោះកែវ