អតីតតំណាងរាស្ត្រអតីតបក្សប្រឆាំង៣រូប ក្លាយជាបេក្ខជនឈរឈ្មោះឲ្យបក្សលោក ញឹក ប៊ុនឆៃ

លោក យ៉ែម បុញ្ញឫទ្ធិ និងអតីតតំណាងរាស្ត្រអតីតគណបក្សប្រឆាំងចំនួន២រូបទៀត បានក្លាយជាបេក្ខជនឈរឈ្មោះពេញសិទ្ធិតំណាងឲ្យគណបក្សខ្មែរួបរួមជាតិរបស់លោក ញឹក ប៊ុនឆៃ សម្រាប់ការបោះឆ្នោតជ្រើសតាំងតំណាងរាស្រ្ត អាណត្តិទី៧ ឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមបញ្ជីបេក្ខជនឈរឈ្មោះផ្លូវការ គឺលោក​ យ៉ែម​ បុញ្ញឫទ្ធិ​ ដែលជាអតីតតំណាងរាស្ត្រខេត្តព្រៃវែង អាណត្តិទី៥​ នៃអតីតគណបក្សសង្គ្រោះជាតិ ​និងបច្ចុប្បន្នជាអនុប្រធានគណបក្សខ្មែររួបរួមជាតិ បានឈរឈ្មោះជាបេក្ខជនតំណាងរាស្ត្រពេញសិទ្ធិជាថ្មីម្ដងទៀតនៅមណ្ឌលខេត្តព្រៃវែង តំណាងឲ្យគណបក្សខ្មែររួបរួមជាតិ។

រីឯលោក​ ង៉ោ​ គឹមជាង​ អតីតតំណាងរាស្ត្រខេត្តកំពង់ឆ្នាំង​ នៃអតីតគណបក្សប្រឆាំងនេះ កាលពីអាណត្តិទី៥ បានក្លាយជាបេក្ខជនតំណាងរាស្ត្រពេញសិទ្ធិលេខរៀងទី១ មណ្ឌលខេត្តត្បូងឃ្មុំ​ និងអតីតតំណាងរាស្ត្រខេត្តព្រៃវែងមួយទៀត គឺលោក​ ទួត​ ឃឿត ឈរជាបេក្ខជនតំណាងរាស្ត្រពេញសិទ្ធិលេខរៀងទី២ មណ្ឌលខេត្តបាត់ដំបង នៃគណបក្សខ្មែររួបរួមជាតិ។

សម្រាប់ការបោះឆ្នោតជាតិ អាណត្តិទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខ គណបក្សខ្មែររួបរួមជាតិ បានដាក់បញ្ជីបេក្ខជនឈរឈ្មោះបោះឆ្នោតនៅមណ្ឌលទាំង ២៥រាជធានី-ខេត្ត ដែលមានបេក្ខជនសរុបចំនួន២៦៦នាក់ ខណៈលោក ញឹក ប៊ុនឆៃ ប្រធានគណបក្ស ឈរជាបេក្ខជនតំណាងរាស្ត្រលេខរៀងទី១ នៅមណ្ឌលខេត្តបន្ទាយមានជ័យ៕

ដោយ៖ ធឿន វ៉ាន់សុង