បក្សកម្លាំងជាតិ ចាត់ទុកបក្សភ្លើងទៀន កំពុងដើរលើផ្លូវនយោបាយផ្ដាច់ការ គំរាមកំហែងលើអង្គបោះឆ្នោត  

គណបក្សកម្លាំងជាតិ ចាត់ទុកគណបក្សភ្លើងទៀន កំពុងដើរលើផ្លូវនយោបាយផ្ដាច់ការ បង្ខិតបង្ខំ និងគំរាមកំហែងលើអង្គបោះឆ្នោត ដោយបានបោះបង់គោលការណ៍លទ្ធិប្រជាធិបតេយ្យ។ បក្សកម្លាំងជាតិ បានលាតត្រដាងនូវទង្វើផ្ដាច់ការរបស់បក្សភ្លើងទៀន ក្រោយបានបណ្ដេញអ្នកតស៊ូជាមួយបក្សនេះចេញពីសមាជិកក្រុមប្រឹក្សាឃុំ សង្កាត់ជាប់ឆ្នោត។

តាមរយៈសេចក្ដីថ្លែងការណ៍ នៅព្រឹកថ្ងៃទី២៩ ខែមករា ឆ្នាំ២០២៤នេះ គណបក្សកម្លាំងជាតិ លើកឡើងថា ថ្នាក់ដឹកនាំគណបក្សភ្លើងទៀន បានបោះបង់គោលការណ៍ប្រជាធិបតេយ្យ ហើយចាប់យកជម្រើសផ្តាច់ការ បង្ខិតបង្ខំ គំរាមកំហែង ដែលទង្វើទាំងនេះ បានលាតត្រដាងឱ្យមហាជនទូទៅបានឃើញ តាមរយៈការមិនគោរពឱ្យតម្លៃ និងការបណ្ដេញចេញអ្នកតស៊ូ អ្នកលះបង់ អ្នកស្មោះត្រង់នៅតាមមូលដ្ឋាន ជាពិសេសការប្រើអំណាចបង្ខំឱ្យសមាជិកក្រុមប្រឹក្សាឃុំ សង្កាត់ជាប់ឆ្នោត (អង្គបោះឆ្នោត) ដើម្បីទៅបោះឆ្នោតឱ្យគណបក្សមួយ ដោយរំលោភលើសិទ្ធិសម្រេចចិត្តជាសម្ងាត់របស់អង្គបោះឆ្នោត។

ជាមួយគ្នានេះ គណបក្សភ្លើងទៀន បានបណ្ដេញសមាជិកក្រុមប្រឹក្សាឃុំ សង្កាត់ជាប់ឆ្នោតចេញពីតួនាទីជាច្រើននាក់ នៅទូទាំងប្រទេស ខណៈដែលគណបក្សភ្លើងទៀន មិនមានឈ្មោះចូលរួមប្រកួតសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ផងនោះ។

បើតាមគណបក្សកម្លាំងជាតិ ទង្វើផ្តាច់ការជាក់ស្តែងមួយក្នុងចំណោមទង្វើផ្តាច់ការជាច្រើនរបស់ក្រុមមេដឹកនាំគណបក្សភ្លើងទៀន គឺការបណ្ដេញចេញសកម្មជនតស៊ូ លះបង់ ស្មោះត្រង់ នៅឃុំសំបូរ ស្រុកប្រាសាទសំបូរ ខេត្តកំពង់ធំ ចំនួន ៥រូប ពីតួនាទីសមាជិកក្រុមប្រឹក្សាឃុំជាប់ឆ្នោត។ គណបក្សកម្លាំងជាតិ ចាត់ទុកទង្វើផ្តាច់ការរបស់ក្រុមមេដឹកនាំគណបក្សភ្លើងទៀនពេលនេះ គឺបានបង្កភាពអយុត្តិធម៌ និងការឈឺចាប់យ៉ាងធ្ងន់ធ្ងរបំផុតដល់សមាជិកក្រុមប្រឹក្សាឃុំ សង្កាត់ជាប់ឆ្នោតនៅទូទាំងប្រទេស។

តាមរយៈសេចក្ដីថ្លែងការណ៍ដដែលនេះ គណបក្សកម្លាំងជាតិ ក៏បានអំពាវនាវដល់ក្រសួងមហាផ្ទៃ កុំទទួលចាត់ការនូវរាល់សំណុំឯកសារនៃការស្នើសុំផ្លាស់ប្តូរសមាជិកក្រុមប្រឹក្សាឃុំ សង្កាត់ ដែលស្នើឡើងដោយក្រុមមេដឹកនាំគណបក្សភ្លើងទៀន ពីព្រោះជាទង្វើរំលោភច្បាប់ រំលោភសិទ្ធិមនុស្ស រំលោភសិទ្ធិនយោបាយ និងរំលោភសិទ្ធិពលរដ្ឋម្ចាស់ឆ្នោត ដែលបានបោះឆ្នោតជ្រើសរើសតំណាងនៅថ្នាក់មូលដ្ឋានឃុំ សង្កាត់ កាលពីថ្ងៃទី៥ ខែមិថុនា ឆ្នាំ២០២២៕