ករណីលោក ស៊ុន ចន្ធី ត្រូវបានអ្នកនាំពាក្យក្រសួងយុត្តិធម៌ បញ្ជាក់ថា ជាការអនុវត្តច្បាប់ពាក់ព័ន្ធនឹងបទល្មើសញុះញង់

ឆ្លើយតបនឹងសេចក្ដីថ្លែងការណ៍របស់គណបក្សកម្លាំងជាតិ ជុំវិញករណីចាប់ខ្លួនប្រធានគណបក្សនេះ ត្រូវបានអ្នកនាំពាក្យក្រសួងយុត្តិធម៌ បញ្ជាក់ថា គឺជាការអនុវត្តច្បាប់សុទ្ធសាធ ហើយការចាប់ខ្លួននេះ គឺពាក់ព័ន្ធទៅនឹងបទល្មើសញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។

ប្រធានគណបក្សកម្លាំងជាតិ លោក ស៊ុន ចន្ធី ត្រូវបានកម្លាំងសមត្ថកិច្ចចាប់ឃាត់ខ្លួន នាម៉ោង៩ព្រឹក ថ្ងៃទី៩ ខែឧសភា ឆ្នាំ២០២៤ នៅអាកាសយានដ្ឋានអន្តរជាតិភ្នំពេញ បន្ទាប់ពីលោកវិលត្រឡប់ពីប្រទេសជប៉ុនចូលមកកម្ពុជាវិញ។ ចំពោះការចាប់ខ្លួនលោក ស៊ុន ចន្ធី ពេលនេះ ត្រូវបានគណបក្សកម្លាំងជាតិ សម្តែងការសោកស្តាយ និងថ្កោលទោសចំពោះការចាប់ខ្លួននេះ ហើយចាត់ទុកថា ជាការគំរាមកំហែង បំភិតបំភ័យ និងជាការធ្វើទុក្ខបុកម្ចីញផ្នែកនយោបាយយ៉ាងធ្ងន់ធ្ងរមក លើគណបក្សរបស់ខ្លួន និងធ្វើឱ្យប៉ះពាល់យ៉ាងធ្ងន់ធ្ងរដល់ដំណើរការលទ្ធិប្រជាធិបតេយ្យនៅកម្ពុជា។

ជាការឆ្លើយតបទៅនឹងសេចក្ដីថ្លែងការណ៍នេះ អ្នកនាំពាក្យក្រសួងយុត្តិធម៌ បានចេញមកបញ្ជាក់ថា ការចាប់ខ្លួនបុគ្គលឈ្មោះ ស៊ុន ចន្ធី គឺពាក់ព័ន្ធនឹងការញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ដែលបុគ្គលរូបនេះបានផ្សព្វ ផ្សាយព័ត៌មានលើបណ្តាញសង្គម ដោយបានទម្លាក់កំហុសដោយអសុទ្ធចិត្តទៅលើរាជរដ្ឋាភិបាលលើការចែកប័ណ្ណក្រីក្រជូនប្រជាពលរដ្ឋ ថា មានការលម្អៀង និងរើសអើង។ ព្រមជាមួយគ្នានេះ បុគ្គល ស៊ុន ចន្ធី បានមួលបង្កាច់អំពីការអភិវឌ្ឍប្រទេសរបស់រាជរដ្ឋាភិបាល ក្នុងចេតនាញុះញង់បំភ្លៃព័ត៌មាន នាំឱ្យប្រជាពលរដ្ឋមានការយល់ច្រឡំ ដែលបង្កភាពវឹកវរធ្ងន់ធ្ងរដល់សន្តិសុខសង្គម និងសណ្ដាប់ធ្នាប់សាធារណៈ។

អ្នកនាំពាក្យក្រសួងយុត្តិធម៌ បញ្ជាក់ដូច្នេះថា៖ «ការចាប់ខ្លួននេះត្រូវបានធ្វើឡើងតាមរយៈដីកាបញ្ជាឱ្យចូលខ្លួនរបស់អយ្យការអមសាលាដំបូងរាជធានីភ្នំពេញ ដែលជាការអនុវត្តច្បាប់ ស្របតាមក្រមនីតិវិធីព្រហ្មទណ្ឌ ហើយការចាប់ខ្លួននេះ គឺពាក់ព័ន្ធទៅនឹងអង្គហេតុនៃបទល្មើស ដែលមានចែងនៅក្នុងក្រមព្រហ្មទណ្ឌជាធរមាន។ ដូច្នេះ ការចាប់ខ្លួនឈ្មោះ ស៊ុន ចន្ទី គឺជាការអនុវត្តច្បាប់សុទ្ធសាធ ជាពិសេសគឺផ្អែកតាមក្រមព្រហ្មទណ្ឌ និងក្រមនីតិវិធីព្រហ្មទណ្ឌនៃកម្ពុជា»។

ការចេញសេចក្ដីថ្លែងការណ៍របស់គណបក្សកម្លាំងជាតិ ដោយប្រើពាក្យ «ថ្កោលទោស» ចំពោះការអនុវត្តច្បាប់ដោយស្ថាប័នមានសមត្ថកិច្ចបែបនេះ ត្រូវបានអ្នកនាំពាក្យ ឆ្លើយតបថា គឺជាការមិនត្រឹមត្រូវ និងមិនអាចទទួលយកបានឡើយ ហើយតម្រូវឱ្យគណបក្សនេះ គប្បីពិនិត្យពិចារណាឡើងវិញក្នុងការប្រើប្រាស់ពាក្យពេចន៍ឱ្យបានសមស្រប ដើម្បីធានាបាននូវធម្មានុរូបភាពជាតួអង្គនយោបាយមួយ ដែលគោរពច្បាប់នៅក្នុងសង្គមនីតិរដ្ឋ៕