លោក ហៃ វណ្ណា លោក សំ សុគង់ និងអតីតសមា​ជិកបក្សប្រឆាំង១៧រូបទៀត បានក្លាយជាទីប្រឹក្សា និងជំនួយការសម្តេចតេជោ

អតីតមេដឹកនាំចលនាប្រឆាំងរាជរដ្ឋាភិបាល និងអតីតសមាជិករបស់គណបក្សប្រឆាំងចំនួន១៩រូបដែលបានចូលរួមជីវភាពនយោបាយជាមួយគណបក្សកាន់អំណាច ត្រូវបានតែងតាំងជាទីប្រឹក្សា និងជាជំនួយការសម្តេចតេជោ ហ៊ុន សែន ប្រធានគណបក្សប្រជាជនកម្ពុជា។ ក្នុងនោះ លោក ហៃ វណ្ណា អតីតប្រធានចលនាយុវជនគណបក្សប្រឆាំងប្រចាំប្រទេសជប៉ុន និងលោក សំ​ សុគង់ អតីតមេធាវីការពារក្តីឱ្យលោក សម រង្ស៊ី និងបក្ខពួក ត្រូវបានតែងតាំងជាទីប្រឹក្សាសម្តេចតេជោ ហ៊ុន សែន។

ចំណែក អតីតមេដឹកនាំចលនាប្រឆាំងរាជរដ្ឋាភិបាល និងអតីតសមាជិករបស់គណបក្សប្រឆាំងចំនួន១៧រូបទៀត រួមមាន គឺលោក គង់ ហ៊ុនធារិទ្ធ លោក ខៃ រដ្ឋា លោក សាយ រើន លោក ឯក បេន លោក ថៃ សុផាត លោក ស៊ឹម វ៉ាន់នី លោក សារ៉ូ សុវុឌ្ឍិ លោក លី ពិសុល លោក ចាន់ ដានិត លោក ពៅ ប៊ុនលាភ លោក ឡេង បូរ៉ា លោក ភូ គង់ លោក សឿន សុផាន់ និងលោក ផល ប៉ីភិ ត្រូវបានតែងតាំងជាទីប្រឹក្សារបស់សម្តេចតេជោ ប្រធានគណបក្សប្រជាជនកម្ពុជា។ ដោយឡែក លោក ឈួន បូរី លោក ប៉ាវ សារុន និងលោក ភួង ថា ត្រូវតែងតាំងជាជំនួយការសម្តេចតេជោ ហ៊ុន សែន។ នេះបើយោងតាមសេចក្តីសម្រេចស្តីពី ការតែងតាំងមន្រ្តីគណបក្សកាលពីថ្ងៃទី០៦ ខែធ្នូ តែទើបផ្សព្វផ្សាយឱ្យដឹងជាសាធារណៈនៅថ្ងៃទី០៩ ខែធ្នូ ឆ្នាំ២០២៤។

ក្រុមការងារចលនាកសាងសមាជិកគណបក្សនៅមូលដ្ឋានរាជធានី-ខេត្តរបស់គណបក្សប្រជាជនកម្ពុជា បានអះអាងឱ្យដឹងនៅលើទំព័រហ្វេសប៊ុករបស់ខ្លួនថា ការផ្តល់តួនាទីជាទីប្រឹក្សា និងជំនួយការនេះ គឺបានបង្ហាញឱ្យឃើញ​ច្បាស់នូវការផ្តល់ឱកាសរបស់សម្តេចតេជោ ហ៊ុន សែន ជូនដល់​អតីតថ្នាក់​ដឹកនាំប្រឆាំង បានរួមចំណែកក្នុងកិច្ចការនានា។ ក្រុមការងារចលនាកសាងសមាជិកគណ​បក្សនៅមូលដ្ឋានរាជធានី-ខេត្ត បានអះអាងទៀតថា តាមរយៈនយោបាយមិន​យកនរណាធ្វើជាសត្រូវ ហើយតែងឱបក្រសោបបែបនេះហើយ ដែលនាំឱ្យគណបក្សប្រជាជនកម្ពុជា ក្លាយទៅជាគណបក្សនយោបាយរឹងមាំ និងធំជាងគេនៅកម្ពុជា។

គួរកត់សម្គាល់ថា មុនត្រូវបានតែងតាំងជាទីប្រឹក្សា និងជាជំនួយការរបស់សម្តេចតេជោ ប្រធានគណបក្សប្រជាជនកម្ពុជា​នាពេលនេះ អតីតថ្នាក់​ដឹកនាំ និងជាសមាជិកគណបក្សប្រឆាំងទាំង១៩នាក់ សុទ្ធតែបានស្នើសុំចូលរួមជីវភាពនយោ​បាយ​ជាមួយគណបក្សប្រជាជនកម្ពុជា។ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា តែងតែផ្តល់ក្តីសណ្តោសដល់ពួកគេឱ្យមករួមរស់ជាមួយ និងបានផ្តល់ឱកាសផ្សេងៗ ដើម្បីឱ្យចូលរួមក្នុងការកសាងប្រទេសជាតិ មិនថា ជាទីប្រឹក្សា ជាជំនួយការ ឬកាន់មុខងារដទៃៗទៀតឡើយ។ អ្វីដែលសម្តេចតេជោ ហ៊ុន សែន ក៏ដូចជា សម្តេចធិបតី ហ៊ុន ម៉ាណែត នាយករដ្ឋមន្រ្តី ចង់ឃើញ និងចង់បាន គឺការរួបរួមគ្នា សាមគ្គីគ្នា ឯកភាពជាតិ ដោយមិនយកខ្មែរណាជាសត្រូវ ហើយរួមគ្នាកសាងប្រទេសជាតិ ថែរក្សាការពារសន្តិភាព និងការអភិវឌ្ឍឱ្យបានដល់កូនខ្មែរជំនាន់ក្រោយ៕

ដោយ៖ វណ្ណ សុគន្ធា