សន្តិសុខសង្គម

អាវុធហត្ថរាជធានីភ្នំពេញ ឆ្មក់បង្ក្រាបម្ចាស់ទីតាំងចែកចាយបារីអេឡិចត្រូនិក ២ នាក់ ដកហូតបារីជាង ២ ពាន់ដើម

បានផុស

៦ ខែ មុន

នៅ

ថ្ងៃអាទិត្យ ១១ មករា ២០២៦

ដោយ

ចាប់ខ្លួនម្ចាស់ទីតាំង ២ នាក់ បន្ទាប់ពីកម្លាំងអាវុធហត្ថឆ្មក់បង្ក្រាប និងត្រួតពិនិត្យរកឃើញបារីអេឡិចត្រូនិកខុសច្បាប់ជាង ២ ពាន់ដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរង្វង់ប្រតិបត្តិការបង្ក្រាបនេះបានធ្វើឡើងកាលពីថ្ងៃទី ៩ ខែមករា ឆ្នាំ ២០២៦ ថ្មីៗ នេះ ស្ថិតនៅទីតាំង ១ កន្លែង ចំណុចផ្ទះគ្មានលេខ ភូមិ ១០ សង្កាត់បឹងកក់ទី ២ ខណ្ឌទួលគោក រាជធានីភ្នំពេញ។

កម្លាំងជំនាញ បានឲ្យដឹងថា កងរាជអាវុធហត្ថរាជធានីភ្នំពេញ សហការជាមួយកម្លាំងមូលដ្ឋានអាវុធហត្ថខណ្ឌទួលគោក និងមានការសម្របសម្រួលនីតិវិធីពីលោក ស៊ីន រក្សា ព្រះរាជអាជ្ញារងអមសាលាដំបូងរាជធានីភ្នំពេញ បានចុះបង្ក្រាបទីតាំងលក់ចែកចាយបារីអេឡិចត្រូនិក (Vape) ១ កន្លែង នៅចំណុចផ្ទះគ្មានលេខ ភូមិ ១០ សង្កាត់បឹងកក់ទី ២ ខណ្ឌទួលគោក រាជធានីភ្នំពេញ ដោយចាប់យកឧបករណ៍អេឡិចត្រូនិកសម្រាប់ជក់សារធាតុគីមី ជាង ២ ពាន់ រួមមាន ៖ បារីអេឡិចត្រូនិក(ម៉ាស៊ីន) ចំនួន ៧៦៩ ដើម និងក្បាលជក់ ចំនួន ១,៩៣០ រួមទាំងម្ចាស់ទីតាំងចំនួន ២ នាក់ ផងដែរ។

បច្ចុប្បន្ន កម្លាំងកងរាជអាវុធហត្ថ បានបញ្ជូនម្ចាស់ទីតាំងចំនួន ២ នាក់ ព្រមទាំងវត្ថុតាងទៅបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការតាមនីតិវិធីច្បាប់។

គួរបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានចេញបទបញ្ជាស្តីពីការដាក់ចេញវិធានការហាមឃាត់ការនាំចូល ការចែកចាយ ការផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុក ឧបករណ៍អេឡិចត្រូនិក និងសារធាតុគីមីសម្រាប់ជក់ និងស៊ីស្សា គ្រប់ប្រភេទ ក្នុងគោលបំណងទប់ស្កាត់ បង្ការ ដោះស្រាយបញ្ហាឲ្យបានទាន់ពេលវេលា និងដើម្បីរក្សាសណ្ដាប់ធ្នាប់សង្គម ការពារសុខភាពសាធារណៈ ជាពិសេសសុខភាពរបស់អ្នកសិក្សា និងបុគ្គលិកអប់រំ៕

អត្ថបទ ៖ រដ្ឋា