បង្ក្រាបទីតាំងឆបោកតាមប្រព័ន្ធបច្ចេកវិទ្យា ឃាត់ខ្លួនជនបរទេស ១០៤ នាក់ នៅអគារ A និង អគារ B នៃមជ្ឈមណ្ឌលព្រីសន៍ផ្លាហ្សា ក្នុងខណ្ឌចំការមន

កាលពីថ្ងៃទី ១៦ ខែឧសភា ឆ្នាំ ២០២៦ កម្លាំងគណៈបញ្ជាការឯកភាពរាជធានីភ្នំពេញ បន្តប្រតិបត្តិការចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (Online Scams) នៅខុនដូរ អគារ A និង អគារ B នៃមជ្ឈមណ្ឌល ព្រីសន៍ផ្លាហ្សា មហាវិថីព្រះនរោត្តម ក្បែរស្ពានអាកាសក្បាលថ្នល់ ក្នុងខណ្ឌចំការមន រាជធានីភ្នំពេញ ដោយឃាត់បានជនបរទេសចំនួន ១០៤ នាក់។

ប្រតិបត្តិការនេះ ធ្វើឡើងក្រោមការដឹកនាំបញ្ជាផ្ទាល់ដោយ លោក ឃួង ស្រេង អភិបាលរាជធានីភ្នំពេញ និង លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដឹកនាំអនុវត្តការបង្ក្រាបផ្ទាល់ដោយលោកឧត្តមសេនីយ៍ទោ ប៊ុន សុសិក្ខា ដោយបានការសម្របសម្រួលផ្លូវច្បាប់ពី លោក សេង ហៀង ព្រះរាជអាជ្ញារង ត្រួតពិនិត្យទីតាំងសង្ស័យមានលួចលាក់ប្រព្រឹត្តបទល្មើសបង្ខាំងមនុស្សខុសច្បាប់។

ជាលទ្ធផល នៃប្រតិបត្តិការបង្ក្រាប កម្លាំងសមត្ថកិច្ចត្រួតពិនិត្យជាក់ស្តែងទីតាំងខាងលើនេះឃាត់ខ្លួនជនបរទេសសរុបចំនួន ១០៤ នាក់ (ស្រី ៧ នាក់) មាន ៦ សញ្ជាតិ ដូចខាងក្រោម ៖ ទី១.ជនបរទេសសរុបចំនួន ៨៣ នាក់ (ស្រី ៥ នាក់) មាន ២ សញ្ជាតិ (ពាក់ព័ន្ធបទល្មើសឆបោកតាមប្រព័ន្ធអនឡាញ Online Scams) រួមមាន ៖ ជនជាតិចិនចំនួន ៨២ នាក់ (ស្រី ៤ នាក់) និង ជនជាតិវៀតណាមចំនួន ១ នាក់ (ស្រី)។ និង ទី២.ជនបរទេសសរុបចំនួន ២១ នាក់ (ស្រី ២ នាក់) មាន ៥ សញ្ជាតិ (ពាក់ព័ន្ធការស្នាក់នៅខុសច្បាប់)។

សម្ភារៈវត្ថុតាងសរុបរួមមាន ៖ កុំព្យូទ័រលើតុ (All In One) ចំនួន ៧៧ គ្រឿង , កុំព្យូទ័រយួរដៃ (LAPTOP) ចំនួន ៣៦ គ្រឿង , IPAD ចំនួន ៥ គ្រឿង , ម៉ូនីទ័រ (MONITOR) ចំនួន ៤ គ្រឿង , ទូរស័ព្ទដៃ ចំនួន ៨០០ គ្រឿង
និង ធុង CPU ចំនួន ៦ គ្រឿង។

បច្ចុប្បន្នចំពោះជនបរទេសចំនួន ១០៤ នាក់ និង សម្ភារៈវត្ថុតាង ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធី៕
អត្ថបទ ៖ សុភា