ឃាតកម្ម​មួយ​គ្រួសារ​ ស្លាប់​ ៣ ​បាត់​ខ្លួន​ ២ នាក់​ កុមារ​ម្នាក់​រួចជីវិត​សមត្ថកិច្ច​កំពុង​ស្រាវជ្រាវ​

សមត្ថកិច្ចជំនាញ ខេត្តមណ្ឌលគិរី កំពុងបើកការស៊ើបអង្កេត លើករណីឃាតកម្មមួយគ្រួសារដែលបានសម្លាប់មនុស្ស ៣ នាក់ និងបាត់ខ្លួន២នាក់ ខណៈកុមារម្នាក់ត្រូវបានជួយសង្គ្រោះរួចជីវិត។

ករណីឃាតកម្ម ក្នុងគ្រួសារមួយនៅក្នុងទឹកដី នៃ ខេត្ត មណ្ឌលគីរី បានកើតឡើង នៅថ្ងៃទី ១ ខែកុម្ភៈ ឆ្នាំ ២០២២ នៅចំណុច ស្រែចោល ក្នុងភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី ។

ជនរងគ្រោះដែលស្លាប់ ជាជនជាតិព្នង ទី១ មានឈ្មោះ ម៉ូត ក្រាក់ ភេទប្រុស អាយុ ៤៥ ឆ្នាំ ទី២ មានឈ្មោះ ក្រាក់ លី ភេទប្រុស អាយុ ១៥ ឆ្នាំ ទី៣ ឈ្មោះ នួន សំអាត ភេទប្រុស អាយុ ១៥ ឆ្នាំ អ្នកទាំង ៣ ស្លាប់បាត់បង់ជីវិត និងទី ៤ ឈ្មោះ ក្រាក់ ស្ល៊ី ភេទ ប្រុស អាយុ ១២ ឆ្នាំ របួសធ្ងន់ ទី៥ ឈ្មោះ និច ស្រី ភេទស្រី អាយុ ៤១ ឆ្នាំ បាត់ខ្លួន និងទី ៦ ឈ្មោះ ក្រាក់ នី ភេទ ប្រុស អាយុ ០៥ ឆ្នាំ បាត់ខ្លួន។

ជនរងគ្រោះ ឈ្មោះ ម៉ូត ក្រាក់ ត្រូវ ជនល្មើស បាញ់ ត្រូវ ០១ គ្រាប់ ចំក្បាលខាងក្រោយ ធ្លា យមក ចំ ភ្នែក ខាងឆ្វេង បណ្តាលឲ្យស្លាប់ នៅនឹងកន្លែង

រីឯ ជនរងគ្រោះ ០២ នាក់ ទៀត ត្រូវបាន ជនល្មើសវាយ និងវត្ថុរឹង ចំផ្នែកខាងក្រោយ នៃក្បាល បណ្តាលអោយ ស្លាប់ ភ្លាមៗ រីឯ កុមារ ម្នាក់ទៀតរងរបួស ធ្ងន់។

សមត្ថកិច្ច នៅមិនទាន់អាចបញ្ជាក់បាននៅឡើយទេ ដោយកំពុងតែ មមាញឹក ធ្វើការ ស្រាវជ្រាវ កំណត់ មុខសញ្ញា ជនដៃដល់។ ប៉ុន្តែបើផ្អែកតាមការស្រាវជ្រាវជំហានដំបូង គេបានដាក់ ការសង្ស័យករណីនេះកើតឡើង ដោយសារគំនុំ៕

អត្ថបទ៖ ឦសាន