នារីបុគ្គលិកខារ៉ាអូខេ​ចងកសម្លាប់ខ្លួន​មិនទាន់ដឹងមូលហេតុ

ហេតុការណ៍នេះបង្ករឱ្យមានការភ្ញាក់ផ្អើលនៅវេលាម៉ោង ១៩ និង៤០នាទីល្ងាច ថ្ងៃទី២៨ ខែមិថុនា ឆ្នាំ២០២២ នៅចំណុចផ្ទះជួល ភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។

លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់ឱ្យដឹងថា ​ជនរងគ្រោះឈ្មោះ ព្រុំ រ៉ា ហៅ យ៉ា អាយុ២៩ឆ្នាំ មុខរបរបុគ្គលិកខារ៉ាអូខេស្នាក់នៅ ភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។

សាក្សីរស់នៅជិតកន្លែង​កើតហេតុឱ្យដឹងថា នៅថ្ងៃទី២៨ ខែមិថុនា ឆ្នាំ២០២២ វេលាម៉ោង ១៩៖០០ ខ្លួនមានការសង្ស័យមិនឃើញជនរងគ្រោះចេញទៅធ្វើការដូចរាល់ម្តង ក៏បាន​ដើរចេញ​ពីបន្ទប់សំដៅទៅរកបន្ទប់ជនរងគ្រោះ ដោយគិតក្នុងចិត្តថាកូនហ្នឹងបើឈឺល្មមៗ​ដើរចេញ​ទៅធ្វើការហើយនេះប្រហែលឈឺធ្ងន់ហើយមើលទៅទើបមិនឃើញចេញពីបន្ទប់​សោះ ក៏លូកដៃ​ទៅប៉ះទ្វារបន្ទប់ដោយពុំបានដាក់គន្លឹះពីខាងក្នុងទេ ក៏ក្រឡេកមើលទៅខាងកន្លែងដេក មិនឃើញ​ជនរងគ្រោះ ហើយក៏រុញទ្វារឱ្យបើកធំ ស្រាប់តែឃើញជនរងគ្រោះចងក និងក្រម៉ា ជាប់និងស្នួល​វាំងនន ធ្វើអំពីដែកអ៊ីណុក ហើយក៏បានស្រែកយ៉ាងខ្លាំងហៅឱ្យគេជួយ តែជនរងគ្រោះបានស្លាប់ទៅហើយ៕

អត្ថបទ៖ ឆៃ យ៉ា