ក្រុមជនសងស្ស័យចំនួន៧នាក់ ដែលធ្វើសកម្មភាពធាក់ប្លន់ម៉ូតូជនរងគ្រោះកាលពីថ្ងៃទី​៣០ ខែមិថុនា កន្លងទៅ ត្រូវបានកម្លាំងនគរបាលនៃអធិការដ្ឋាននគរបាលខណ្ឌឬស្សី ស្រាវជ្រាវ​ចាប់ខ្លួនបានហើយកាលពីវេលាម៉ោង០៣ទៀបភ្លឺ ថ្ងៃទី​១២ ខែកក្កដា ឆ្នាំ២០២២ នេះ នៅចំណុចផ្លូវលេខ៥៨៩​ ក្រុម៤​ ភូមិ៤​ សង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំ​ពេញ។

សមត្ថកិច្ចបានឲ្យដឹងថា ក្នុងប្រតិបត្តិការបង្ក្រាបក្រុមជនសង្ស័យទាំងនេះ​ កម្លាំងបានដក​ហូតវត្ថុតាងម៉ូតូចំនួន៣គ្រឿង ម៉ាកហុងដា សេ១២៥ ​ពណ៌ខ្មៅ ស្លាកលេខរតនគិរី1F-3460 និងម៉ូតូម៉ាកNIC ពណ៌ស ស្លាកលេខ ភ្នំពេញ 1HC-4064 ។ ចំណែកម៉ូតូជនរងគ្រោះ​ម៉ាក​ហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1JA-2890។

សមត្ថកិច្ចបញ្ជាក់ថា ជនរងគ្រោះមានឈ្មោះ យូ រួន ភេទប្រុស អាយុ៤៩ឆ្នាំ មុខរបរជាង​សំណង់ ស្នាក់នៅផ្ទះលេខ​១១៩សេ ផ្លូវបេតុង ក្រុម២៧ ភូមិ២ សង្កាត់ស្រះចក ខណ្ឌដូន​ពេញ។

គួររំលឹកថា កាលពីវេលាម៉ោង០២និង៥៥នាទីរំលងអធ្រាត្រ ថ្ងៃទី៣០​ ខែមិថុនា ឆ្នាំ២០២២ ចំណុចក្បែរហ្រេ្គនភ្នំពេញ ផ្លូវលេខ១៣០០​ ក្រុម៤​ ភូមិ៤​ សង្កាត់ច្រាំងចំរេះទី១ ​ខណ្ឌឫស្សីកែវ ក្រុមជនសង្ស័យបានធ្វើសកម្មភាពធាក់ផ្ដួលម៉ូតូ និងព្រួតវាយជនរងគ្រោះប្លន់​យកម៉ូតូបានសម្រចរួចនាំគ្នាជិះគេចខ្លួនបាត់អស់។

ទោះបីយ៉ាងណា ក្រុមជនសង្ស័យត្រូវបានឃាត់ខ្លួនបានហើយ និងកំពុងសួរនាំនៅ​អធិការ​ដ្ឋាន​​នគរ​បាល​ខណ្ឌឫស្សីកែវ ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញ​ ចាត់ការតាម​នីតិវិធីច្បាប់៕

អត្ថបទ៖ សុខុម