សន្តិសុខសង្គម

ប្រជាកសិករម្នាក់ ប្រទះឃើញយុទ្ធភណ្ឌមិនទាន់ផ្ទុះ ៨ គ្រាប់នៅដំបូកស្រែ

បានផុស

៤ years មុន

នៅ

ថ្ងៃចន្ទ ១៨ កក្កដា ២០២២

ដោយ

ប្រជាកសិករវ័យចំណាស់ម្នាក់ បានរត់ទៅប៉ុស្តិ៍ប៉ូលិសទាំងភិតភ័យ ខណៈកាប់ដីដំបូកប៉ះចំយុទ្ធភណ្ឌជាច្រើនគ្រាប់ ដែលមានប្រភេទផ្សេងៗពីគ្នាកប់នៅក្នុងដំបូកស្រែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចថា ហេតុការខាងលើ បានកើតឡើងកាលពីថ្ងៃទី ១៧ ខែកក្កដា ឆ្នាំ ២០២២នេះ វេលាម៉ោង ០១ និង ០០ នាទី កម្លាំងនគរបាលស្រុកបវេល បានទទួលសេចក្តីរាយការណ៍ពីកសិករម្នាក់ថា គាត់បានប្រទះឃើញគ្រាប់យុទ្ធភណ្ឌជាច្រើនគ្រាប់នៅនឹងដំបូកស្រែរបស់គាត់ ហើយកម្លាំងជំនាញក៏បានចុះទៅដល់ទីតាំងភ្លាមៗដើម្បីត្រួតពិនិត្យ នឹងនាំយកមករក្សាទុកហើយរាយការណ៍ជូនអង្គភាពស៊ីម៉ាក់យកទៅកម្ទេចចោល។

សមត្ថកិច្ចបន្តថា ប្រជាពលរដ្ឋដែលជាម្ចាស់ស្រែមាន ឈ្មោះ សឿន សាន ភេទប្រុស អាយុ ៥៣ ឆ្នាំ រស់នៅភូមិបួរសង្គ្រាច ឃុំឃ្លាំងមាស ស្រុកបវេល ខេត្តបាត់ដំបង ដែលជាចំណុចនិងទីតាំងកើតហេតុខាងលើ ខណៈដែលគាត់បានកាប់កាយដីដំបូក ក្នុងស្រែហើយក៏ប្រទះឃើញគ្រាប់ចំនួន០៨ គ្រាប់ទើបមករាយការណ៍តែម្តង។

សមត្ថកិច្ចបញ្ជាក់ថា គ្រាប់ទាំងនោះរួមមាន÷ គ្រាប់បេ ៤០ ចំនួន ០១ គ្រាប់,គ្រាប់ បេ ៤១ ចំនួន ០២ គ្រាប់,គ្រាប់ឡង់ ចំនួន ០១ គ្រាប់,គ្រាប់ ៦០ ចំនួន ០១ គ្រាប់, គ្រាប់ ៨០ ចំនួន ០២ គ្រាប់,ម៉ីន ៦៩ ចំនួន០១ គ្រាប់ ផង។ ក្រោយសមត្ថកិច្ចពិនិត្យ ដល់ទីតាំងបានឃើញគ្រាប់ទាំងនោះហើយធ្វើការសន្និដ្ឋានថា គ្រាប់យុទ្ធភណ្ឌទាំងអស់ខាងលើនៅមានគុណភាពនៅឡើយ ហើយក៏បានសហការជាមួយមន្ត្រីស៊ីម៉ាក់ ដើម្បីប្រគល់ឲ្យយកទៅកម្ទេចចោលតាមជំនាញបច្ចេកទេសនៅពេលក្រោយ៕

អត្ថបទ៖ សៅ សារិទ្ធ