ស្នងការខេត្តបន្ទាយមានជ័យ ដាក់បញ្ជាឲ្យកម្លាំងត្រូវបង្ក្រាបការចែកចាយ និង​អ្នកជក់បារីអេឡិចត្រូនិក

ព្រឹកថ្ងៃទី២២ ខែសីហា ឆ្នាំ២០២២នេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ចេញ​នូវបទ​បញ្ជាយ៉ាងម៉ឺងម៉ាត់ដល់នគរបាលទូទាំងខេត្តបន្ទាយមានជ័យ ទាំងអស់ត្រូវធ្វើការទប់ស្កាត់ និងបង្ក្រាបរាល់សកម្មភាពជួញដូរលក់ចែក​ចាយ និងអ្នកប្រើប្រាស់បារីអេឡិចត្រូនិក ( Cigarettes Electronic ) អ្នកទាំងអស់នេះត្រូវ​កសាងសំណុំរឿងចាត់ការតាមផ្លូវច្បាប់ដោយ​មិនអាច​​អត់អោនឲ្យបាន។

ការដាក់ចេញបទបញ្ជានេះ ក្នុងឱកាសដែលលោកឧត្តមសេនីយ៍ទោ សិទ្ធិ ឡោះ ក្នុងកិច្ចប្រជុំបូកសរុបសភាពការណ៍ និង​លទ្ធផលកិច្ច​ប្រតិបត្តិការប្រចាំឆមាសទី១ ឆ្នាំ២០២២ និងលើកទិសដៅបន្តសម្រាប់ឆមាសបន្ទាប់ នៅស្នងការដ្ឋាននគរបាលខេត្តបន្ទាយមានជ័យ។

ក្នុងកិច្ចប្រជុំនោះលោកឧត្តមសេនីយ៍ទោ សិទ្ធិ ឡោះ បានឲ្យនគរបាលក្នុងខេត្តទាំងអស់ត្រូវចាត់វិធានការលុបបំបាត់ និងធ្វើការទប់ស្កាត់ និងបង្ក្រាបរាល់ការលក់ចែកចាយបារីអេឡិចត្រូនិកធ្វើការទប់ស្កាត់រាល់រូបភាពដែលក្រុមយុវវ័យជក់បារីអេឡិចត្រូនិកនេះនៅតាមសាលារៀន ទីសាធារណៈ តាមផ្ទះសំណាក់ នៅតាមសហគមន៍ជាដើម ព្រោះបារីអេឡិចត្រូនិកនេះវាជាសារធាតុញៀនដូចថ្នាំញៀនដែរ​វាបំផ្លាញក្រុម​យុវវ័យខ្លាំងណាស់បច្ចុប្បន្នទៅអនាគត់ក្នុងនោះអាចបង្កអសន្តិសុខដល់សង្គមទៀផង។

ទន្ទឹមនោះដែរលោក សិទ្ធិ ឡោះ បានបញ្ជាឲ្យកម្លាំងនគរបាលទូទាំងខេត្ត កម្លាំងនគរបាលស្រុក-ក្រុង និងនគរបាលប៉ុស្តិ៍រដ្ឋបាលត្រូវត្រៀម​កម្លាំង២៤ម៉ោងលើ២៤ម៉ោង សម្រាប់មើលសភាពការណ៍ និងទប់ស្កាត់រាល់បទល្មើសទាំងឡាយក្នុងសហគមន៍ឲ្យបានទាន់ពេលវេលា​ដែល​មាន​ដូចជា បទល្មើសលួច ឆក់ ប្លន់ ក្មេងទំនើង និងគ្រោះអគ្គិភ័យផ្សេងៗជាដើម។

លោកឧត្តមសេនីយ៍ទោ សិទ្ធិ ឡោះ បានអំពាវនាវកម្លាំងនគរបាលទាំងអស់ត្រូវបន្តចុះអប់រំផ្សព្វផ្សាយគោល​នយោបាលភូមិឃុំមាន​សុវត្ថិភាព​​ដូចជា ១/ផលប៉ះពាល់នៃគ្រឿងញៀន ២/ផ្សព្វផ្សាយអំពីច្បាប់ចរាចរណ៍ដល់ពលរដ្ឋនៅតាមសហគមន៍ឲ្យបានទូលំទូលាយ ដើម្បីឲ្យពលរដ្ឋយល់ដឹង ហើយក៏ជាសកម្មភាពរួមគ្នាកាត់បន្ថយបទល្មើសផ្សេងៗផងដែរ។ ក្រៅពីនេះកម្លាំងនគរបាលត្រូវរួមគ្នាជួយធ្វើការងារ​សង្គម ដូចជាដឹកដៃក្មេងៗសិស្សសាលាឆ្លងផ្លូវពេលចូលរៀន និងចេញពីសាលារៀន ដើម្បីកាត់បន្ថយអត្រាគ្រោះថ្នាក់ចរាចរណ៍ទៀតផង៕

អត្ថបទ ៖ វ៉ាន់ ណាង