​បិទសាលារៀន​ ៣ ​នៅខណ្ឌឫស្សីកែវដោយសារ​ទឹកភ្លៀងលិច

​សាលារៀនចំនួន ៣ នៅក្នុងខណ្ឌឯស្សីកែវ ត្រូវបានបិទទ្វារផ្អាកការសិក្សានៅថ្ងៃទី ១៣ ខែ​កញ្ញា​នេះ ដោយសារស្ថានភាពទឹកភ្លៀងលិចផ្លូវ និងហូរចូលបរិវេណសាលារៀន។

សាលារៀន​ទាំងនោះ​រួមាន​វិទ្យាល័យ ជា ស៊ីមចំរើនរ័ត្ន វិទ្យាល័យឫស្សីកែវ និងសាលាបឋមសិក្សាឫស្សីកែវ​នៅក្នុង​ខណ្ឌ​ឬស្សីកែវ។

លោក សុត សេដ្ឋា ប្រធានស្ដីទី ការិយាល័យអប់រំ យុវជន និងកីឡា ប្រាប់ថា ការសម្រេចពីនាយក​គ្រប់គ្រងក្នុងការបិទសាលារៀនខាងលើដោយសារ ក្មេងបឋមសិក្សានៅតូច ខណៈផ្លូវដែលលិច​មានស្ថាន​ភាពរអិល ខ្លាចរអិលដួលលង់ ដូច្នេះ!ទើបថ្នាក់ដឹកនាំសាលាសម្រេចបិទតែម្ដងដោយ​សារការព្រួយ​បារម្ភពីសុវត្ថិភាព​របស់​ក្មេង។

ទោះជាយ៉ាងណា លោក សុត សេដ្ឋា បញ្ជាក់ថា ស្ថានភាពទឹកលិចនេះ​មិនយូរនោះទេ ត្រឹមតែមួយថ្ងៃប៉ុណ្ណោះ ស្អែកឡើងវិលមករកសភាពធម្មតាវិញហើយ៕