ចាប់ខ្លួនក្រុមចោរលួចក្របី២នាក់ ខណៈលួចក្របីអ្នកស្រុក៤ក្បាលឡើងរថយន្ដ

ជនសង្ស័យលួចក្របីអ្នកស្រុកចំនួន២នាក់ ត្រូវបានកម្លាំងនគរបាលស្រុកទឹកផុស ខេត្តកំពង់ឆ្នាំង ធ្វើការឃាត់ខ្លួនបាន ខណៈកំពុងដឹកក្របីអ្នកស្រុកចំនួន៤ក្បាលឡើងរថយន្ដ។

ករណីឃាត់ខ្លួនក្រុមជនសង្ស័យនេះ បានធ្វើឡើងកាលពីវេលាម៉ោង០១និង៣០នាទីរំលងអាធ្រាត្រ ឈានថ្ងៃទី៤ ខែវិច្ឆិកា ឆ្នាំ២០២២ នៅចំនុចព្រែកជីក ស្ថិតក្នុងភូមិអញ្ចាញ ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង ។

យោងតាមរបាយការណ៍របស់អគ្គស្នងការដ្ឋាននគរបាលជាតិ បានឲ្យដឹងថា ជនសង្ស័យចំនួន០២នាក់ ១-ឈ្មោះ ម៉េន បាវ ភេទប្រុស អាយុ៣១ឆ្នាំ ។ ២-ឈ្មោះ ឈន ដានឹត ភេទប្រុស អាយុ២៧ឆ្នាំ ។ ជនសង្ស័យទាំង០២នាក់ រស់នៅភូមិអណ្តូងតាជោ ឃុំរូង ស្រុកមេមត់ ខេត្តត្បូងឃ្មុំ ។

របាយការណ៍បានបញ្ជាក់ថា ក្នុងករណីនេះកម្លាំងបានដកហូតរថយន្តសាំងយ៉ុង ០១គ្រឿង (កែឆ្នៃ) និងក្របី៤ ក្បាល ។ បច្ចុប្បន្នជនសង្ស័យ រួមទាំងវត្ថុតាងត្រូវបានកម្លាំងជំនាញស្រុក កសាងសំណុំរឿងបញ្ជូនមកកាន់ការិយាល័យជំនាញ នៃស្នងការដ្ឋាននគរបាលខេត្ត ចាត់ការបន្តតាមនីតិវិធី ៕

អត្ថបទ៖ សុខុម