ចាប់ខ្លួនជនជាតិចិនម្នាក់ ឆបោកប្រាក់ជាង ៣០ ម៉ឺនដុល្លារ

បុរស​ជនជាតិ​ចិន​ម្នាក់ ទំនង​ជា​គេច​មិន​ផុត​ពី​ការ​ឃុំខ្លួន​បណ្ដោះអាសន្ន ពាក់ព័ន្ធ​ទៅ​នឹង​បទល្មើស​ឆបោក​ប្រាក់​ប្រមាណ​ជាង ៣០ ម៉ឺន​ដុល្លារ បន្ទាប់ពី​ព្រះរាជអាជ្ញា​អម​សាលាដំបូង​សម្រេច​ចោទ​ប្រកាន់​ពី​បទ​ឆបោក ហើយ​បញ្ជូន​សំណុំរឿង​ទៅ​ចៅក្រម​ស៊ើបសួរ នា​ថ្ងៃ​ទី ៣០ ខែ​ធ្នូ ឆ្នាំ ២០២២ នេះ។

ជនជាប់ចោទ​ឈ្មោះ cai fang Xiang ភេទ​ប្រុស ជនជាតិ​ចិន អាយុ ៥២ ឆ្នាំ មាន​ទីលំនៅ​ផ្ទះ​លេខ Tj30 វីឡា ផ្លូវ សាគូ​រ៉ា បូរី​អូ​គី​ដេ​វីឡា សង្កាត់​អូ​បែកក្អម ខណ្ឌ​សែន​សុខ។

លោក cai fang Xiang ត្រូវ​សមត្ថកិច្ច​អាវុធហត្ថ​រាជធានី​ភ្នំពេញ​ឃាត់ខ្លួន​តាម​ដីកា​បញ្ជា​ឲ្យ​ចូល​ខ្លួន​របស់​លោក ច្រឹង ខ្មៅ ព្រះរាជអាជ្ញា​អម​សាលាដំបូង ដែល​ចោទ​ប្រកាន់​ពី​បទ ឆបោក ក្រោយពី​ម្ចាស់​បំណុល​ឈ្មោះ Tun luo jun តំណាង​ដោយ​លោក ជុន ម៉េង​ឡុង បាន​ដាក់​ពាក្យបណ្ដឹង​មក​អយ្យការ​អម​សាលាដំបូង ចុះ​ថ្ងៃ​ទី ៣១ ខែ​តុលា ឆ្នាំ ២០២២។

ក្នុង​នោះ​ក្រោយ​ឃាត់ខ្លួន សមត្ថកិច្ច​បាន​បញ្ជូន​លោក cai fang Xiang មក​ប្រគល់​ឲ្យ​អយ្យការ​អម​តុលាការ។ ក្រោយពី​ធ្វើការ​សាកសួរ តំណាង​អយ្យការ​បាន​សម្រេច​ចោទប្រកាន់​ជា​ផ្លូវការ​ពី​បទ​ឆបោក ហើយ​បញ្ជូន​សំណុំរឿង និង​ជន​ត្រូវ​ចោទ ឲ្យ​ចៅក្រម​ស៊ើបសួរ​ចាត់ការ​បន្ត​តាមច្បាប់៕

អត្ថបទ ៖ មករា