នាយកសាខាសាលាប៊ែលធី ជួបគ្រោះថ្នាក់ចរាចរណ៍បាត់បង់ជីវិត

បុរសម្នាក់ដែលគេស្គាល់ថា ជានាយកសាលារៀនប៊ែលធីសាខាទី១៩ ផ្សារព្រែកលៀបជួបគ្រោះថ្នាក់ចរាចរណ៍ត្រូវរថយន្ត​បេីកបុកបណ្តាលឱ្យស្លាប់បាត់បង់ជីវិតកាលពីវេលាម៉ោង ១០៖១៥ នាទីយប់ថ្ងៃទី ១៩ ខែសីហា ឆ្នាំ២០២៣ ស្ថិតនៅតាមបណ្ដោយផ្លូវ ៦០ ម៉ែត្រែ ភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

សពបុរសជនរងគ្រោះអ្នកបេីកម៉ូតូមានឈ្មោះ ព្រុំ សិទ្ធិ អាយុ ៥២ឆ្នាំ ជានាយកសាលាប៊ែលធីសាខាទី១៩ (ផ្សារព្រែកលៀប) ស្នាក់នៅ ភូមិព្រៃស្នំ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញជនរងគ្រោះជិះម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ផ្លាកលេខ ភ្នំពេញ 1L-3316 ធ្វើដំណើរតាមបណ្ដោយផ្លូវ៦០ម៉ែត្រ ទិសដៅពីជើងទៅត្បូង លុះមកដល់ចំណុចកើតហេតុខាងលើស្រាប់តែមានរថយន្តបង្កមួយគ្រឿងមិនស្គាល់ម៉ាក ធ្វើដំណើរបញ្ច្រាស់​ទិសគ្នា យ៉ាងលឿន និងបុកម៉ូតូពីមុខយ៉ាងពេញទំហឹង បណ្ដាលឱ្យជនរងគ្រោះផ្លោងទៅមុខជាច្រើនម៉ែត្រ ស្លាប់ភ្លាមៗ ចំណែករថយន្តបង្កបានបន្តល្បឿនបើកទៅមុខរត់គេចខ្លួនបាត់ស្រមោល។

ក្រោយកេីតហេតុ សមត្ថកិច្ចមូលដ្ឋានសហការជាមួយមន្ត្រីជំនាញចរាចរណ៍ចុះមកពិនិត្យ និងធ្វើការវាស់វែង យកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌមានជ័យបណ្ដោះអាសន្ន។

ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ទៅក្រុមគ្រួសារយកទៅធ្វើបុណ្យតាមប្រពៃណី៕

ដោយ៖ សុខា