សន្តិសុខសង្គម

ចាប់ខ្លួនស្ត្រីម្នាក់ ក្រោយរត់គេចលាក់ខ្លួនជាង ១ ឆ្នាំ

បានផុស

២ years មុន

នៅ

ថ្ងៃអង្គារ ៥ មីនា ២០២៤

ដោយ

កម្លាំងកងរាជអាវុធហត្ថខេត្តបាត់ដំបង ចាប់ខ្លួនស្ត្រីម្នាក់ក្រោយបង្ហាញមុខពីការរត់គេចលាក់ខ្លួនជាង ១ឆ្នាំ ពាក់ព័ន្ធបទល្មើសគ្រឿងញៀន។ ការឈានដល់ការចាប់ខ្លួនស្ត្រីខាងលើត្រូវបានសមត្ថកិច្ចអនុវត្តច្បាប់អះអាងថា ធ្វើឡើងតាមដីកាបង្គាប់ឲ្យចាប់ខ្លួន និងឃុំខ្លួន លេខ៥៥៤តព្រ ចុះថ្ងៃទី០៦ ខែកញ្ញា ឆ្នាំ២០២២ របស់លោក គឹម ហេង ចៅក្រមជំនុំជម្រះសាលាដំបូងខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមដីកាបង្គាប់ឲ្យចាប់ និងឃុំខ្លួនរបស់ចៅក្រមជំនុំជម្រះសាលាដំបូងខេត្ត ដែលបានកាត់ក្ដីកំបាំងមុខបានសម្រេចផ្ដន្ទាទោសពិរុទ្ធជនរូបនេះរយៈពេល២ឆ្នាំ ៦ខែ ក្រោមបទចោទថាបានជូញដូរដោយខុសច្បាប់នូវសារធាតុញៀន ដែលស្ត្រីរូបនេះបានប្រព្រឹត្តកាលពីថ្ងៃទី០៤ ខែមករា ឆ្នាំ២០២២ នៅភូមិសាមសិប ឃុំតាក្រី ស្រុកកំរៀង។ ផ្អែកតាមរបាយការណ៍របស់មន្ត្រីកងរាជអាវុធហត្ថ បានឲ្យដឹងបន្ថែមថា ពិរុទ្ធជនរូបនេះឈ្មោះ សួង អូន ភេទស្រី អាយុ៤៦ឆ្នាំ រស់នៅភូមិសាមសិប ឃុំតាក្រី ស្រុកកំរៀង។

ទន្ទឹមនេះ សមត្ថកិច្ចបានបញ្ជាក់ឲ្យដឹងអំពីអង្គហេតុថា សមត្ថកិច្ចបានចុះបង្ក្រាបក្រុមបក្សពួកស្ត្រីរូបនេះ ពេលកំពុងប្រព្រឹត្តបទល្មើសគ្រឿងញៀន តែស្ត្រីឈ្មោះ សួង អូន នេះបានរត់គេចខ្លួនផុតរហូតមកតែមកដល់ពេលនេះស្ត្រីរូបនេះ ទើបតែបានបង្ហាញមុខក៏ត្រូវចាប់ខ្លួនតាមដីកាតុលាការដែលមានក្នុងដៃសមត្ថកិច្ចស្រាប់តែម្ដង។

ក្រោយចាប់ខ្លួនស្ត្រីរូបនេះ ត្រូវបានចៅក្រមជំនុំជម្រះកាត់ក្ដីកំបាំងមុខសម្រេចផ្ដន្ទាទោសដាក់ពន្ធនាគាររយៈពេល ២ឆ្នាំ ៦ខែ ដោយគិតចាប់ពីថ្ងៃចាប់ខ្លួន។ ពេលនេះសមត្ថកិច្ចជំនាញបាននាំខ្លួនពិរុទ្ធជនរូបនេះទៅប្រគល់ជូនតំណាងអយ្យការអមសាលាដំបូងខេត្ត រួចរាល់ហើយ មុននិងបន្តនាំខ្លួនទៅមន្ទីរឃុំឃាំង ៕

អត្ថបទ៖ សៅ សារិទ្ធ