រដ្ឋបាលឃុំចន្រ្តី ច្រានចោលការផ្សព្វផ្សាយពីការរកឃើញសត្វខ្លាពីរក្បាលនៅខាងត្បូងផ្សារចន្ត្រី

បន្ទាប់ពីមានការបង្ហោះចែករំលែកនូវព័ត៌មានមិនពិតជុំវិញករណីប្រទះឃើញសត្វខ្លាចំនួនពីរក្បាលនៅខាងត្បូងផ្សារចន្ត្រីឃុំចន្ត្រី ស្រុករមាសហែក ខេត្តស្វាយរៀង ដែលបង្កឲ្យមានភាពភ័យខ្លាចរបស់ប្រជាពលរដ្ឋក្នុងមូលដ្ឋាននៅថ្ងៃទី២៧ ខែមិថុនា ឆ្នាំ២០២៤នេះ រដ្ឋបាលឃុំចន្រ្តីបានចេញសេចក្តីបំភ្លឺដោយច្រានចោលដំណឹងគ្មានការពិតនេះ។

នៅក្នុងសេចក្តីបំភ្លឺរបស់រដ្ឋបាលឃុំចន្រ្តី បានបញ្ជាក់ថា ដោយមានការបង្ហោះព័ត៌មាននៅក្នុងបណ្តាញទំនាក់ទំនងសង្គមហ្វេសប៊ុករបស់ម្ចាស់គណនីដែលមានឈ្មោះ Bordito online ដោយបានបង្ហោះសរសេរថា ឃើញហើយៗសត្វខ្លាចំនួនពីរក្បាលនៅខាងត្បូងផ្សារចន្ត្រីស្រុករមាសហែកខេត្តស្វាយរៀង។ដូច្នេះសូមបង ប្អូនមេត្តាប្រុងប្រយ័ត្ន”។

ករណីនៃការបង្ហោះព័ត៌មាននេះត្រូវបានរដ្ឋបាលឃុំចន្រ្តីបញ្ជាក់ថា ចំពោះការបង្ហោះព័ត៌មាននេះបានធ្វើឲ្យប៉ះពាល់ដល់សតិអារម្មណ៍ និងសេចក្តីសុខសាន្តរបស់បងប្អូនប្រជាពលរដ្ឋបង្កភាពភ័យខ្លាច និងអសន្តិសុខនៅក្នុងឃុំចន្រ្តីទាំងមូល។ រដ្ឋបាលឃុំចន្រ្តីសូមធ្វើការបដិសេធន៍ និងច្រានចោលនូវការបង្ហោះព័ត៌មានមិនពិតរបស់គណនីដែលមានឈ្មោះ Bordito online ទាំងស្រុង។

ជាក់ស្តែងនៅយប់ថ្ងៃទី២៦ ខែមិថុនា ឆ្នាំ២០២៤ ប៉ុស្តិ៍នគរបាលរដ្ឋបាលឃុំចន្រ្តីបានសហការជាមួយកម្លាំងប្រជាការពារបានល្បាតចល័យនៅគោលដៅខាងត្បូងផ្សារចន្រ្តីពុំមានសកម្មភាពដូចការចុះផ្សាយរបស់ខាងលើនេះទេ។

សូមបញ្ជាក់ថា អំឡុងរយ:ពេលប៉ុន្មានថ្ងៃនេះ មានការភ្ញាក់ផ្អើលក្រោយមានការបង្ហោះចែករំលែកពាក់ព័ន្ធរឿងរ៉ាងដ៏រន្ធត់មួយ ខណ:ដែលមានកាលើកឡើងថា ប្រជាពលរដ្ឋនៅខេត្តព្រៃវែង និងខេត្តស្វាយរៀងបានប្រទះឃើញសត្វឆ្កែត្រូវបានស្លាប់ជាបន្តបន្ទាប់ក្រោមរូបភាពស៊ីអស់គ្រឿងក្នុងដោយមិនដឹងមូលហេតុ៕

អត្ថបទ៖ ចាន់រ៉ា