ព្រះសង្ឃ និងពុទ្ធបរិស័ទចំណុះជើងវត្តភ្នំសំពៅ ស្នើឲ្យអាជ្ញាធរអន្តរាគមន៍ រឿងព្រះសង្ឃមួយអង្គចង់គ្រប់គ្រងវត្ត

នៅរសៀលថ្ងៃទី២៣ ខែកក្កដា ឆ្នាំ២០២៤ មានព្រះសង្ឃជាច្រើនអង្គ រួមជាមួយប្រជាពលរដ្ឋដែលជាពុទ្ធបរិស័ទចំណុះជើងវត្តភ្នំសំពៅ ដែលមានទីតាំងស្ថិតក្នុងឃុំភ្នំសំពៅ ស្រុកបាណន់ បានធ្វើដំណើរមកកាន់សាលាខេត្តបាត់ដំបងដើម្បីឲ្យរដ្ឋបាលខេត្តជួយរកដំណោះស្រាយ ជុំវិញបញ្ហាដែលកើតមានឡើងនៅក្នុងទីអារាម។

បើតាមការរៀបរាប់ពីប្រជាពលរដ្ឋក៏ដូចជាសង្ឃដីការបស់ព្រះសង្ឃដែលគង់នៅទីអារាមវត្តភ្នំសំពៅ បានបញ្ជាក់ថា កាលពីអំឡុងខែវិច្ឆិកា ឆ្នាំ២០២៤ មានព្រះសង្ឃមួយអង្គព្រះនាម អុីវ យក់សុឺន បានចូលមកសុំស្នាក់អាស្រ័យនៅក្នុងទីអារាមចំនួន៤ថ្ងៃ។ លុះក្រោយមកក៏ចេះតែសុំបន្តគង់នៅមកដល់សព្វថ្ងៃ។ ប៉ុន្តែអ្វីដែលសំខាន់ គឺព្រះសង្ឃអង្គនោះបានព្យាយាមក្តោបក្តាប់អំណាចទៅលើសង្ឃដទៃ មិនថាជាព្រះសង្ឃធម្មតា ឬព្រះចៅអធិការនោះឡើយ រហូតហ៊ានទាមទារទៅលើបច្ច័យគ្រប់យ៉ាង ដែលជាចំណូលរបស់វត្តទាំងមូលយកមកគ្រប់គ្រងថែមទៀតផងដែលបញ្ហានេះ បានធ្វើឲ្យទាំងព្រះសង្ឃ និងពុទ្ធបរិស័ទចំណុះជើងវត្តមានការមិនពេញចិត្តទាល់តែសោះ។

គួរបញ្ជាក់ថា ព្រះសង្ឃព្រះនាម អុីវ យក់សុឺន មានដើមកំណើតនៅស្រុកបាណន់ ហើយបានទៅបួសគង់នៅវត្តអូរជាំ ប៉ុន្តែមិនបានប៉ុន្មានដោយសារទង្វើរបស់ព្រះអង្គដែលវាទទីចង់គ្រប់គ្រងទីនោះ ទើបធ្វើឲ្យមានការបណ្ដេញចេញពីទីអារាម ដោយពុទ្ធបរិស័ទបានចោមរោមបណ្ដេញតែម្ដង ដោយសារតែការខ្លាចអំពើហិង្សាទើបព្រះសង្ឃអង្គនោះចាកចេញពីវត្តអូរជាំ មកសុំគង់ស្នាក់បណ្ដោះអាសន្ននៅវត្តភ្នំសំពៅ ហើយក៏បានប្រើប្រាស់ទង្វើដដែលទៅក្នុងទីអារាមនេះថែមទៀត ទើបធ្វើឲ្យមានការថ្នាំងថ្នាក់ចិត្តពីសំណាក់ព្រះសង្ឃក៏ដូចជាព្រះចៅអធិការ និងពុទ្ធបរិស័ទចំណុះជើងវត្តផងដែរ។

ដោយសារបញ្ហានេះទាំងព្រះសង្ឃ និងពុទ្ធបរិស័ទចំណុះជើងវត្តបានធ្វើដំណើរទៅកាន់សាលាឃុំម្ដងរួចមកហើយ ដើម្បីសាកសួរព័ត៌មាន និងចង់ឲ្យអាជ្ញាធរឃុំរកដំណោះស្រាយ ផ្ទុយទៅវិញនៅពេលទៅដល់ខាងមុខសាលាឃុំ ត្រូវបានលោកមេឃុំឈ្មោះ ពេជ្រ បឿន បណ្ដេញចេញមិនឲ្យពួកគាត់ចូលសាលាឃុំឡើយ ដែលទង្វើមួយនេះពួកគាត់មិនអាចទទួលយកបានឡើយ ព្រោះអាជ្ញាធរឃុំត្រូវបម្រើរាស្ត្រ មិនមែនគ្រប់គ្រងរាស្ត្រនោះទេ យ៉ាងហោចណាស់ក៏ហៅពួកគាត់ចូលទៅក្នុងសាលាឃុំ ដើម្បីសួរនាំអំពីបញ្ហាដែលកើតមានឡើង និងរកដំណោះស្រាយ ផ្ទុយទៅវិញលោកមេឃុំបានបណ្ដេញទាំងព្រះសង្ឃក៏ដូចជាពុទ្ធបរិស័ទចំណុះជើងវត្តឲ្យចេញពីមុខសាលាឃុំថែមទៀតផង។

ការដែលធ្វើដំណើរមកខាងមុខសាលាខេត្តបាត់ដំបងនាពេលនេះ គឺប្រជាពលរដ្ឋក៏ដូចជាព្រះសង្ឃមានសំណូមពរតែមួយគត់ គឺសុំឱ្យព្រះសង្ឃព្រះនាម អុីវ យក់សុឺន ចាកចេញពីទីអារាមវត្តភ្នំសំពៅទៅកាន់កន្លែងដើម ឬវត្តដទៃទៀតក៏បានដោយមិនអនុញ្ញាតឲ្យគង់ស្នាក់នៅបន្តទៀតនោះឡើយ។

ជុំវិញបញ្ហានេះ កាលពីរសៀលថ្ងៃទី២៣ ខែកក្កដា ឆ្នាំ២០២៤ មន្ទីរធម្មការ និងសាសនាខេត្តបាត់ដំបង បានចេញលិខិតនិមន្ដព្រះតេជគុណ ពៅ លីន ព្រះចៅអធិការវត្តភ្នំសំពៅ ដើម្បីចូលរួមប្រជុំពិភាក្សាសម្របសម្រួលនៅសាលប្រជុំសាលាស្រុកបាណន់ នារសៀលថ្ងៃទី២៤កក្កដានេះ៕

អត្ថបទ៖ សោ និយមរ័ត្ន