មន្ត្រីជំនាញរកឃើញអំបោះដេររបួសក្លែងក្លាយជាង​១ពាន់ប្រអប់នាំចូលគ្មានប្រភពច្បាស់លាស់

មន្រ្តីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបក្លែងបន្លំ (ក.ប.ប.) សាខារាជធានីភ្នំពេញ បានសហការជាមួយនាយកដ្ឋាននគបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ តំណាងសុខាភិបាល កាលពីទី១២ ខែសីហា ឆ្នាំ២០២៤ បានចុះត្រួតពិនិត្យទីតាំងឱសថស្ថានចំនួន៣ក្នុងភូមិសាស្ដ្ររាជធានីភ្នំពេញ រកឃើញផលិតផលអំបោះដេររបួសក្លែងបន្លំជាង១ពាន់ប្រអប់ដែលនាំចូលគ្មានប្រភពច្បាស់លាស់។

ការចុះពិនិត្យ និងដកហូតផលិតផលទាំងនេះ គឺធ្វើឡើងក្រោមការសម្របសម្រួលដោយលោក ស៊ីន រក្សា ព្រះរាជអាជ្ញារងរាជធានីភ្នំពេញ រកឃើញផលិតផលអំបោះដេររបួសម៉ាក ETHILON ក្លែងបន្លំចំនួន១០៩៥ប្រអប់ គ្មានប្រភពច្បាស់លាស់ និងរំលោភកម្មសិទ្ធបញ្ញា របស់ក្រុមហ៊ុន Johnson &Johnson ។

ផលិតផលទាំងអស់ត្រូវបានមន្ត្រីជំនាញដកហូត និងបញ្ជូនទៅរក្សារទុកនៅនាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃ ដើម្បីបន្តនីតិវិធី៕

អត្ថបទ៖ សំណាង