មន្ត្រីជំនាញនៅមិនទាន់រកឃើញប្រេងឆាក្លែងក្លាយ​​របស់ក្រុមហ៊ុនវៀតណាមនៅលើទីផ្សារកម្ពុជានៅឡើយ

មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា ក ប ប នៅមិនរកឃើញផលិតផលប្រេងឆាក្លែងក្លាយ៥ប្រភេទរបស់ក្រុមហ៊ុនវៀតណាមនៅលើទីផ្សារកម្ពុជានៅឡើយ ខណៈមន្ត្រីជំនាញនៅតែអំពាវនាវឲ្យប្រជាពលរដ្ឋ ក៏ដូចជាអាជីវករត្រូវបង្កើនការប្រុងប្រយ័ត្ន កុំទិញ លក់ ឬប្រើប្រាស់ផលិតផលប្រេងឆាទាំងនេះ ព្រោះអាចបណ្ដាលឲ្យប៉ះពាល់ដល់សុខភាព។

គួរបញ្ជាក់ថា កាលពីថ្ងៃទី១៤ ខែតុលា ឆ្នាំ២០២៥ រដ្ឋបាលសុវត្ថិភាពម្ហូបអាហារវៀតណាម (VFA) បានចេញសេចក្តីជូនដំណឹង តាមប្រព័ន្ធអនឡាញ ស្ដីពីការរកឃើញ ក្រុមហ៊ុន GF Vietnam Food Co., Ltd. ដែលមានអាសយដ្ឋាននៅ ភូមិ Yen Phu ឃុំ Nguyen Van Linh ខេត្ត Hung Yen បានផលិត និងជួញដូរផលិតផលប្រេងឆាមួយចំនួនមានម៉ាក CHICA,TAMIN GOLD, GOLDMAX, TOT និងម៉ាក MEGAFOOD ដែលមានគុណភាពអន់ ជាទំនិញក្លែងក្លាយ ហើយបានចែកចាយទៅកាន់ខេត្ត-ក្រុងជាច្រើននៅទូទាំងប្រទេសវៀតណាម។

ក្រោយពីទទួលបានការជូនដំណឹង មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា ក ប ប នៃប្រទេសកម្ពុជា ចាប់ពីតាំងពីថ្ងៃទី១៨ រហូតមកថ្ងៃទី២០ ខែតុលា ឆ្នាំ២០២៥ បានបើកប្រតិបត្តិការចុះស្វែងរកផលិតផលប្រេងឆាទាំងនេះនៅតាមបណ្ដារាជធានី ខេត្តគោលដៅមួយចំនួនដូចជារាជធានីភ្នំពេញ ខេត្តកំពង់ស្ពឺ ខេត្តស្វាយរៀង ខេត្តកណ្ដាល ខេត្តរតនគិរី ខេត្តមណ្ឌលគិរី ខេត្តប៉ៃលិន ខេត្តកំពង់ធំ ខេត្តកំពត និងខេត្តស្វាយរៀង នៅតាមផ្សាររដ្ឋ ផ្សារឯកជន តូបលក់ទំនិញ ម៉ាត ខណៈការចុះពិនិត្យកាលពីថ្ងៃទី១៨ និងថ្ងៃទី១៩តុលា បានធ្វើឡើងចំនួន១០៧ទីតាំងរួចមកហើយ។

ទោះបីយ៉ាងណា ការចុះត្រួតពិនិត្យស្វែងរកផលិតផលប្រេងឆាក្លែងក្លាយរបស់ក្រុមហ៊ុនវៀតណាមដោយមន្ត្រីជំនាញ ក ប​ ប រហូតមកដល់ថ្ងៃទី២០ ខែតុលា មន្ត្រីជំនាញនៅមិនទាន់រកឃើញផលិតផលក្លែងក្លាយទាំងនេះនៅលើទីផ្សារកម្ពុជានៅឡើយទេ ហើយមន្ត្រីជំនាញនៅតែអំពាវនាវឲ្យប្រជាពលរដ្ឋបង្កើនការប្រុងប្រយ័ត្ន កុំទិញ លក់ ឬប្រើប្រាស់ផលិតផលប្រេងឆាដែលមានម៉ាកខាងលើ និងក្នុងករណីបើប្រទះឃើញ សូមធ្វើការទំនាក់ទំនងតាមរយៈ CCF Complaint App, លេខទូរសព្ទ ១២៦៦ ដើម្បីមានវិធានការតាមនីតិវិធី ឱ្យបានទាន់ពេលវេលា៕

អត្ថបទ៖ សុខុម