បាញ់ប្រហារជាច្រើនគ្រាប់បណ្ដាលជនរងគ្រោះពីរនាក់រងរបួសធ្ងន់​ក្នុងហេតុការណ៍គ្រោះថ្នាក់ចរាចរណ៍

ជនរងគ្រោះចំនួនពីរនាក់ត្រូវបានខ្មាន់កាំភ្លើងបើកការបាញ់ប្រហារជាច្រើនគ្រាប់បណ្ដាលឲ្យរងរបួសធ្ងន់ បន្ទាប់ពីជួបគ្រោះថ្នាក់ចរាចរណ៍រវាងរថយន្ដMercedes និងរថយន្ដម៉ាកford។ ករណីករណីគ្រោះថ្នាក់ចរាចរណ៍រហូតឈានដល់ការបាញ់ប្រហារនេះ បានកើតឡើងនៅវេលាម៉ោងជាង១០យប់ ថ្ងៃទី២៧ ខែសីហា ឆ្នាំ២០២៤ នៅបណ្ដោយផ្លូវលេខ១០៤ ក្នុងមូលដ្ឋានសង្កាត់រលួស ខណ្ឌដង្កោ រាជធានីភ្នំពេញ។

តាមព័ត៌មានបឋមដែលកម្ពុជាថ្មីទទួលបាន ក្នុងករណីនេះមានជនរងគ្រោះចំនួន២នាក់ជាភាគីខាងរថយន្ដMercedes បានរងរបួសធ្ងន់ពីការបាញ់ប្រហារជាច្រើនគ្រាប់ពីភាគីរថយន្ដford ដោយកាំភ្លើងវែងខ្លី។ ទោះបីយ៉ាងណា នៅព្រឹកថ្ងៃទី២៨សីហានេះ លោកវរសេនីយ៍ទោ ជាង ហុកសែ អធិការរងទទួលផែនការងារព្រហ្មទណ្ឌ នៃអធិការដ្ឋាននគរបាលខណ្ឌដង្កា នៅមិនទាន់បញ្ជាក់ឲ្យដឹងថាជាករណីអ្វីឲ្យបាកដនោះទេ ដោយលោកសុំពេលស្រាវជ្រាវតាមជំនាញសិន៕