បង្ក្រាបក្រុមជួញដូរគ្រឿងញៀន ឃាត់ខ្លួនមនុស្ស​២​នាក់ រឹបអូសសារធាតុញៀនប្រភេទជ័រអាភៀនជាង៤៧គីឡូក្រាម

កម្លាំងនគរបាលនៃមន្ទីរប្រឆាំងគ្រឿងញៀន (កម្លាំងជំនាញ ក៧) និងក្រុមប្រចាំការទិសឦសាននៃមន្ទីរប្រឆាំងគ្រឿងញៀន បានសហការជាមួយកម្លាំងជំនាញស្នងការដ្ឋាននគរបាលខេត្តស្ទឹងត្រែង ស្រាវជ្រាវបង្ក្រាបករណីដឹកជញ្ជូនគ្រឿងញៀនឃាត់ខ្លួនមនុស្ស២នាក់ និងរឹបអូសសារធាតុញៀនជាប្រភេទជ័រអាភៀនជាង៤៧គីឡូក្រាម យកមកអនុវត្តនិតិវីធីច្បាប់។

ប្រតិបត្តិការស្រាវជ្រាវបង្ក្រាបនេះ ធ្វើឡើងកាលពីថ្ងៃទី២ ខែមេសា ឆ្នាំ២០២៥ នៅចំណុចស្ពានលើមេគង្គស្ថិតនៅភូមិប៉ាចុង សង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង។

តាមរបាយការណ៍របស់មន្ទីរប្រឆាំងបទល្មើសគ្រឿងញៀន បានឲ្យដឹងនៅរសៀលថ្ងៃទី៩ មេសា នេះថា ជនសង្ស័យដែលឃាត់ខ្លួនមាន ឈ្មោះ ធុជ វណ្ណៈ ភេទប្រុស អាយុ៥៥ឆ្នាំ ជនជាតិខ្មែរ និងឈ្មោះ យូ គ្រី ភេទប្រុស អាយុ៥៥ឆ្នាំ ជនជាតិខ្មែរ ព្រមទាំងរឹបអូសបានសារធាតុញៀនជាប្រភេទជ័រអាភៀន ទម្ងន់ ៤៧គីឡូ ២៣២ក្រាម។

បច្ចុប្បន្នជនសង្ស័យ និងវត្ថុតាងខាងលើត្រូវបានសមត្ថកិច្ចជំនាញនៃមន្ទីរប្រឆាំងគ្រឿងញៀន កសាងសំណុំរឿង បញ្ជូនទៅកាន់អយ្យការអមសាលាដំបូងខេត្តស្ទឹងត្រែង តាមនីតិវិធី៕