កីឡា

ផ្អែកលើមូលហេតុនេះ ក្រុមនារីកម្ពុជា អាចនឹងឈ្នះ នារីឥណ្ឌូណេស៊ី រសៀលនេះ

បានផុស

២៦ វិនាទី មុន

នៅ

ថ្ងៃអង្គារ ៩ មិថុនា ២០២៦

ដោយ

ក្រុមបាល់ទាត់ជម្រើសជាតិនារី កម្ពុជា អាចនឹងបង្កើតគណនីជ័យជម្នះជាលើកដំបូងលើក្រុមបាល់ទាត់នារី ឥណ្ឌូណេស៊ី សម្រាប់ជំនួបមិត្តភាពអន្តរជាតិ វេលាម៉ោង ៣:៣០ នាទីរសៀល ថ្ងៃទី៩ ខែមិថុនា នេះនៅប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនារីឥណ្ឌូណេស៊ី នឹងប្រើឱកាសនេះដើម្បីស្វែងរកជ័យជម្នះនៅក្នុងដីរបស់ខ្លួន បន្ទាប់ពីពួកគេបានបរាជ័យក្រោមថ្វីជើងសិង្ហបុរី ដោយលទ្ធផល ២-០ កាលពីថ្ងៃពីថ្ងៃទី៣ ខែមិថុនា។ចំណែក ក្រុមនារីកម្ពុជា អាចនឹងបង្កើតកំណត់ត្រាជ័យជម្នះទាំងពីរលើក សម្រាប់ការប្រកួតមិត្តភាពអន្តរជាតិលើកដំបូងនៅក្រៅប្រទេស បន្ទាប់ពីបានឈ្នះ ក្រុមនារីសិង្ហបុរី ដោយលទ្ធផលធំធេង ៥-០ កាលពីថ្ងៃទី៦ ខែមិថុនា។

តាមប្រវត្តិជួបគ្នា ៤ លើកកន្លងមក ក្រុមនារីកម្ពុជា មិនធ្លាប់ឈ្នះ ក្រុមនារីឥណ្ឌូណេស៊ី ឡើយគឺស្មើ ២ លើក និងចាញ់ ២ លើក។ ជួបគ្នាលើកដំបូងកាលពីឆ្នាំ ២០១៩ ក្រុមនារីកម្ពុជា បានចាញ់ ឥណ្ឌូណេស៊ី ដោយលទ្ធផល ៤-០ វគ្គសន្សំពិន្ទុក្នុងពូលពានរង្វាន់ ASEAN Women’s Championship នៅប្រទេសថៃ។

នៅឆ្នាំ ២០២៤ ក្រុមនារីកម្ពុជា និងឥណ្ឌូណេស៊ី បានជួបគ្នា ២ លើកទៀតក្នុងពាន ASEAN Women’s Cup នៅប្រទេសឡាវ។ ក្រុមទាំងពីរបានបញ្ចប់ដោយលទ្ធផលស្មើគ្នា ០-០ នៅវគ្គសន្សំពិន្ទុ ប៉ុន្តែក្រុមទាំងពីរបានជួបគ្នានៅវគ្គផ្តាច់ព្រ័ត្រ ដែលពេលនោះ ក្រុមនារីឥណ្ឌូណេស៊ី បានឈ្នះ ក្រុមនារីកម្ពុជា ដោយលទ្ធផល ៣-១ ដើម្បីក្លាយជាជើងឯក ខណៈក្រុមនារីកម្ពុជាទទួលបានចំណាត់ថ្នាក់លេខ២។

ជួបគ្នាចុងក្រោយបំផុតកាលពីឆ្នាំ ២០២៥ ក្នុងពានរង្វាន់ ASEAN Women’s Championship នៅប្រទេសវៀតណាម ក្រុមនារីកម្ពុជា និង ឥណ្ឌូណេស៊ី បានស្មើគ្នាដោយលលទ្ធផល ១-១។

ម្ចាស់ផ្ទះឥណ្ឌូណេស៊ី មានកម្លាំងចិត្តក្នុងការស្វែងរកលទ្ធផលល្អសម្រាប់ការប្រកួតរសៀលនេះ ដោយសារពួកគេមានប្រវត្តិមិនធ្លាប់ចាញ់កម្ពុជា។ ទោះបីជាយ៉ាងណា ផ្អែកលើលទ្ធផលចុងក្រោយគឺ ឥណ្ឌូណេស៊ី បានចាញ់ សិង្ហបុរី ប៉ុន្តែ កម្ពុជា បានឈ្នះ សិង្ហបុរី ដូច្នេះក្រុមនារីកម្ពុជាមានទំនុកចិត្តក្នុងការបង្កើតស្ថិតិជ័យជម្នះលើកដំបូងលើឥណ្ឌូណេស៊ី។

ស្ថិតក្រោមការដឹកនាំរបស់គ្រូបង្វឹក ឃួន ឡាប៊ូរ៉ាវី ក្រុមនារីកម្ពុជាកំពុងស្ថិតនៅក្នុងដំណាក់កាលដ៏ល្អ។ កីឡាការិនីកម្ពុជាបានបង្ហាញសមត្ថភាពយ៉ាងទៀងទាត់នៅលើទីលាន ប្រមាណពីរបីឆ្នាំចុងក្រោយនេះតាមរយៈការប្រកួតលីគ និងការប្រកួតលើឆាកអន្តរជាតិ។

ក្រុមនារីកម្ពុជា និងនារីឥណ្ឌូណេស៊ី កាលពីឆ្នាំ ២០២៤

គិតចាប់តាំងពីឆ្នាំ ២០២៤ មក ក្រុមនារីកម្ពុជា ធ្លាប់បានប្រកួតអន្តរជាតិចំនួន ១២ លើកក្នុងនោះ ឈ្នះ ៥ ប្រកួត ស្មើ ៣ ប្រកួត និងចាញ់ ៤ ប្រកួត ដែលជាទុកជាស្ថិតិដ៏ល្អ។

ទោះបីជាយ៉ាងណា សម្រាប់ការប្រកួតនេះ ក្រុមនារីកម្ពុជាបាត់បង់កម្លាំងសំខាន់គឺកីឡាការិនី ទន់ គឹមហុង ដែលបានរបួសដាច់សរសៃ ACL ដែលត្រូវសម្រាកព្យាបាលជាច្រើនខែ។

សូមបញ្ជាក់ថា នេះជាការប្រកួតអន្តរជាតិនៅក្រៅប្រទេសលើកទី២ របស់ ក្រុមនារីកម្ពុជា និងជាការប្រកួតមិត្តភាពអន្តរជាតិផ្លូវការលើកទី ៣ សម្រាប់ក្រុមជម្រើសជាតិនារីកម្ពុជា បន្ទាប់ពីប្រកួតមិត្តភាពអន្តរជាតិលើកទី១ កាលពីឆ្នាំ ២០២៥ បានឈ្នះ ក្រុមនារី ហ្គាំ ដោយលទ្ធផល ១-០៕

ប្រវត្តិជួបគ្នា នារីកម្ពុជា vs នារីឥណ្ឌូណេស៊ី

កម្ពុជា ០-៤ ឥណ្ឌូណេស៊ី (ជម្រុះក្នុងពូល ពាន ASEAN Women’s Championship ឆ្នាំ ២០១៩ នៅថៃ)
កម្ពុជា ០-០ ឥណ្ឌូណេស៊ី (សន្សំពិន្ទុពាន ASEAN Women’s Cup ឆ្នាំ ២០២៤ នៅឡាវ)
កម្ពុជា ១-៣ ឥណ្ឌូណេស៊ី (វគ្គផ្តាច់ព្រ័ត្រ ពាន ASEAN Women’s Cup ឆ្នាំ ២០២៤ នៅឡាវ)
កម្ពុជា ១-១ ឥណ្ឌូណេស៊ី (ជម្រុះក្នុងពូល ពាន ASEAN Women’s Championship ឆ្នាំ ២០២៥ នៅវៀតណាម)

លោកគ្រូ ឃួន ឡាប៊ូរ៉ាវី និង សឿន វិផា ក្នុងសន្និសីទមុនការប្រកួត

អត្ថបទ៖ វិរបុត្រ

Related Topics:ក្រុមបាល់ទាត់នារីកម្ពុជា

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា