កីឡា

ជាប្រវត្តិសាស្ត្រថ្មី! បាល់ទាត់កម្ពុជា ៣ កម្រិត ឈ្នះទាំង ៣ ក្នុងសប្តាហ៍តែមួយ

បានផុស

៨ ម៉ោង មុន

នៅ

ថ្ងៃអាទិត្យ ៧ មិថុនា ២០២៦

ដោយ

ក្រុមបាល់ទាត់ជម្រើសជាតិកម្ពុជា ៣ កម្រិត គឺក្រុមបុរសជម្រើសដៃទី១ ក្រុមនារីជម្រើសដៃទី១ និងក្រុមយុវជនអាយុ ១៩ ឆ្នាំ ទទួលបានជ័យជម្នះយ៉ាងធំធេងនៅក្នុងសប្តាហ៍តែមួយដោយមិនរបូតគ្រាប់បាល់សោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់បុរសកម្ពុជាជម្រើសដៃទី១ ទទួលបានជ័យជម្នះដោយមិនឲ្យគូប្រកួតតដៃរួចក្នុងលទ្ធផល ៤-០ លើក្រុមជម្រើសជាតិ ប៊ូតាន កាលពីថ្ងៃទី៤ ខែមិថុនា ឆ្នាំ ២០២៦ នៅពហុកីឡដ្ឋានជាតិអូឡាំពិក។ នេះជាលទ្ធផលច្រើនគ្រាប់ដែលរក្សាសំណាញ់ទីយ៉ាងស្អាត និងជាជ័យជម្នះលើកទី១ បន្ទាប់ពីជាងមួយឆ្នាំហើយដែលក្រុមបុរសកម្ពុជាមិនទាន់ស្គាល់ជ័យជម្នះ។

កន្លងទៅបានតែ ២ ថ្ងៃប៉ុណ្ណោះ ក្រុមបាល់ទាត់នារីកម្ពុជាបានយកឈ្នះលើ ក្រុមនារីសិង្ហបុរី ដោយលទ្ធផល ៥-០ សម្រាប់ការប្រកួតមិត្តភាពអន្តរជាតិនាថ្ងៃទី៦ ខែមិថុនា ឆ្នាំ ២០២៦ នៅប្រទេសឥណ្ឌូណេស៊ី។ នេះជាជ័យជម្នះធំធេងលើកទី ២ សម្រាប់ក្រុមនារីកម្ពុជាដោយរក្សាសំណាញ់ទីយ៉ាងស្អាត បន្ទាប់ពីលើកទី១បានឈ្នះលើ ក្រុមនារីទីម័រខាងកើត ដោយលទ្ធផល ១២-០ កាលពីឆ្នាំ ២០១៨។

នៅថ្ងៃទី៦ ខែមិថុនាដដែលនេះ ក្រុមបាល់ទាត់យុវជនកម្ពុជាអាយុ ១៩ ឆ្នាំ បានយកឈ្នះក្រុមយុវជន ហ្វីលីពីន ដោយលទ្ធផល ៣-០ សម្រាប់ការប្រកួតសន្សំពិន្ទុក្នុងពូល C ពានរង្វាន់ ASEAN U19 Boys Championship នៅប្រទេសឥណ្ឌូណេស៊ី។ នេះជាការទទួលបាន ៣ ពិន្ទុដ៏សំខាន់សម្រាប់ក្រុមយុវជនកម្ពុជាក្នុងស្វែងរកឱកាសឡើងទៅកាន់វគ្គពាក់កណ្តាលផ្តាច់ព្រ័ត្រ។ ការប្រកួតចុងក្រោយ U19 កម្ពុជា ត្រូវជួប U19 អូស្ត្រាលី នៅថ្ងៃទី៩ ខែមិថុនា ដើម្បីប្រជែងយកលេខ ១ ក្នុងពូល។

នេះជាស្ថិតិថ្មីនៅក្នុងប្រវត្តិសាស្ត្របាល់ទាត់ជម្រើសជាតិកម្ពុជាដែលមាន ៣ កម្រិត ទទួលបានជ័យជម្នះសម្រាប់ការប្រកួតអន្តរជាតិ ដោយឈ្នះក្នុងសប្តាហ៍តែមួយ ច្រើនគ្រាប់ និងរក្សាសំណាញ់ទីបានយ៉ាងស្អាត៕