ខេត្តប៉ៃលិន ឈ្នះមេដាយមាសច្រើនជាងគេ ក្នុងការប្រកួតកីឡាសិស្សបឋមសិក្សាថ្នាក់ជាតិ

ការប្រកួតកីឡាសិស្សបឋមសិក្សាថ្នាក់ជាតិ ប្រចាំឆ្នាំ២០២២ បានប្រារព្ធពិធីបិទជាផ្លូវការ នៅរសៀលថ្ងៃទី០៧ ខែឧសភា ឆ្នាំ២០២២ នេះ នៅវិទ្យាស្ថានជាតិអប់រំកាយ និងកីឡា រាជធានីភ្នំពេញ បន្ទាប់ពីចំណាយពេលប្រកួត ៩ ថ្ងៃរួចមក។ ជាលទ្ធផល ក្រុមកុមារា-កុមារី មកពីខេត្តប៉ៃលិន បានក្រសោបមេដាយមាសបានច្រើនជាងគេ ពោលគឺសរុប ១១ មេដាយ ក្នុងនោះ មាស៨ ប្រាក់០ និងសំរឹទ្ធិ៣ លើម្ចាស់ផ្ទះរាជធានីភ្នំពេញទៅទៀត ដែលរកបានមេដាយសរុប ១២ ប៉ុន្តែឈ្នះមេដាយមាសតែ៤ ប្រាក់៥ និងសំរឹទ្ធិ៣។

លោក ប៊ូ ជុំសេរី អនុរដ្ឋលេខាធិការ តំណាងបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានកោតសរសើរ និងវាយតម្លៃខ្ពស់ចំពោះគណៈកម្មការរៀបចំការប្រកួត និងការចូលរួមប្រកួតរបស់កីឡាករ-កីឡាការិនី ទាំង២៥ រាជធានី-ខេត្ត ប្រកបដោយស្មារតីកីឡា និងឧត្តមគតិកីឡា តាមរយៈការគោរពបានយ៉ាងខ្ជាប់ខ្ជួននូវបទបញ្ជាការប្រកួត និងគោលការណ៍ Fair Play។

លោក ប៊ូ ជុំសេរី មានប្រសាសន៍បញ្ជាក់ថា៖ “ឆ្លងតាមការប្រកួតយ៉ាងសកម្ម និងស្វិតស្វាញ នៅលើទីលានប្រកួតទាំង៨ ប្រភេទកីឡាកន្លងមកនេះ គណ:កម្មការបានកត់សម្គាល់ឃើញថា ក្រុមកីឡាករ-កីឡាការិនី តាមប្រភេទកីឡានីមួយៗ បានយកអស់កម្លាំងកាយ កម្លាំងចិត្ត ប្រឹងប្រែងអស់ពីសមត្ថភាព និងទេពកោសល្យរបស់ខ្លួន ក្នុងការប្រកួតប្រជែងប្រកបដោយ ទឹកចិត្តក្លៀវក្លាក្នុងនាមជាអ្នកកីឡា។ កាយវិការដែលក្មួយៗកីឡាករ កីឡាការិនី បានអនុវត្តក្នុងការប្រកួត គឺពិតជាឈរលើស្មារតីទទួលខុសត្រូវ មានការគោរពវិន័យ អនុវត្តតាមបទបញ្ជាបច្ចេកទេស បង្ហាញពីក្តីស្រឡាញ់ និងមានការយោគយល់ អធ្យាស្រ័យគ្នា។ នេះបញ្ជាក់ថាក្មួយៗជាកីឡាករ កីឡាការិនីយល់យ៉ាងច្បាស់នូវមនសិកាកីឡា និងបានផ្សាភ្ជាប់យ៉ាងជិតស្និទ្ធនូវចំណងសាមគ្គីភាព ភាតរភាព និងការយោគយល់គ្នា ដែលជាគំរូមួយដ៏ល្អសម្រាប់អនាគតប្រទេសជាតិរបស់យើង”។

គួររម្លឹកថា ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២២ បានប្រព្រឹត្តទៅរយៈពេល ៩ថ្ងៃ ចាប់ពីថ្ងៃទី២៩ ខែមេសា ដល់ថ្ងៃទី០៨ ខែឧសភា ឆ្នាំ២០២២ នៅរាជធានីភ្នំពេញ ដែលបានកំណត់យកប្រភេទកីឡាសក្តានុពលចំនួន៨ រួមមាន៖ កីឡាបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT និងតេក្ចាន់ដូ IFT ស្មើនឹង ៣៤វិញ្ញាសា សរុប ៤២៩ មេដាយ ដែលមានប្រតិភូ គ្រូបង្វឹក កីឡាករ កីឡាការិនីចូលរួមប្រកួតសរុប ១ ៦៧៧នាក់ អញ្ជើញមកពី ២៥រាជធានីខេត្ត៕

អត្ថបទ៖ មន្នីរ័ត្ន