កីឡា

Burn X Flash ឈ្នះជើងឯកលីគ MPL Cambodia 2022 បានកៅអីទៅជើងឯកពិភពលោក

បានផុស

១ year មុន

នៅ

ថ្ងៃចន្ទ ៣ តុលា ២០២២

ដោយ

ក្រុម Burn X Flash បានក្លាយជាម្ចាស់ជើងឯកព្រឹត្តិការណ៍ប្រកួតលីគអាជីព MPL-KH League 2022 វគ្គ Autumn Split សម្រាប់វិញ្ញាសា Mobile Legends: Bang Bang បន្ទាប់ពីឈ្នះ Logic Esports ក្នុងវគ្គផ្តាច់ព្រ័ត្រនៅផ្សារទំនើបអ៊ីអនសែនសុខ កាលពីល្ងាចថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃប្រកួតវគ្គផ្តាច់ព្រ័ត្រ MPL Cambodia Autumn Split ទទួលបានការចាប់អារម្មណ៍យ៉ាងខ្លាំងដោយមានអ្នកគាំទ្រចូលទស្សនាផ្ទាល់រហូតដល់២ពាន់នាក់។ ជាមួយគ្នានេះក៏មានអ្នកទស្សនិកទស្សនាតាមកញ្ចក់ LED យ៉ាងច្រើននៅខាងក្រៅផងដែរ។ អ្វីដែលកាន់តែពិសេសទៀតនោះ វាបានក្លាយជាប្រវត្តិសាស្ត្រថ្មីដែលមានអ្នកទស្សនាផ្សាយផ្ទាល់តាមអនឡាញរហូតដល់ ១១០ ០៤០នាក់។

«កំណើនអ្នកទស្សនាគឺជាសក្ខីកម្មមួយចំពោះសហគមលីគ MPL Cambodia ដែលកំពុងកើនឡើងឥតឈប់ឈរ។ យើងខ្ញុំសូមអរគុណដល់អ្នកគាំទ្រទាំងអស់ដែលបានគាំទ្រដល់លីគ ក្រុម និងកីឡាករ។ សូមបន្តគាំទ្រដល់ក្រុមទៀតដោយសារពួកគេត្រូវស្វែងរកឱកាសទៅចូលរួមប្រកួតប្រជែងជើងឯកពិភពលោក M4 World Championship»។ លោក Ray Ng ប្រធាន Esports Ecosystem នៅក្រុមហ៊ុន MOONTON Games មានប្រសាសន៍។

ជ័យជម្នះដោយលទ្ធផល ៣-១ ក្រុម Burn X Flash ទទួលបានការកោតសរសើរយ៉ាងខ្លាំងចំពោះការចូលរួម MPL Cambodia ដែលជាការប្រកួត MPL KH លើកដំបូងរបស់ពួកគេ។ ទន្ទឹមជាមួយគ្នានេះ កីឡាករ សុខ រ័ត្ន (រហស្សនាម “CCat”) បានក្លាយជាកីឡាករឆ្នើមបំផុតប្រចាំព្រឹត្តិការណ៍ប្រកួតផ្តាច់ព្រ័ត្រ។

Burn X Flash ដឹកនាំដោយលោកគ្រូបង្វឹកសញ្ជាតិហ្វីលីពីន លោក John Dizon។ ក្រុមនេះបាននាំចូលកីឡាករ Jhonwin Vergara និង Michael Endino ដែលជាអតីតកីឡាកររបស់ក្រុម Nexplay EVOS។

ចំណែក អតីតជើងឯកឆ្នាំចាស់គឺ See You Soon និង Impunity KH ទទួលបានចំណាត់ថ្នាក់លេខ៣ និងលេខ៤។ Burn X Flash ជាក្រុមដំបូងគេដែលទទួលបានកៅអីចូលរួមប្រកួតជើងឯកពិភពលោក M4 World Championship នៅទីក្រុងហ្សាកាតា ប្រទេសឥណ្ឌូនេស៊ី ខែមករា ឆ្នាំ២០២៣។

លីគ MPL-KH Autumn មានក្រុមទាំងអស់ចំនួន៨ដែលបានធ្វើការប្រកួតក្នុងវគ្គវិលជុំសន្សំពិន្ទុតាំងពីថ្ងៃទី៦ ខែសីហា ដល់ថ្ងៃទី៤ ខែកញ្ញា និងវគ្គខ្វែង (Playoff) ត្រូវប្រកួតចាប់ពីថ្ងៃទី១៧ ខែកញ្ញា ដល់ថ្ងៃទី១ ខែតុលា ហើយវគ្គផ្តាច់ព្រ័ត្រនៅថ្ងៃទី២ ខែតុលា ឆ្នាំ២០២២។