អ្នកគាំទ្រ បារាំងនិងអូស្រ្តាលី វាយគ្នាប្រាវ ក្រោយចប់ការប្រកួត

ភាពរីករាយនៃការទស្សនាការប្រកួតបាល់ទាត់ពិភពលោកតាមរយៈអេក្រង់ដ៏ធំ ក្នុងទីក្រុង Melbourne បានប្រែក្លាយទៅជាអំពើហិង្សា នៅពេលអ្នកគាំទ្រកុងហ្គូរូអូស្រ្តាលី វាយតប់ ស្ដោះទឹកមាត់ គប់ដប និងកំប៉ុង ដាក់អ្នកគាំទ្រក្រុមមាន់គកបារាំង មួយក្រុមតូច ដែលអបអរជ័យជម្នះរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្សរាប់ពាន់នាក់ បានប្រមូលផ្តុំគ្នានៅទីលានសហព័ន្ធ កាលពីព្រឹកថ្ងៃពុធ សម្រាប់ការប្រកួតដំបូងរបស់អូស្រ្តាលី ជាមួយនឹងក្រុមការពារជើងឯកបារាំង នៅប្រទេសកាតា។

ដំបូងឡើយ ភាពសប្បាយរីករាយបានផ្ទុះឡើង ដោយសារតែក្រុមអូស្រ្តាលី រកបានមួយគ្រាប់មុននៅនាទីទី៦ មុនពេលបារាំងវាយបកនាំមុខវិញនៅតង់ទី១ ហើយស៊ុតបានដល់ ៤ ទល់នឹង ១នៅចុងបញ្ចប់ការប្រកួត។

ភាពវឹកវរបានកើតឡើងភ្លាមៗ បន្ទាប់ពីការប្រកួតបានបញ្ចប់នៅម៉ោង៨ព្រឹក ដោយវីដេអូនិងរូបថតដែលគេបង្ហោះព្រោងព្រាតក្នុងបណ្តាញសង្គម បានបង្ហាញពីហ្វេនបារាំង ត្រូវរងការវាយប្រហារដោយ​ ហ្វេនអូស្រ្តាលី។

ការប្រវាយប្រតប់​ជា​ច្រើនលើក ​ក៏​បាន​ផ្ទុះ​ឡើង​នៅ​ក្នុង​ហ្វូង​មនុស្សផងដែរ ​ចំ​ពេល​មាន​សេចក្តី​រាយការណ៍​ថា ទង់ជាតិ​បារាំង​ ​ត្រូវ​បាន​គេ​ចាប់​ហែក។ វីដេអូ​ក៏​បានបង្ហាញ​ពីការគប់ភ្លើងផងដែរ។

ក្រោយ​មក ភាព​តានតឹង​បាន​ធូរស្រាល​បន្តិច​ ខណៈ​ហ្វូង​មនុស្ស​បាន​បំបែក​គ្នា​ដោយ​គ្មាន​ការ​ចាប់​ខ្លួន។

អ្នកនាំពាក្យប៉ូលិសរដ្ឋ Victoria បានប្រាប់ Daily Mail Australia ថា “ប៉ូលិសមិនទាន់ទទួលបានពាក្យបណ្តឹងណាមួយទេ ប៉ុន្តែនឹងស៊ើបអង្កេតរបាយការណ៍ ទាក់ទងនឹងហេតុការណ៍នេះ”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចាញ់ អារ៉ាប៊ីសាអូឌីត មែន តែ Messi បង្កើតកំណត់ត្រាបានមួយ កាលពីយប់មិញ