Pele បញ្ចុះសពជាន់ទី៩ អាច “មើលឃើញ” ទីលានបាល់ទាត់​ធ្វើឱ្យលោកល្បីល្បាញ

ព័ត៌មានលម្អិតនៃពិធីបុណ្យសពរបស់វីរបុរសបាល់ទាត់ Pele និងបំណងប្រាថ្នាចុងក្រោយត្រូវបានបង្ហាញ ខណៈដែលលោកនឹងត្រូវបញ្ចុះនៅចំកណ្តាលកីឡដ្ឋាន Santos ដែលជានិមិត្តរូប ហើយក៏មានការគោរពបូជាពិសេសដល់ឪពុករបស់លោកផងដែរ។

បំណងប្រាថ្នាចុងក្រោយរបស់ Pele គឺជ្រើសរើសជាន់ទី៩ នៃទីបញ្ចុះសពនៅក្នុងទីក្រុង Santos ដែលជាស្រុកកំណើតរបស់លោក សម្រាប់កន្លែងសម្រាកចុងក្រោយ។ វាក៏ជាការគោរពដ៏ក្រៀមក្រំមួយចំពោះឪពុកជាទីស្រឡាញ់របស់លោកផងដែរ ដែលតែងតែពាក់អាវលេខ៩ ក្នុងនាមជាកីឡាករ។

នៅពេលដែលងាកចេញពីកន្លែងដែលតំកល់មឈូសរបស់ Pele នឹងដាក់ជារៀងរហូត គេអាចមើលឃើញយ៉ាងច្បាស់នូវកីឡដ្ឋាន Santos ដ៏ល្បីនៅចម្ងាយកន្លះម៉ាយល៍ ខណៈអ្នកគាំទ្រជឿថា លោក Pele នឹងនៅតែងតែអាច “មើល” ទីលានបាល់ទាត់ដែលគាត់ចូលចិត្តជារៀងរហូត។

តារាប្រេស៊ីល ដែលជាបុរសតែម្នាក់គត់ក្នុងប្រវត្តិសាស្ត្រ បានឈ្នះពាន World Cup ចំនួន ៣ដង បានចំណាយពេលច្រើនក្នុងការជ្រើសរើសកន្លែង “បញ្ចុះសព” ចុងក្រោយរបស់លោក។ ប៉ុន្តែនៅទីបញ្ចប់ វាមិនមែនជាទីក្រុងដ៏អស្ចារ្យនៃទីក្រុង Rio de Janeiro ឬ Sao Paulo ដែលលោកបានជ្រើសរើសនោះទេ ប៉ុន្តែជាការសម្រេចចិត្តដ៏សាមញ្ញមួយដើម្បីគោរពឪពុករបស់លោក និងក្លិបចាស់របស់លោក។

ឪពុករបស់លោក គឺលោក Dondinho គឺជាខ្សែប្រយុទ្ធកណ្តាលដែលចូលចិត្តពាក់អាវលេខ៩ ហើយ Pele ចង់គោរពចំពោះឪពុករបស់លោក។

នៅថ្ងៃអង្គារ មឈូសរបស់ Pele នឹងត្រូវដាក់ចូលទៅក្នុងទូតំកល់ដោយថ្នមៗ និងដោយការសោកសង្រេងរបស់ក្រុមគ្រួសារ និងមិត្តភក្តិ។

ព័ត៌មានលម្អិតជាច្រើនជុំវិញពិធីនេះនៅតែជាអាថ៌កំបាំង ប៉ុន្តែសារព័ត៌មាន Mirror បានសរសេរថាមឈូសនឹងមានពណ៌មាសពិសេស ហើយនឹងមានចម្លាក់និងការឆ្លាក់រូប Pele ជាច្រើននៅលើចំហៀង។

មនុស្សរាប់សែននាក់រំពឹងថានឹងបានឃើញមឈូសរបស់លោក ខណៈដែលវាស្ថិតនៅកណ្តាលនៃកីឡដ្ឋាន។ បន្ទាប់មកនៅថ្ងៃអង្គារ សពរបស់លោកនឹងដង្ហែរឆ្លងកាត់ជាយក្រុង Santos ជាកន្លែងដែលម្តាយរបស់លោកដែលមានអាយុ ១០០ឆ្នាំ ឈ្មោះ Dona Celeste កំពុងរស់នៅ។

លោកស្រីមានសុខភាពមិនល្អ ហើយមិនត្រូវបានគេប្រាប់ពីការស្លាប់របស់កូនប្រុសលោកស្រីឡើយ។

លោក Gianni Infantino ប្រធាន FIFA នឹងចូលរួមពិធីបុណ្យសពនៅថ្ងៃស្អែកផងដែរ៕

ប្រភព៖ mirror.co.uk
អត្ថបទ៖ មន្នីរ័ត្ន