កីឡា

សុខ ធី ប្រាប់ថា ការមកវ៉ៃនៅខ្មែរជាការសម្រេចដ៏ល្អ តម្លៃខ្លួនជិតស្មើនៅថៃ

បានផុស

១ year មុន

នៅ

ថ្ងៃអង្គារ ២៤ តុលា ២០២៣

ដោយ

កីឡាករវ៉ៃក្បាច់ សុខ ធី បានសម្រេចចិត្តត្រឹមត្រូវដែលបានមកបន្តអាជីពប្រដាល់គុនខ្មែរនៅប្រទេសកម្ពុជា បន្ទាប់ពីប្រកបអាជីពប្រដាល់នៅប្រទេសថៃអស់រយៈពេលជាច្រើនឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សុខ ធី ដែលទើបតែបានឈ្នះពានរង្វាន់ម៉ារ៉ាតុនកាលពីថ្ងៃអាទិត្យ ទី២២ ខែតុលា ឆ្នាំ២០២៣ បាននិយាយថា ការសម្រេចចិត្តប្រកបអាជីពនៅកម្ពុជាជារឿងដែលត្រឹមត្រូវ ពីព្រោះទទួលបានឱកាសប្រកួតធំៗ និងញឹកញាប់ជាងនៅប្រទេសថៃ។

កីឡាកររបស់ក្លិបឧកញ៉ា ស្រី ចាន់ថន បានសង្កត់ធ្ងន់ថា ៖«ការមកប្រកួតនៅខ្មែរមិនខុសប្លែកអ្វីច្រើននឹងការប្រកួតនៅថៃទេ។ គ្រាន់តែខុសប្លែកតិចតួច តម្លៃខ្លួនក៏មិនចាញ់នៅថៃប៉ុន្មានដែរ គឺបានតម្លៃខ្លួនជិតស្មើនៅថៃដែរ។ និយាយទៅ មកខ្មែរ ខ្ញុំសប្បាយចិត្តណាស់ ដោយសារយើងបានលេងព្រឹត្តិការណ៍ធំៗ ដណ្តើមពាន ដណ្តើមខ្សែក្រវាត់»។

សុខ ធី បាននាំប្រពន្ធ និងកូនមកស្នាក់នៅ ប្រកបអាជីពប្រដាល់នៅកម្ពុជារយៈពេលប៉ុន្មានខែកន្លងទៅហើយដោយបានស្នាក់នៅហ្វឹកហាត់ជាមួយក្លិបរបស់ឧកញ៉ា ស្រី ចាន់ថន។ រូបគេបានឡើងប្រកួតប្រហែលជា៣ដងហើយដោយទទួលបានជ័យជម្នះទាំងអស់។

ជាពិសេស រូបគេទទួលបានឱកាសប្រកួតដណ្តើមពានរង្វាន់ម៉ារ៉ាតុនដោយបានយកឈ្នះកីឡាកររុស្ស៊ីដោយពិន្ទុក្នុងវគ្គជម្រុះជុំទី១ និងបានឈ្នះកីឡាករប្រេស៊ីល អាឡិច សាន់ដ្រូ នៅវគ្គផ្តាច់ព្រ័ត្រដើម្បីក្លាយជាម្ចាស់ពានរង្វាន់ ព្រមទាំងទទួលបានឱកាសទៅប្រកួតដណ្តើមខ្សែក្រវាត់លំដាប់ពិភពលោកនាពេលខាងមុខ។

នេះជាសមិទ្ធផលសំខាន់ទី២ក្នុងអាជីពប្រដាល់របស់ សុខ ធី បន្ទាប់ពីធ្លាប់ឈ្នះខ្សែក្រវាត់គុនខ្មែរអន្តរជាតិ កាលពីឆ្នាំ២០១៨ នៅសង្វៀនបាយ័ន ក្នុងប្រទេសកម្ពុជា ខណៈការប្រកបអាជីពនៅប្រទេសថៃមិនធ្លាប់ឈ្នះខ្សែក្រវាត់ ឬពានរង្វាន់ធំឡើយ៕