ល្អដូចឪពុកអ៊ីចឹង! Ronaldo Jr ស៊ុត ២ គ្រាប់ ជួយឱ្យព័រទុយហ្គាល់ U១៥ លើកពាន Vlatko Markovic

កូនប្រុសបង្កើតរបស់កំពូលកីឡាករបាល់ទាត់ Cristiano Ronaldo យុវជន Cristiano Ronaldo Jr បានស៊ុតបញ្ចូលទី ២ គ្រាប់យ៉ាងអស្ចារ្យនៅក្នុងការប្រកួតវគ្គផ្តាច់ព្រ័ត្រពាន Vlatko Markovic ២០២៥ អាយុក្រោម ១៥ ឆ្នាំកាលពីយប់ថ្ងៃ អាទិត្យ ទី ១៨ ខែ ឧសភា ម្សិលមិញ។

Cristiano Ronaldo Jr ដែលបច្ចុប្បន្នមានវ័យ ១៤ ឆ្នាំ ពិតជាបង្ហាញសមត្ថភាពលេចធ្លោរមែនទែន បន្ទាប់ពីរូបគេស៊ុតបញ្ចូលទី ២ គ្រាប់ ជួយឱ្យក្រុមជម្រើសជាតិ ព័រទុយហ្គាល់ អាយុក្រោម ១៥ ឆ្នាំយកឈ្នះលើក្រុម ក្រូអាត អាយុក្រោម ១៥ ឆ្នាំក្នុងលទ្ធផល ៣ ទល់នឹង ២ នៅក្នុងការប្រកួតវគ្គផ្តាច់ព្រ័ត្រពាន Vlatko Markovic ២០២៥ អាយុក្រោម ១៥ ឆ្នាំ។

នេះគឺជាគ្រាប់បាល់ដំបូងរបស់ Ronaldo Jr ក្នុងការបង្ហាញខ្លួនជាមួយក្រុម ព័រទុយហ្គាល់ អាយុក្រោម ១៥ ឆ្នាំ ខណៈរូបគេក៏បានប្រើស្ទាយ៍អបអរ Siuu តាម CR7 ដែលជាឪពុករបស់ខ្លួនផងដែរ បន្ទាប់ពីរកបានគ្រាប់បាល់ទី ១។ យុវជនដែលកំពុងហ្វឹកហាត់នៅក្លិប Al-Nassr រូបនេះ ទទួលបានការចាប់អារម្មណ៍ខ្លាំងមែនទែន ពីសំណាក់អ្នកគាំទ្រនៅទូទាំងពិភពលោក។ ជាមួយគ្នានេះ មានការលើកឡើងថា យុវជនរូបនេះនឹងអាចក្លាយជាអ្នកស្នងតំណែងឪពុករបស់គេនាពេលអនាគតទៀតផង៕

អត្ថបទ៖ សេម កុសល