ស្ថិតិដ៏ល្អរបស់លោក Pep Munoz ដឹកនាំក្លិប​ព្រះខ័នរាជស្វាយរៀង ២ រដូវកាល

មុនចាកចេញពីក្លិប​ ព្រះខ័នរាជស្វាយរៀង លោក Pep Munoz បានបន្សល់ទុកនូវកំណត់ត្រា និងស្ថិតិអស្ចារ្យជាច្រើនក្នុងការដឹកនាំ ២ រដូវកាលកន្លងមក។

កាលពីថ្ងៃ អង្គារ៍ ទី ២០ ខែ ឧសភា លោក Pep Munoz បានប្រកាសជាផ្លូវការហើយ ថា លោកនឹងចាកចេញពីក្លិបព្រះខ័នរាជស្វាយរៀង នៅចុងបញ្ចប់រដូវកាល ២០២៤-២០២៥ នេះ បន្ទាប់ពីបញ្ចប់ការប្រកួតវគ្គផ្តាច់ព្រ័ត្រពានសម្តេចអគ្គមហាសេនាបតីតេជោ ហ៊ុន សែន ទល់នឹង ភ្នំពេញក្រោន នៅពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៥ ខែ ឧសភា ចុងសប្តាហ៍នេះ។

ព័ត៌មាន​ពី​ការចាកចេញពីក្លិបព្រះខ័នរាជស្វាយរៀង​របស់​លោក Munoz បានធ្វើឱ្យអ្នកគាំទ្រសោកស្តាយជាខ្លាំង ដោយសារលោកជាគ្រូបង្វឹកម្នាក់ ដែលមានភាពប៉ិនប្រសប់ក្នុងការដឹកនាំក្រុម និងបានជួយឱ្យក្លិបឈ្នះពានជាច្រើនក្នុងរយៈពេល ២ រដូវកាល។ ក្នុងនោះសមិទ្ធផលរបស់លោក បានជួយឱ្យក្លិប ដែលមានមូលដ្ឋាននៅខេត្តស្វាយរៀង ឈ្នះពានលីគ ២ រដូវកាលជាប់គ្នា, ឈ្នះពានរង្វាន់សម្តេចតេជោ ១ លើកនៅរដូវកាលមុន, ពានបើករដូវកាល Cambodian Super Cup ១ លើក និងជើងឯករងពានរង្វាន់ AFC Challenge League ខណៈ​កំពុង​ស្ថិត​នៅ​វគ្គ​ផ្តាច់​ព្រ័ត្រ ពាន​រង្វាន់​សម្តេច​តេជោ​រដូវ​កាល​នេះ​ថែម​ទៀត។

ងាកមកចាប់អារម្មណ៍នឹងស្ថិតិដឹកនាំវិញ លោកពិតជាធ្វើបានល្អមែនទែន ដោយគិតត្រឹមពេលនេះ លោកដឹកនាំព្រះខ័នរាជស្វាយរៀង បានចំនួន ៨៨ ប្រកួត ឈ្នះ ៦៧ ប្រកួត ស្មើ ៨ និងចាញ់ ១៣ ប្រកួត សម្រាប់​ការ​ដឹក​នាំ​ប្រកួត​លីគ​កំពូល​កម្ពុជា​២​រដូវ​កាល, ពាន​សម្តេច​តេជោ ហ៊ុន សែន ២​រដូវ​កាល, ពានខេមបូឌានស៊ុបភើ​ខាប់​ឆ្នាំ​២០២៤, ពានក្លិប​អាស៊ាន Shopee Cup និងពាន​ក្លិប​អាស៊ី AFC Challenge League។

គួររម្លឹកថា លោក Pep Munoz ត្រូវបានព្រះខ័នរាជស្វាយរៀង ចុះកុងត្រាមកជំនួសតំណែងលោក Conor Nestor កាលពីថ្ងៃទី ៦ ខែ ឧសភា ឆ្នាំ ២០២៣៕

អត្ថបទ៖ សេម កុសល