នេះ​មូលហេតុពិត នៅពីក្រោយការជ្រើសរើសលោក McConkey ជាគ្រូបង្វឹកថ្មីបន្តពី Munoz

នៅរសៀលថ្ងៃ អង្គារ៍ ទី ៣ ខែ មិថុនា នេះក្លិបព្រះខ័នរាជស្វាយស្វាយរៀង បានប្រកាសតែងតាំងគ្រូបង្វឹកថ្មី មកជំនួសលោក Pep Munoz ជាផ្លូវការហើយ គឺអតីតគ្រូជំនួយលោក Matthew McConkey។

ជុំវិញការសម្រេចចិត្តជ្រើសរើសលោក McConkey ជាគ្រូបង្វឹកថ្មីរបស់ព្រះខ័នរាជស្វាយរៀងសម្រាប់រដូវកាល ២០២៥-២០២៦ លោក Christopher Grant អ្នកចាត់ការទូទៅរបស់ក្លិប បានពន្យល់អំពីមូលហេតុសំខាន់ៗមួយចំនួន ដែលក្លិបជ្រើសយកបុរសសញ្ជាតិ អៀរឡង់ រូបនេះ។ លោក​គ្រូបង្វឹកម្នាក់ ដែលមានបទពិសោធ​ច្រើន​ជាមួយព្រះខ័នរាជស្វាយរៀងក្នុងនាមជាគ្រូជំនួយរយៈពេល ៤ ឆ្នាំមកហើយ ហើយលោកក៏បានយល់ច្បាស់រចនាសម្ព័ន្ធរបស់ក្លិប​ផងដែរ។ ជាមួយគ្នានេះ ការជោគជ័យដ៏ធំរបស់ព្រះខ័នរាជស្វាយរៀង ២ រដូវកាលចុងក្រោយនេះ លោកបានរួមចំណែកយ៉ាងធំ ក្នុងការជួយក្រុមកន្លងមក។

ថ្លែងនៅក្នុងសន្និសីទកាសែត កាលពីរសៀលថ្ងៃ អង្គារ៍ ទី ៣ នេះ លោក Christopher Grant បានមានប្រសាសន៍ថា៖ «មូលហេតុជ្រើសរើសលោក Mathew McConkey ជាគ្រូបង្គោលថ្មីបន្តពីលោក Pep Munoz ដោយសារយើងបានដឹងហើយថា លោកគ្រូ McConkey បាននៅជាមួយក្លិបព្រះខ័នរាជស្វាយរៀង រយៈពេល ៤ ឆ្នាំ។ គាត់បានធ្វើការជាមួយ ២ គ្រូ គឺលោក Conor និងលោក Pep ដូច្នេះគាត់បានស្គាល់បរិយាកាសជុំវិញ បុគ្គលិក កីឡាករ ក៏ដូចជាលីគក្នុងប្រទេស កម្ពុជា របស់យើង»។

លោក Christopher បានបន្ថែមទៀតថា ៖«មួយរយៈចុងក្រោយនៅពេលដែល ក្រុមរបស់យើងទទួលបានភាពជោគជ័យមួយចំនួន ដូចជាយើងឈ្នះពានលីគ ២ ឆ្នាំជាប់គ្នា ឈ្នះពានសម្តេចតេជោ ហ៊ុន សែន ឡើងទៅវគ្គផ្តាច់ព្រ័ត្រ AFC Challenge League ក៏ជាចំណែកជាច្រើនរបស់លោកគ្រូ McConkey នៅក្នុងការនាំភាពជោគជ័យមកកាន់ក្លិបពួកយើង ហើយគាត់ជាមនុស្សម្នាក់ ដែលជាគន្លឹះសំខាន់ នៃការជោគជ័យទាំងអស់នោះ»។

គួរបញ្ជាក់ថា លោក McConkey គឺជាគ្រូបង្វឹកកាន់អាជ្ញាប័ណ្ណកម្រិត UEFA A License ហើយលោកបានចុះកិច្ចសន្យាជាមួយព្រះខ័នរាជស្វាយរៀង រយៈពេល ១ រដូវកាល អមជាមួយជម្រើសបន្ត ១ រដូវកាលបន្ថែមទៀត៕

អត្ថបទ៖ សេម កុសល