កីឡា

កីឡាករ រុន សុខជា លេចធ្លោខ្លាំងម្សិលមិញក្នុងការប្រកួតមិត្តជាមួយក្រុមប៉ូលីសវៀតណាម

បានផុស

៣ នាទីutes មុន

នៅ

ថ្ងៃចន្ទ ២៣ មិថុនា ២០២៥

ដោយ

កីឡាករទះ រុន សុខជា ល្ងាចម្សិលមិញនេះបង្ហាញទម្រង់លេងយ៉ាងល្អ និងលេចធ្លោខ្លាំងដោយផ្ដាច់បាល់ដាច់ៗធ្ងន់ក្នុងជំនួបមិត្តភាពអន្តរជាតិរវាងក្លឹបបាល់ទះវិសាខា ជាមួយក្រុមបាល់ទះនគរបាលក្រុងហូជីមិញក្នុងវិមានពហុកីឡដ្ឋានជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពលើផេកសហព័ន្ធបាល់ទះ

ការប្រកួតដែលធ្វើឡើងអស់រយៈពេល ៤សិតមកនេះគឺក្រុមបាល់ទះវិសាខារបស់កម្ពុជាបានយកឈ្នះលើក្រុមបាល់ទះនគរបាលក្រុងហូជីមិញ ដោយលទ្ធផល ៣-១។ ដែលជាការចាប់អារម្មណ៍ និងមើលឃើញថាលេចធ្លោខ្លាំងនោះគឺកីឡាករ រុន សុខជា ដែលលេងបានល្អខ្លាំងតាមរយៈការផ្ដាច់បាល់៣ម៉ែត្របានល្អ និងធ្ងន់ៗរបស់គេ។

រូបភាពលើផេកសហព័ន្ធបាល់ទះ

សុខជា មានបាល់លេងច្រើនក្នុងជំនួបម្សិលមិញនេះដោយអ្នកលើកបាល់ កែវ ស្រេងលីហួរ បានបោះទៅឲ្យគេផ្ដាច់ជាច្រើនគ្រាន់។ នេះអាចមកពី សុខជា ផ្ដាច់បានល្អរកពិន្ទុបានច្រើនទើបអ្នកលើកបាល់បោះបាល់ទៅបានច្រើនដូចនេះ។ កីឡាករពាក់អាវលេខ ២១ រូបនេះលេងដោយទំនុកចិត្តខ្ពស់ មិនបារម្ភច្រើន និងវាយផ្ដាច់បាល់អស់ៗតែម្ដង។

ក្រៅតែពីការលោតផ្ដាច់ហើយនោះ សុខជា ក៏វាយសេវាបានល្អដែរ ពោលធ្ងន់ហើយលឿន។ តាមរយៈចំណុចល្អទាំងនេះបានធ្វើឲ្យ រុន សុខជា លេចធ្លោខ្លាំងកាលពីម្សិលមិញនេះមិនចាញ់កីឡាករលេខ ៩ វឿន វាសនា ប៉ុន្មានទេក្នុងជំនួបមិត្តភាពអន្តរជាតិមួយនេះ។

រូបភាពលើផេកសហព័ន្ធបាល់ទះ

បញ្ជាក់ដែរថា ការប្រកួតបាល់ទះមិត្តភាពរវាងក្លឹបបាល់ទះវិសាខា របស់កម្ពុជា និងក្រុមបាល់ទះនគរបាលក្រុងហូជីមិញ នេះធ្វើឡើងកាលពីល្ងាចថ្ងៃទី២២ ខែមិថុនា ឆ្នាំ២០២៥ នៅវិមានពហុកីឡដ្ឋានជាតិ។ ការប្រកួតនេះដែរក៏ជាការប្រកួត ដើម្បីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀនផងដែរ។ ជំនួបមិត្តភាពនេះក្លឹបបាល់ទះវិសាខា យកឈ្នះលើក្រុមមកពីវៀតណាមដោយលទ្ធផល ៣-១ (២២-២៥, ២៥-១៥, ២៥-១៨, ២៥-២១)៕