ការគេង Archives - Kampuchea Thmey Daily

អ្នកជំនាញរកឃើញថា ការគេងនៅបន្ទប់ត្រជាក់ជួយពន្យាភាពចាស់ និងសម្រួលសុខភាព

Minea Neu — Mon, 19 Jan 2026 07:40:12 +0000

ប្រសិនបើអ្នកធ្លាប់បន្ថយកម្តៅម៉ាស៊ីនត្រជាក់នៅពេលយប់ ហើយឆ្ងល់ថាតើវាពិតជាល្អសម្រាប់អ្នកឬអត់ អ្នកវិទ្យាសាស្រ្តនិយាយថា វាជាការល្អ។

ការស្រាវជ្រាវដែលត្រូវបានផ្សាយនៅក្នុង Journal of Clinical Endocrinology & Metabolism បានសិក្សាអំពីការគេង និងមេតាបូលីស [ដំណើរការគីមីដែលកើតឡើងក្នុងសារពាង្គកាយមានជីវិត] ផ្សេងទៀត បង្ហាញថា ការគេងក្នុងអាកាសធាតុត្រជាក់អាចធ្វើលើសពីការកែលម្អគុណភាពនៃការគេង ដែលអាចជួយជំរុញការដុតបំផ្លាញជាតិខ្លាញ់ និងអាចកាត់បន្ថយដំណើរការនៃភាពចាស់។

រូបភាព Stylist.

យោងតាមគេហទំព័រ Shefinds, អត្ថប្រយោជន៍នេះភាគច្រើនកើតឡើងពីរបៀបដែលរាងកាយឆ្លើយតប ទៅនឹងការប៉ះពាល់នឹងភាពត្រជាក់អំឡុងពេលគេង ជាពិសេសតាមរយៈការធ្វើឱ្យខ្លាញ់ពណ៌ត្នោត ជាប្រភេទខ្លាញ់សកម្មរបស់មេតាបូលីសដែលដើរតួនាទីយ៉ាងសំខាន់ក្នុងការផលិតកម្តៅ។

លោក Michael Symonds សាស្ត្រាចារ្យផ្នែកសរីរវិទ្យាអភិវឌ្ឍន៍នៅសាកលវិទ្យាល័យ Nottingham ក្នុងចក្រភពអង់គ្លេស លើកឡើងថា៖«នៅពេលដែលរាងកាយត្រូវបានរំញោច ជាតិខ្លាញ់ពណ៌ត្នោតមានសមត្ថភាពផលិតកម្តៅ ៣០០ដង ក្នុងមួយឯកតាម៉ាស់ច្រើនជាងជាលិកា ឬសរីរាង្គផ្សេងទៀតនៅក្នុងរាងកាយ» ។

នៅក្នុងការសិក្សាមួយដែលបានលើកឡើងថា អ្នកដែលបានគេងនៅក្នុងបន្ទប់ត្រជាក់អស់រយៈពេលជាច្រើនសប្តាហ៍ បានចួបនឹងការកើនឡើងនៃបរិមាណជាតិខ្លាញ់ពណ៌ត្នោត ធ្វើអោយប្រសើរឡើងនូវភាពប្រែប្រួលអាំងស៊ុយលីន[អរម៉ូនដែលផលិតនៅក្នុងលំពែង]។ នេះមានន័យថា រាងកាយរបស់ពួកគេបានប្រសើរឡើងក្នុងការគ្រប់គ្រងជាតិស្ករក្នុងឈាម និងការដុតកាឡូរី សូម្បីតែពេលសម្រាកក៏ដោយ។

គួរឱ្យដឹងផងដែរថា ដោយសារតែការគេងគឺជាដំណាក់កាលមួយដែលរាងកាយផ្តោតលើការថែទាំ និងការគ្រប់គ្រងការរំលាយអាហារ ការបន្ថែមការប៉ះពាល់នឹងភាពត្រជាក់ស្រាលអាចពង្រីកដំណើរការធម្មជាតិ ដែលអនុញ្ញាតឱ្យរាងកាយដុតថាមពលកាន់តែច្រើននៅពេលសម្រាក។

លើសពីការរំលាយអាហារ ការគេងនៅក្នុងបន្ទប់ត្រជាក់ក៏អាចកាត់បន្ថយភាពចាស់និងមានសុខភាពល្អផងដែរ។ ការគេងប្រកបដោយគុណភាពត្រូវបានផ្សារភ្ជាប់យ៉ាងតឹងរ៉ឹងទៅនឹងការជួសជុលកោសិកា តុល្យភាពអ័រម៉ូន និងការគ្រប់គ្រងការរលាក ដែលជាកត្តាសំខាន់ទាំងអស់នៅក្នុងរាងកាយរយៈពេលវែង។

ចំណែកសីតុណ្ហភាពត្រជាក់ជួយជំរុញការបញ្ចេញជាតិ Melatonin ដែលជាអរម៉ូនមួយ មិនត្រឹមតែគ្រប់គ្រងវដ្តនៃការគេងប៉ុណ្ណោះទេ ប៉ុន្តែវាក៏មានលក្ខណៈសម្បត្តិប្រឆាំងអុកស៊ីតកម្មរបស់វាផងដែរ។ កម្រិត melatonin ខ្ពស់ត្រូវបានផ្សារភ្ជាប់ជាមួយនឹងការថយចុះនៃភាពតានតឹងអុកស៊ីតកម្ម ដែលដើរតួយ៉ាងសំខាន់នៅក្នុងភាពចាស់នៃស្បែក និងការខូចខាតកោសិកាទាំងមូល។

អ្នកជំនាញរកឃើញថាការគេងដែលមានភាពល្អប្រសើរ ណែនាំឱ្យរក្សាសីតុណ្ហភាពបន្ទប់គេងក្នុងចន្លោះពី ១៥.៥°C ដល់ ១៩.៥°C តែគោលដៅនេះមិនងាយស្រួលទេ ប៉ុន្តែវាជាភាពត្រជាក់ស្រាលដែលជំរុញឱ្យរាងកាយបង្កើតកម្តៅដោយធម្មជាតិ៕

ប្រែសម្រួល៖ ណឺ មិនា

The post អ្នកជំនាញរកឃើញថា ការគេងនៅបន្ទប់ត្រជាក់ជួយពន្យាភាពចាស់ និងសម្រួលសុខភាព appeared first on Kampuchea Thmey Daily.

តើអ្នកដឹងទេ ការគេងស្កប់ស្កល់ជួយពង្រឹងការចងចាំ និងបង្កើតគំនិតច្នៃប្រឌិត?

Ken Malis — Wed, 19 Feb 2025 03:57:18 +0000

ដំណេកដ៏ស្កប់ស្កល់មួយ គឺមានសារៈប្រយោជន៍ខ្លាំងណាស់សម្រាប់មនុស្សម្នាក់ ដូចជាជួយពង្រឹងការចងចាំ ជួយសម្រួលអារម្មណ៍ បង្កើតគំនិតច្នៃប្រឌិត ជួយឱ្យកោសិកាជួសជុលខ្លួនឡើងវិញ ជំរុញប្រព័ន្ធការពារខ្លួន សម្រួលប្រព័ន្ធមេតាបូលិក និងអាចកាត់បន្ថយជំងឺវង្វេងចាស់ ( Alzheimer’s disease)។ ប្រសិទ្ធភាពដំណេក គឺទាក់ទងយ៉ាងជិតស្និទ្ធជាមួយសកម្មភាពរបស់កោសិកាខួរក្បាល ដែលយើងអាចមើលឃើញតាមការវាស់រលកចរន្តអគ្គិសនីកោសិកា។

បើតាមប្រភពពីមន្ទីរពេទ្យកាល់ម៉ែត អគ្គបញ្ជាការដ្ឋាននៃដំណេក គឺនៅក្នុងអ៊ីប៉ូតាលាម៉ុស(Hypothalamus)។ ចលនការនៃដំណេក គឺស្មុគស្មាញ និងមានការចូលរួមពីតំបន់ផ្សេងៗទៀតរបស់ខួរក្បាល និងពពួកណឺរ៉ូត្រង់ម៉ែ្សទ័រ និងអរម៉ូនមួយចំនួន។ ដំណេកត្រូវបានកំណត់ដោយកត្តាធំៗពីរគឺ វដ្តទិនទិវា (circadian rhythm) ដែលចាត់ជានាឡិកានៃដំណេក និងលំនឹងដំណេក និងពេលភ្ញាក់ (sleep-wake homeostasis )។ ប្រព័ន្ធទាំងនេះ ទាក់ទងនឹងពន្លឺថ្ងៃដែលចូលតាមស្រទាប់រ៉េទីនរបស់ភ្នែកដើម្បីបញ្ឈប់ ឬជំរុញការបញ្ចេញជាតិមេឡាតូនីន ការប្រែប្រួលសីតុណ្ហភាពរាងកាយ និងកម្រិតអរម៉ូន គ័រទីសុលក្នុងឈាម។

ការប៉ះពាល់ចំនុចណាមួយនៅក្នុងប្រព័ន្ធនេះ គឺអាចរំខានដំណេកដ៏ស្កប់ស្កល់របស់យើងបាន។ តាមការសិក្សាមួយចំនួនបានបង្ហាញថា មានមនុស្សពេញវ័យប្រហែល ២០ ទៅ ២៨ % ដែលមានបញ្ហាពិបាកសម្រាន្តនៅពេលណាមួយ។ សូមកុំរំពឹងលើថ្នាំសម្រាន្ត ព្រោះការប្រើប្រាស់យូរអាចរំខានដល់លំនឹងប្រព័ន្ធធម្មជាតិរបស់យើង ឬអាចទៅជាញៀន។ គួរជ្រើសរើសការព្យាបាលដោយវិធីផ្លាស់ប្តូរ ទម្លាប់ និងកត្តាដែលរំខានការសម្រាន្តវិញ (Cognitive Behavioral Therapy)។

១. កំណត់កត្តារំញោច

ចូលទៅលើគ្រែ តែពេលងងុយ កុំទម្រេតខ្លួនលេងលើគ្រែយូរ ហើយកុំមើលទូរទស្សន៍ ឬប្រើគ្រឿងអេឡិចត្រូនិចលើគ្រែ។ បើក្រោយ ២០ ទៅ ៣០នាទី ហើយនៅតែមិនអាចគេងលក់ អ្នកអាចងើបទៅបន្ទប់ផ្សេង ធ្វើអ្វីមួយដោយស្ងប់ស្ងាត់ រហូតដល់ងងុយទើបត្រលប់ទៅចូលគ្រែសម្រាន្តវិញ។ ភ្ញាក់ពីដំណេក នៅម៉ោងដដែលជារៀងរាល់ថ្ងៃ ទោះថេរវេលានៃការសម្រាន្តលក់ប៉ុណ្ណាក៏ដោយ។ រៀបចំបរិយាកាសមុនសម្រាន្ត ដើម្បីឱ្យអារម្មណ៍ធូរស្រាល ដូចជាអានសៀវភៅ ឬ ងូតទឹកក្តៅឧណ្ហ៍ៗ។

២. បន្ថយចំនួនម៉ោងសម្រាន្ត

ដើម្បីបង្កើនគុណភាពនៃការសម្រាន្ត (Sleep restriction therapy)៖ បន្ថយចំនួនម៉ោងចំនាយលើគ្រែ ដើម្បីផ្សារភ្ជាប់ នឹងចំនួនម៉ោង/សម្រាន្តលក់ វិធីនេះគឺបង្កើនទម្លាប់សម្រាន និងជួយពង្រឹងការសម្រាន្តលក់។ បង្កើនថេរវេលាលើគ្រែ តាមប្រសិទ្ធភាពនៃដំណេក (ប្រសិទ្ធភាពដំណេក = ម៉ោងសម្រាន/ ម៉ោងស្ថិតនៅលើគ្រែ) និងរៀបចំរចនាសម្ព័ន្ធនៃការគិត។ រកមើលគំនិត អវិជ្ជមាន អំពីការសម្រាន្ត ឧទាហរណ៍: “ខ្ញុំ នឹង មិនអាចសម្រាន្តលក់យប់នេះ” ឬ “ខ្ញុំត្រូវការ យ៉ាងហោចណាស់ ៨ម៉ោង នៃដំណេកដើម្បីធ្វើការបាន”។ ជំនួសដោយការគិត និងជំនឿជាក់ស្តែង “ទោះបីខ្ញុំមិនអាចសម្រាន្តលក់យប់នេះ ខ្ញុំនៅតែអាចធ្វើការបាននៅថ្ងៃស្អែក”។

បន្ថែមពីនេះ លោកអ្នកអាចសមាធិ ដោយដកដង្ហើមចូលជ្រៅៗ ហាត់ដកដង្ហើមចូលជ្រៅៗ ដើម្បីបន្ថយសម្ពាធសាច់ដុំ។ ប្រឹង រួចពន្លាសាច់ដុំរាងកាយ ដើម្បីបន្ថយសម្ពាធដងខ្លួន។ សមាធិ ផ្ចង់អារម្មណ៍លើដង្ហើម ឬរូបភាពស្រទន់ណាមួយ ដើម្បីឱ្យអារម្មណ៍ស្ងប់ស្ងាត់។

ផ្ទុយពីការបង្ខំខ្លួនយើងឱ្យសម្រាន្ត ព្យាយាមនៅភ្ញាក់ វិធីនេះជួយបន្ថយការថប់អារម្មណ៍ អំពីការសម្រាន្តលក់ និងជួយឱ្យមានការសម្រាន្តលក់បែបធម្មជាតិវិញ។ កត់ត្រាម៉ោងពេលសម្រាន្ត ពេលភ្ញាក់ ចំនួនភ្ញាក់ពេលយប់ និងគុណភាពនៃការសម្រានលក់ អាចជួយឱ្យគ្រូពេទ្យមើលពីទំនោរនៃការសម្រានរបស់យើង និងណែនាំបន្ត។

៣. កត្តាដែលនាំឱ្យជោគជ័យ

-ត្រូវព្យាយាម អាចត្រូវការពេលវេលា ច្រើនអាទិត្យដែរដើម្បីមើលឃើញពីការធូរស្រាល

– និយាយពិភាក្សាជាមួយគ្រូពេទ្យពីការលំបាកផ្សេងៗដែលរំខានដំណេក

ការព្យាបាលដោយផ្លាស់ប្តូរទម្លាប់ គំនិតនេះ គឺជាការព្យាបាលដែលបានបង្ហាញពីប្រសិទ្ធភាពយូរអង្វែង ដើម្បីកែប្រែការពិបាកសម្រាន្តដោយជៀសវាងការប្រើប្រាស់ថ្នាំ៕

ប្រភពពីមន្ទីរពេទ្យកាល់ម៉ែត

The post តើអ្នកដឹងទេ ការគេងស្កប់ស្កល់ជួយពង្រឹងការចងចាំ និងបង្កើតគំនិតច្នៃប្រឌិត? appeared first on Kampuchea Thmey Daily.

ហេតុអ្វីបានជាមនុស្សគេងលក់ តែងតែយល់សប្តិ?

សាង ស្រីល័ក្ខ — Wed, 24 Jul 2024 01:36:23 +0000

តើអ្នកធ្លាប់ឆ្ងល់ថាហេតុអ្វីបានជាយើងត្រូវតែគេងសុបិន? ដូច្នេះតើសុបិនទាំងនោះចង់ប្រាប់យើងពីអ្វី? ហើយពេលយើងគេង តើមានអ្វីកើតឡើងចំពោះរាងកាយយើង?

នៅពេលគេង រាងកាយរបស់អ្នកនឹងឆ្លងកាត់ការផ្លាស់ប្តូរជាច្រើន។ នេះអនុញ្ញាតឲ្យរាងកាយសម្រាកពេញលេញ ហើយក៏មានសារៈសំខាន់សម្រាប់សុខភាពទូទៅផងដែរដូចជា ការគេងជួយឲ្យខួរក្បាល និងរាងកាយដើរយឺត ហើយចូលទៅក្នុងដំណើរការងើបឡើងវិញ។ ជាលទ្ធផល រាងកាយនិងចិត្តដំណើរការបានល្អនៅថ្ងៃបន្ទាប់ និងក្នុងរយៈពេលវែង អ្វីដែលកើតឡើងនៅពេលអ្នកគេងមិនលក់គឺជាដំណើរការមូលដ្ឋានមួយ វាប៉ះពាល់ដល់ការគិត ការផ្តោតអារម្មណ៍ កម្រិតថាមពល និងអារម្មណ៍ ដូច្នេះការគេងឲ្យបានគ្រប់គ្រាន់គឺមានសារៈសំខាន់ខ្លាំងណាស់សម្រាប់មនុស្សពេញវ័យ ហើយរឹតតែពិសេសទៀតសម្រាប់កុមារ និងយុវវ័យ។

ដូច្នេះតើអ្វីបណ្តាលឲ្យលោកអ្នកត្រូវគេងយល់សុបិន?

រហូតមកដល់ពេលនេះ វាមិនត្រូវបានគេបញ្ជាក់ច្បាស់ថា ហេតុអ្វីបានជាមនុស្សគ្រប់គ្នាត្រូវតែយល់សប្តិ។ ប៉ុន្តែមានការរំពឹងទុកគួរឲ្យចាប់អារម្មណ៍មួយចំនួននិងការស្រាវជ្រាវអំពីមូលហេតុដែលអាចកើតមាននៃសុបិន។

-យល់សប្តិ ពីព្រោះខួរក្បាលរៀបចំការចងចាំរបស់ខ្លួន។

-យល់សប្តិដោយសារតែឥទ្ធិពលនៃគំនិត ភាពតានតឹង និងអារម្មណ៍របស់យើង។

-យល់សប្តិដោយសារតែសារធាតុគីមី និងចរន្តអគ្គិសនីនៅក្នុងខួរក្បាលផ្លាស់ប្តូរ។

-យល់សប្តិព្រោះវាជាសញ្ញានៃជំងឺនៅក្នុងខ្លួន។

ការយល់សប្តិកើតឡើងញឹកញាប់ និងខ្លាំងបំផុតក្នុងអំឡុងពេលដំណេកដំណាក់កាលទី 4 (REM) ប៉ុន្តែវាអាចកើតឡើងក្នុងដំណាក់កាលនៃការគេងណាមួយ។ កន្លែងដែលសុបិន REM មានទំនោរទៅជាស្រមើស្រមៃ ប្រាកដនិយម ឬចម្លែកជាង។ អំឡុងពេលគេងធម្មតា អ្នកឆ្លងកាត់វដ្តនៃការគេងពី ៤ ទៅ ៥ ដោយវដ្តនៃការគេងនីមួយៗមាន ៤ ដំណាក់កាលនៃការគេង។

ដំណាក់កាលទី១ គឺជារយៈពេលខ្លី វាមានន័យថាងងុយគេងហើយប្តូរទៅដេក។

ដំណាក់កាលទី ២ រាងកាយ និងចិត្តរបស់អ្នកថយចុះនៅពេលអ្នកចាប់ផ្តើមងងុយគេង។ ការភ្ញាក់ដឹងខ្លួនគឺងាយស្រួលបំផុតក្នុងដំណាក់កាលពីរដំបូងនេះ។

នៅដំណាក់កាលទី៣ ត្រូវបានគេស្គាល់ផងដែរថាជាការគេងជ្រៅ។ រាងកាយនឹងចូលទៅក្នុងរបៀបងើបឡើងវិញ។ វានឹងកាន់តែយឺត។ ទន្ទឹមនឹងនេះ សកម្មភាពទូទៅរបស់ខួរក្បាលថយចុះខ្លាំង។

ដំណាក់កាលទី ៤ គឺជាការគេង REM នៅក្នុងការគេងប្រភេទនេះ សកម្មភាពខួរក្បាលត្រឡប់ទៅកម្រិតស្រដៀងនឹងពេលដែលអ្នកភ្ញាក់។ នេះពន្យល់ពីមូលហេតុដែល REM ត្រូវបានផ្សារភ្ជាប់ជាមួយនឹងសុបិនខ្លាំងបំផុត។ នៅពេលដែលការដកដង្ហើម និងចង្វាក់បេះដូងកើនឡើងអំឡុងពេលគេង REM សាច់ដុំភាគច្រើនឈប់ដំណើរការ។ នេះរារាំងយើងពីការបង្ហាញពីសុបិនច្បាស់លាស់ទាំងនោះ។

តើមានអ្វីកើតឡើងក្នុងពេលគេង រួមទាំងដំណាក់កាលផ្សេងគ្នានៃការគេងដែលកើតឡើងបន្តិចម្តងៗ ដែលបង្ហាញពីភាពស្មុគស្មាញនៃការគេង និងសារៈសំខាន់របស់វាចំពោះសុខុមាលភាពរបស់យើង។ ស្ទើរតែគ្រប់ផ្នែកនៃរាងកាយផ្លាស់ប្តូរយ៉ាងខ្លាំងអំឡុងពេលគេង នៅពេលអ្នកគេង ណឺរ៉ូន (កោសិកាប្រសាទ) រាប់ពាន់នៅក្នុងខួរក្បាលបានផ្លាស់ប្តូរពីស្ថានភាពភ្ញាក់មួយទៅជាស្ថានភាពងងុយគេង។ ការគេងនេះពង្រឹងប្រព័ន្ធសរសៃឈាមបេះដូង និងប្រព័ន្ធការពាររាងកាយ៕

អត្ថបទ៖ សាង ស្រីល័ក្ខ

ចុចអាន៖សុបិនអាក្រក់ញឹកញាប់ គឺជាការព្រមានសុខភាពពុំគួរមើលរំលងសោះឡើយ

The post ហេតុអ្វីបានជាមនុស្សគេងលក់ តែងតែយល់សប្តិ? appeared first on Kampuchea Thmey Daily.

គេងប៉ុន្មាននាទី ទើបមានប្រយោជន៍ដល់សុខភាព?

សាង ស្រីល័ក្ខ — Thu, 02 Nov 2023 01:00:00 +0000

ការងងុយគេងគឺជាវិធីដ៏ល្អមួយដើម្បីបញ្ចូលថាមពល និងបង្កើនការប្រុងប្រយ័ត្នអំឡុងពេលថ្ងៃ។ អត្ថបទនេះរៀបរាប់អំពីរយៈពេលនៃការគេងផ្សេងៗគ្នា អត្ថប្រយោជន៍របស់វា និងការពិចារណាសម្រាប់រួមបញ្ចូលទាំងការគេងពេលថ្ងៃផងដែរ។

ការគេងខ្លី ១០ ទៅ ២០ នាទី

ការគេងខ្លី ជាធម្មតាមានរយៈពេលពី ១០ ទៅ ២០ នាទី ការគេរយៈពេលខ្លីគឺល្អសម្រាប់ការជាសះស្បើយឆាប់រហ័ស និងបង្កើនការប្រុងប្រយ័ត្ន។ លើសពីនេះ ការដេកខ្លី អាចជួយអ្នកកាត់បន្ថយភាពនឿយហត់នៅពេលថ្ងៃ និងផ្តោតអារម្មណ៍បានប្រសើរជាងមុន។

គេងកម្រិតមធ្យម ៣០ នាទី

ការគេងប្រហែល ៣០ នាទី មានប្រយោជន៍សម្រាប់ការធ្វើឲ្យប្រសើរឡើងនូវការចងចាំ និងការច្នៃប្រឌិត។

ការគេងយូរ ៦០ នាទីឬច្រើនជាងនេះ

ការគេងយូរជាង ៦០ នាទីត្រូវបានចាត់ទុកថាជាការគេងយូរ។ ហើយអាចធ្វើឲ្យអ្នកចូលទៅក្នុងដំណាក់កាលនៃការគេងជ្រៅ។ ទោះបីជាងងុយគេងយូរក៏ដោយ ទាំងនេះនឹងជួយដល់ការចងចាំ។ ប៉ុន្តែនៅតែមានហានិភ័យខ្ពស់នៃការគេងមិនដកដង្ហើម ហើយវាអាចនឹងធ្វើឲ្យអ្នកមានអារម្មណ៍វិលមុខពេលអ្នកភ្ញាក់ពីដំណេក។ ការគេងគួរត្រូវបានធ្វើនៅពេលដែលអ្នកបានសម្រាកយូរ ឧ. ចុងសប្តាហ៍ ឬសម្រាកជាក់លាក់៕

ប្រែសម្រួល៖ សាង ស្រីល័គ្ខ

ចុចអាន៖រវាងសម្រាកឲ្យបានគ្រប់គ្រាន់ និង ហាត់ប្រាណមួយណាសំខាន់ជាង?

The post គេងប៉ុន្មាននាទី ទើបមានប្រយោជន៍ដល់សុខភាព? appeared first on Kampuchea Thmey Daily.

ជប៉ុនបង្កើតឧបករណ៍គេងបញ្ឈរសម្រាប់អ្នកធ្វើការហត់

Boa Sokunveary — Wed, 16 Aug 2023 07:20:00 +0000

ថ្មីៗនេះក្រុមហ៊ុនជប៉ុនមួយបានបង្ហាញនូវឧបករណ៍ម្យ៉ាង ដែលអាចជួយឲ្យអ្នកធ្វើការហត់អាចសម្រាកមួយរយៈពេលខ្លី ។

កន្លងមកអ្នកសិក្សាតែងឲ្យដឹងថា ការគេងយកកម្លាំងរយៈពេលខ្លីអាចជួយបង្កើនផលិតភាព ភាពរហ័សរហួន និងធ្វើឲ្យអ្នកកាន់តែពូកែច្នៃប្រឌិតជាដើម ។

ឧបករណ៍ខាងលើមានឈ្មោះថា Giraffenap ដែលយកគំនិតពីសត្វកវែង ។ នៅខាងក្នុងមានសម្ភារៈទ្រទ្រង់រាងកាយឲ្យងាយស្រួលគេង ជាពិសេសការពារសំឡេងរំខានថែមទៀតផង ។

មែនទែនទៅ Giraffenap គឺជាផលិតផលរបស់ក្រុមហ៊ុន Koyoju Plywood នៅកោះហុកកៃដូ ប្រទេសជប៉ុន ដែលជាប្រទេសមានផ្នត់គំនិតល្អលើបុគ្គលិកគេងម៉ោងការងារ ។

ក្រុមហ៊ុន Koyoju Plywood បញ្ជាក់ដែលថា ឧបករណ៍នេះមានកម្ពស់ ២.៥ ម៉ែត្រ និងទទឹង ១.២ ម៉ែត្រប៉ុណ្ណោះ សម្រាប់ទ្រទ្រង់មនុស្សទម្ងន់ក្រោម ១០០ គីឡូក្រាម ។

មួយវិញទៀតគេណែនាំឲ្យអ្នកគេងរយៈពេល ២០ នាទី ឬមិនលើសពី ៣០ នាទី ទើបមិនប៉ះពាល់ដល់ដំណេកនាពេលរាត្រី ៕

ប្រែសម្រួល៖ វារី

ប្រភព៖ Dailymail

ចុចអាន៖ នៅជប៉ុន៖ ក្រុមហ៊ុនខ្លះ បានរៀបចំកន្លែងគេងសម្រាប់បុគ្គលិក ដើម្បីតបស្នងនៃការខិតខំធ្វើការរបស់ពួកគេ

The post ជប៉ុនបង្កើតឧបករណ៍គេងបញ្ឈរសម្រាប់អ្នកធ្វើការហត់ appeared first on Kampuchea Thmey Daily.

រវាងសម្រាកឲ្យបានគ្រប់គ្រាន់ និង ហាត់ប្រាណមួយណាសំខាន់ជាង?

សាង ស្រីល័ក្ខ — Wed, 26 Jul 2023 00:58:29 +0000

ធ្វើលំហាត់ប្រាណឲ្យបានទៀងទាត់ វាល្អសម្រាប់រាងកាយ។ គេងឲ្យបានគ្រប់គ្រាន់ ការសិក្សានិងស្រាវជ្រាវនិយាយថា វាក៏ល្អសម្រាប់រាងកាយរបស់អ្នកដូចគ្នា។ ប៉ុន្តែបើយើងចង់ជ្រើសរើសធ្វើតែមួយ? តើអាចធ្វើបានឬអត់ចំពោះសកម្មភាពទាំងពីរនេះ។ តើមួយណាសំខាន់ជាងសម្រាប់រាងកាយ?

ប្រសិនបើអ្នកអានមានចម្ងល់ត្រង់ចំណុចនេះ កម្ពុជាថ្មីមានចម្លើយសម្រាប់អ្នកទាំងអស់គ្នារវាងសម្រាកឲ្យបានគ្រប់គ្រាន់ ជាមួយនឹងការធ្វើលំហាត់ប្រាណ តើមួយណាសំខាន់ជាង? ដូច្នេះតើយើងគួរជ្រើសរើសធ្វើអ្វីបន្ថែមទៀត?

លំហាត់ប្រាណ តើវាល្អចំពោះសុខភាពយ៉ាងណា? គុណសម្បត្តិនៃការធ្វើលំហាត់ប្រាណ យើងទាំងអស់គ្នាដឹងថាវាជាសកម្មភាពមានប្រយោជន៍។ ជួយពង្រឹងរាងកាយឲ្យលូតលាស់ មានម៉ាសសាច់ដុំ និងឆ្អឹងរឹងមាំ ជំរុញដំណើរការមេតាប៉ូលីស ជួយគ្រប់គ្រងទម្ងន់ និងគ្រប់គ្រងការធាត់។ វាក៏ជួយកាត់បន្ថយហានិភ័យនៃការកើតជំងឺផ្សេងៗផងដែរទាំងជំងឺរ៉ាំរ៉ៃ និងជំងឺមិនរ៉ាំរ៉ៃដូចជា ទឹកនោមផ្អែម លើសឈាម ជំងឺបេះដូង ជំងឺធាត់ មហារីកជាដើម។

សម្រាកឲ្យបានគ្រប់គ្រាន់ តើវាល្អចំពោះសុខភាពយ៉ាងណា? គេងលក់ស្រួល វាជាសកម្មភាពសំខាន់ដែលរាងកាយមិនអាចខ្វះបាន។ ហាត់ប្រាណទោះមិនអាចធ្វើបានរាល់ថ្ងៃក៏ដោយ គ្រាន់តែធ្វើវាពីរបីថ្ងៃវាមិនអីទេ។ ប៉ុន្តែវាមានសារៈសំខាន់ណាស់ក្នុងការគេងឲ្យបានគ្រប់គ្រាន់ជារៀងរាល់ថ្ងៃ។ ដោយសារតែការគេងដែលប៉ះពាល់ដល់ប្រព័ន្ធភាពស៊ាំនៃរាងកាយដោយផ្ទាល់ និងប៉ះពាល់ដល់ការផ្តោតអារម្មណ៍ក្នុងការផ្តោតអារម្មណ៍លើការអនុវត្តសកម្មភាពប្រចាំថ្ងៃផ្សេងៗ រួមទាំងជួយឲ្យរាងកាយមានថាមពលគ្រប់គ្រាន់ និងត្រៀមខ្លួនសម្រាប់សកម្មភាពជាច្រើននៅថ្ងៃបន្ទាប់ ហើយសំខាន់បំផុត វាប៉ះពាល់ដល់ការឡើង និងចុះនៃទម្ងន់ផងដែរ។

យ៉ាងណាមិញរវាងសម្រាកឲ្យបានគ្រប់គ្រាន់ និង ហាត់ប្រាណ មួយណាល្អជាង? ប្រសិនបើអ្នកព្យាយាមតម្រៀបវាចេញ។ គេអាចមើលឃើញថាសកម្មភាពទាំងពីរ សុទ្ធតែមានសារៈសំខាន់។ វេជ្ជបណ្ឌិត Charles Czeisler អ្នកឯកទេសដំណេកនៅមន្ទីរពេទ្យ Brigham and Women និងសាលាវេជ្ជសាស្ត្រ Harvard នៅបូស្តុនសហរដ្ឋអាមេរិកបាននិយាយថា “វាជាជម្រើសដែលល្អសម្រាប់បេះដូងរបស់អ្នក។ ព្រោះទាំងការគេងឲ្យបានគ្រប់គ្រាន់ និងការធ្វើលំហាត់ប្រាណ សុទ្ធតែជារឿងសំខាន់សម្រាប់រាងកាយ។ ការជ្រើសរើសតែមួយប្រាកដជាមានផលប៉ះពាល់ដល់រាងកាយ ទាំងការគេងឲ្យបានគ្រប់គ្រាន់ និងការធ្វើលំហាត់ប្រាណគឺមានទំនាក់ទំនងគ្នា”។

ការសម្រាកឲ្យបានគ្រប់គ្រាន់ អាចជួយកាត់បន្ថយហានិភ័យនៃរបួសសាច់ដុំក្នុងពេលធ្វើលំហាត់ប្រាណ។ ប្រសិនបើអ្នកគេងមិនគ្រប់គ្រាន់ រាងកាយរបស់អ្នកអាចឈឺកាន់តែងាយ។ រហូតដល់មិនអាចទៅហាត់ប្រាណបាន។ លំហាត់ប្រាណក៏ជួយឲ្យរាងកាយគេងលក់ស្រួលជាងមុន។ អ្វីដែលសំខាន់គឺជួយឲ្យរាងកាយមានសុខភាពល្អ ឆ្ងាយពីហានិភ័យនៃជំងឺផ្សេងៗ។

ដូច្នេះពីទំនាក់ទំនងរវាងសកម្មភាពទាំងពីរនេះ យើងមិនអាចជ្រើសរើសធ្វើតែរឿងមួយទេ។ ប៉ុន្តែរឿងទាំងពីរនេះគួរតែអនុវត្តជាទម្លាប់ប្រចាំថ្ងៃ។ បន្តធ្វើលំហាត់ប្រាណឲ្យបានទៀងទាត់ ហើយត្រូវគេងឲ្យបានគ្រប់គ្រាន់។ ដើម្បីធ្វើឲ្យរាងកាយមានតុល្យភាព មានកម្លាំងពេញលេញ ចៀសឆ្ងាយពីហានិភ័យសុខភាពទាំងអស់៕

ប្រែសម្រួល៖ សាង ស្រីល័ក្ខ

ចុចអាន៖១១ វិធី ជួយគ្រប់គ្រងជំងឺទឹកនោមផ្អែមមិនឲ្យបង្កផលវិបាក ដោយកែប្រែទម្លាប់នៃការញ៉ាំ

The post រវាងសម្រាកឲ្យបានគ្រប់គ្រាន់ និង ហាត់ប្រាណមួយណាសំខាន់ជាង? appeared first on Kampuchea Thmey Daily.

គេងយូរពេកប្រយ័ត្នមានបញ្ហាសុខភាព ៦ ប្រភេទ

Boa Sokunveary — Thu, 20 Apr 2023 01:37:19 +0000

មនុស្សមួយចំនួនចូលចិត្តគេងយូរដើម្បីសងម៉ោងគេងដែលពួកគេជំពាក់កាលពីថ្ងៃរវល់ ប៉ុន្តែការធ្វើបែបនេះបង្កគ្រោះថ្នាក់ដល់សុខភាពទៅវិញទេ ។ បញ្ហាសុខភាពដែលបណ្ដាលមកពីគេងយូរមាន ៦ ប្រភេទរួមមាន ៖

១. ការគេងមិនដកដង្ហើម (Obstructive sleep apnea)

វាគឺជាជំងឺម្យ៉ាងដែលធ្វើឲ្យអ្នកបាត់ដង្ហើម ខណៈពេលគេងលក់ដោយមិនដឹងខ្លួន ឬធ្វើឲ្យគេងមិនងាយឆ្អែត ។

២. ទឹកនោមផ្អែម

បើយោងតាមការសិក្សាបានបង្ហាញថា គេងយូរពេកបង្កើនហានិភ័យជំងឺទឹកនោមផ្អែម ។

៣. លើសគីឡូ

គេងតិចពេកឬគេងច្រើនពេកសុទ្ធតែធ្វើឲ្យធាត់ដូចគ្នា ការសិក្សាបង្ហាញថាមនុស្សដែលគេងលើសពី ៩ ម៉ោងមានឱកាស ២១ ភាគរយនៃការលើសគីឡូក្នុងរយៈពេល ៦ ឆ្នាំទៅមុខទៀត ។

៤. ឈឺក្បាល

អ្នកស្រាវជ្រាវនិយាយថាវាបណ្ដាលមកពីសារធាតុបញ្ជូនសរសៃប្រសាទមួយចំនួននៅក្នុងខួរក្បាល រួមទាំងសារធាតុ serotonin ផងដែរ ។

៥. ឈឺខ្នង

មនុស្សជាច្រើនកំពុងឆ្លងកាត់បញ្ហានេះសូម្បីក្មេងជំទង់ក៏ដោយ ដូច្នេះអ្នកគប្បីទៅពិគ្រោះជាមួយគ្រូពេទ្យជំនាញផ្ទាល់ ។

៦. ជំងឺបាក់ទឹកចិត្ត

១៥ ភាគរយនៃអ្នកជំងឺបាក់ទឹកចិត្តគេងច្រើនខុសប្រក្រតីធ្វើឲ្យផ្លូវចិត្តពួកគេកាន់តែធ្ងន់ធ្ងរ ។

ដូច្នេះអ្នកគួរផ្លាស់ប្ដូរទម្លាប់ចេញដោយតាំងចិត្តភ្ញាក់ពីព្រឹកចូលគេងពីព្រលប់ដើម្បីសុខភាពរឹងមាំ ផ្លូវចិត្តល្អ និងអាយុវែង ៕

ប្រែសម្រួល ៖ វារី

ចុចអាន ៖ គេងត្រឹម ៥ ម៉ោង ឬតិចជាងនេះក្នុងមួយថ្ងៃ ប្រឈមហានិភ័យសុខភាពជាច្រើន

The post គេងយូរពេកប្រយ័ត្នមានបញ្ហាសុខភាព ៦ ប្រភេទ appeared first on Kampuchea Thmey Daily.

ភ្ញាក់ពីគេងមានអារម្មណ៍ធេងធោង វិលមុខ មកពីអ្វី?

សាង ស្រីល័ក្ខ — Mon, 27 Feb 2023 01:43:30 +0000

ហេតុអ្វីសុខៗស្រាប់តែមានអារម្មណ៍វិលមុខ ធេងធោង អស់កម្លាំងពេលព្រឹកពេលក្រោកពីគេង? ប្រាកដណាស់ អាការនេះអាចកើតមានជាទូទៅមិនកំណត់វ័យនោះទេ គ្រាន់តែភាគច្រើនកើតលើវ័យចំណាស់ច្រើនជាងក្មេងប៉ុណ្ណោះ។ មូលហេតុសំខាន់បំផុតដែលបណ្ដាលឲ្យយើងជួបបញ្ហានេះមានមួយចំនួន។

១.សម្ពាធឈាមថយចុះ

ការថយចុះសម្ពាធឈាមក៏បណ្ដាលឲ្យយើងភ្ញាក់ពីគេងមានអារម្មណ៍វិលមុខ ពិសេសពេលដែលសម្ពាធឈាមត្រូវថយចុះលឿន ខណៈយើងភ្ញាក់ពីគេងហើយក្រោកឡើងភ្លាមៗ។

ការគេងមិនថា គេងផ្ងារ គេងផ្កាប់ ឬចំហៀងនោះទេ តែងតែប៉ះពាល់ដល់សម្ពាធឈាមជានិច្ច។ តួយ៉ាងការគេងផ្ងារធ្វើឲ្យសម្ពាធឈាម ត្រូវធ្លាក់ចុះមកសួត ចរន្ដឈាមត្រូវចេញពីក្បាល ឆ្លងកាត់ពោះ និង ដល់ចុងជើង ដូច្នេះពេលយើងភ្ញាក់ហើយក្រោកឡើងភ្លាមៗ ចរន្ដឈាមក៏មិនអាចសម្រួលបានភ្លាមៗនោះទេ ទើបបណ្ដាលឲ្យយើងវិលមុខ។ ប៉ុន្ដែអាការៈអាចនឹងប្រសើរឡើងវិញចន្លោះពី ២ ទៅ ៣នាទី ពេលចរន្ដឈាម ដំណើរការស្រួលឡើងវិញ។

២.ខ្សោះជាតិទឹក

ប្រសិនបើយើងមិនបានញាំទឹកគ្រប់គ្រាន់ទេ រាងកាយប្រឈមការខ្សោះជាតិទឹក សម្ពាធឈាមក៏ចុះទាប ដូច្នេះជុំវិញការថយចុះសម្ពាធឈាម គឺជាមូលហេតុចម្បងបណ្ដាលធ្វើឲ្យយើងវិលមុខបាន។ ប៉ុន្ដែមិនជាអ្វីគួរឲ្យព្រួយបារម្ភនោះទេ ប្រសិនបើដោយសារមូលហេតុនេះមែន យើងអាចញ៉ាំទឹកឲ្យបានច្រើន និងញ៉ាំអាហារឲ្យបានគ្រប់គ្រាន់ នោះសុខភាពនឹងប្រសើរឡើងវិញ។

៣.ឥទ្ធិពលថ្នាំ

ការប្រើប្រាស់ថ្នាំមួយចំនួនអាចបណ្ដាលឲ្យវិលមុខពេលព្រឹក ពេលក្រោកពីគេង ព្រោះប្រសិទ្ធភាពថ្នាំទាំងនោះក៏អាចប៉ះពាល់ទៅដល់សម្ពាធឈាមដូចគ្នា។ ពពួកថ្នាំទាំងនោះមានដូចជា ថ្នាំផ្សះ ថ្នាំប្រឆាំងនឹងជំងឺធ្លាក់ទឹកចិត្ត ថ្នាំប្រឆាំងនឹងជំងឺឆ្កួតជ្រូក ថ្នាំប្រឆាំងនឹងមេរោគ ថ្នាំប្រឆាំងមេរោគអេដស៍ ថ្នាំបញ្ចុះទឹកនោម ថ្នាំបំបាត់ការឈឺចាប់ និង ថ្នាំការពារភាពស៊ាំជាដើម។ ចូរពិភាក្សាជាមួយគ្រូពេទ្យ ប្រសិនបើមានអាការៈវិលមុខ ក្រោយពេលញ៉ាំថ្នាំទាំងនោះ។

៤.គេងបាត់ដង្ហើម

ប្រសិនបើយើងមានបញ្ហាគេងបាត់ដង្ហើម ឬដកដង្ហើមមិនស្រួល ក៏បណ្ដាលឲ្យឈាមរបស់យើងមិនទទួលបានអុកស៊ីសែនគ្រប់គ្រាន់ ដើម្បីបញ្ជូនទៅកាន់សរីរាង្គខួរក្បាលបានដូចគ្នា នេះក៏ជាមូលហេតុធ្វើឲ្យ មានអារម្មណ៍ឈឺក្បាល វិលមុខពេលភ្ញាក់ពីគេង។ ម្យ៉ាងវិញទៀតផលវិបាកនៃការគេងបាត់ដង្ហើម គឺធ្វើឲ្យយើងវិលមុខ អស់កម្លាំង នៅពេលភ្ញាក់ពីគេងតែម្ដង។

៥.ជំងឺខ្សោយបេះដូង

មានជំងឺខ្សោយបេះដូង ក៏ជាមូលហេតុមួយធ្វើឲ្យយើងក្រោកពីគេង វិលមុខបានដែរ។ ជំងឺខ្សោយបេះដូង គឺស្ដែងឡើយដោយសុខភាពបេះដូងមិនរឹងមាំ និងមិនអាចច្របាច់ឈាមបញ្ជូនទៅកាន់សរីរាង្គគ្រប់គ្រាន់ទៅតាមតម្រូវការ ការណ៍នេះក៏អាចប៉ះពាល់ទៅដល់ចរន្ដឈាមក្នុងរាងកាយទើបធ្វើឲ្យវិលមុខពេលក្រោកពីគេង។

៦.គេងមិនគ្រប់គ្រាន់

យើងក៏ដឹងហើយថា ការគេងគឺជារឿងសំខាន់បំផុតសម្រាប់សុខភាពទូទៅ មិនថា សុខភាពបេះដូង ឬសុខភាពខួរក្បាលនោះទេ គឺត្រូវការគេងឲ្យបានគ្រប់គ្រាន់។ តួយ៉ាងជាមធ្យមយើងត្រូវការគេងឲ្យបាន៧ម៉ោងក្នុងថ្ងៃ ឬតិចបំផុត ត្រឹម៦ម៉ោងទើបមិនប៉ះពាល់ដល់សុខភាព ដូច្នេះប្រសិនបើយើងគេងមិនបានគ្រប់គ្រាន់ នោះនឹងធ្វើឲ្យយើងប្រឈម វិលមុខអស់កម្លាំងជាមិនខាន។

៧.ជំងឺទឹកនោមផ្អែម

អ្នកជំងឺទឹកនោមផ្អែមទាំង២ប្រភេទ នៅពេលជាតិស្ករក្នុងឈាមចុះមដល់ ចន្លោះពី ៦៥ ដល់ ៧០ មិល្លីក្រាមក្នុងមួយដេស៊ីលីត្រ ក៏អាចជួបប្រទះអាការៈវិលមុខ អស់កម្លាំង នៅពេលក្រោកពីគេងបានដែរ។ ប្រសិនបើអ្នកជំងឺជួបអាការៈបែបនេះ ប្រញាប់តេស្ដមើលកម្រិតជាតិស្ករ និង ស្វែងរកអាហារ ផ្អែមៗញ៉ាំដើម្បីបន្ធូរបន្ថយអាការៈវិលមុខនេះ ឬស្វែងរកជំនួយពីមនុស្សដែលនៅក្បែរខ្លួនជាងគេ៕

អត្ថបទផ្ដល់ដោយ៖Hello Krupet

ចុចអាន៖គេងត្រឹម ៥ ម៉ោង ឬតិចជាងនេះក្នុងមួយថ្ងៃ ប្រឈមហានិភ័យសុខភាពជាច្រើន

ចុចអាន៖ចេះរបៀបក្រោកពីគេងត្រឹមត្រូវ ដឹងតែបានផលល្អច្រើនដល់សុខភាព

The post ភ្ញាក់ពីគេងមានអារម្មណ៍ធេងធោង វិលមុខ មកពីអ្វី? appeared first on Kampuchea Thmey Daily.